Hans Burchard Otto von der Decken

Hans Burchard Otto von der Decken (* 24. April 1769; † 26. November 1838 in Neer-Ochenhusen) weer en Verwaltungsbeamten in dat Königriek Hannover.

Von der Decken is 1769 boren. He weer op de Akademie in Bützow[1] un hett von 1787 bet 1789 Juristeree an de Universität Göttingen studeert. Na dat Studium güng he in den hannöverschen Staatsdeenst un weer toeerst Auditer an dat Hoffgericht Stood. 1795 is he Hoffgerichtsassesser un later Justiz- un Konsistorialraad worrn. In de Franzosentied is he von 1807 bet 1811 na Ollnborg gahn. Nadem em de Franzosen dor 1811 verdreven hebbt, is he 1814 för de Ridderschop von dat Hertogdom Bremen Deputeerten in de Stännversammlung för dat Königriek Hannover worrn.

1818 is he Baas von de Provinzialregerung Auerk worrn. Nadem 1823 dat Königriek Hannover nee in Landdrostien indeelt worrn is, is von der Decken de eerste Landdrost von de ne’e Landdrostie Lümborg worrn. He is 1831 in Rohstand gahn. Den Rest von sien Leven hett he op dat Good Neer-Ochenhusen leevt, dat he 1802 köfft harr.

Von der Decken hett an’n 23. Juli 1795 Cäcilia von Gruben freet, mit de he den Söhn Christian Friedrich (* 1797) harr.[2]

Footnoten ännern

  1. Eintrag im Rostocker Matrikelportal
  2. http://www.ostfriesischelandschaft.de/fileadmin/user_upload/BIBLIOTHEK/BLO/Decken.pdf