Hans Hansen Palmus

Hans Hansen Palmus (* 21. September 1901 in Sonderborg; † 24. Mai 1989 in Hamborg), weer en plattdüütschen Heimatdichter.

Hansen is 1901 as Söhn von en Tollkoptein in Sonderborg op Alsen boren. He wuss op in Kiel un Cuxhoben un is dor von 1908 af an na Volks- un Middelschool gahn. 1917 güng he op de Präparandenanstalt un dat Lehrerseminar Hadersleben un denn op dat Lehrerseminar Rendsborg. He is dor to’n Schoolmeester utbillt worrn. Na disse Tied kunn he as Schoolmeester keen Arbeid finnen un weer von 1922 bet 1924 Topleger op en Kutter, Habenarbeiter un Lohnbookholer bi de Kreiskass. 1925 is he Huuslehrer in Ooljellensdörp op Fehmarn worrn, denn Kanter un Schoolmester in Landkirchen, bevör he in Vadersdörp bet 1963 binah veertig Johr Schoolmeister an de Volksschool weer. In de School in Vadersdörp weern all de Kinner vun de eerste bit de negente Klass in een Schoolruum. In de Nahkriegstied dörf he korte Tied keen Ünnerricht maken, denn he weer Mitlöper in de NSDAP. Na siene Pension is Hans Hansen Palmus na Hamborg-Bargstedt trocken.

Sien egen Nam verklaart Hans Hansen Palmus so: „Mien Vöröllern kamt ut dat lütte Dörp Düppel. Dor staht an een grote Wisch, de Palmose heet, dree smucke, lüttje Hüser. Un dor hett vör öwer tweehunnert Johr in jedeen Huus en Hans Hansen wahnt. De to linker Hand weer Raamaker, un de wöör Hans Hansen Jule nömt. De to rechter Hand weer bi de Post un hett Hans Hansen Post heeten. Un de in de Merrn hett Hans Hansen Palmose heeten, wieldat sien Huus an de Palmose liegen deit. Ut Palmose is in all de Johren denn Palmus worrn. Allens Klor?“ (Ut: Hallo Nawer, hör mal to..!, 1982, Sied 5).

Warken

• Kinnerriemels. Plattd. Gedichte f. d. Grundschule, 1953
• Blenkern Stünns. Plattd. Gedichte 1959
• Spaß mutt sien. Plattd. Gedichte 1967
• Besinnen. Plattd. Gedichte 1972
• Is wat, Nawer? Lütte Geschichten.
• Hallo, Nawer, hör mal to..! Plattd. Geschichten 1982
• Alldag hett bunte Flünken.
• Tiet blifft nich stahn.

Weblenken

• Hans Hansen Palmus in de PBuB (hoochdüütsch)