Harold Land
Harold de Vance Land (* 18. Dezember 1928 in Houston, Texas; † 27. Juli 2001 in Los Angeles, Kalifornien) weer en US-amerikaansch Jazz-Tenorsaxophonist un Komponist.
Land is in San Diego upwussen un fung sien Loopbahn in de Rhythm and Blues-Szene an. Sien eerst Upnahmen as Leader hett he 1949 för Savoy Records maakt. En Hööchtpunkt harr sien Karriere 1954/55 as Liddmaat in dat Quintett vun Max Roach un Clifford Brown, to dat he ok eegen Kompositschonen bistüern dee. 1955 hett he de Band verlaaten (sien Nahfolger wurr Sonny Rollins, bevör dat Quintett 1956 nah den Dood vun Brown uplööst wurr) un truck weer nah Los Angeles, wo sien Familie siet 1954 leev un sien Grootmoder jüst in't Starven leeg. 1956 bit 1958 speel he in de Band vun Curtis Counce. Sien 1958 rutbrocht Album The Fox hett bi Hardbop-Kennern Kultstatus. Anfangs in' Hardbop to Huus (un somit dat Gegenbispeel för de These, dat dat an de Westküst kien Hardbop geven hett), speel he in de 1960er Johren ünner Infloot vun John Coltrane. In Los Angeles hett he as Studiomusiker arbeit, speel in de Band vun Gerald Wilson (af 1955), 1961 bi den Jazz Giants vun Shorty Rogers, leit sien egen Gruppen un weer Co-Leader in Gruppen mit Red Mitchell (1961/2), Bobby Hutcherson (1969 bit 1971), Blue Mitchell (1975 bit 1978). In de 1980er Johren speel he in de Timeless All Stars mit Billy Higgins.
Af 1996 weer he Perfesser in dat Jazz-Studies Programm vun de University of California in Los Angeles.
Neben Saxophon speel he ok Flöte un Oboe. Sien Söhn Harold Land junior, boren 1950, is Jazz-Pianist, de ok in verscheeden Gruppen vun sien Vader mitspeelen dee.
Diskografie (Utwahll) ännern
- Alone Together (Verve, 1954–1956) mit Clifford Brown, Sonny Rollins, Paul Quinichette, Helen Merrill, Sarah Vaughan
- The Harold Land Quintet, 1958
- Harold Land in the Land of Jazz, Contemporary Records/OJC 1958 (later as Grooveyard rutbrocht, nah dat Stück vun Carl Perkins up dat Album, mit Rolf Ericson, Leroy Vinnegar, Frank Butler, Carl Perkins)
- The Fox (HiFi Jazz, 1959) mit den Pianisten Elmo Hope, den Trompeter Dupree Bolton, den Bassisten Herbie Lewis, den Slagtüüchspeler Frank Butler
- West Coast Blues, Jazzland/OJC 1960 (mit Wes Montgomery)
- Stand-Up Guys (1989) mit Charlie Shoemake