Hauptmenü öffnen

Disambig.svg Dit Woort hett noch annere Bedüden: kiek dorför ünner Helmut Rahn (Philoloog).

Helmut Rahn in' März 1962

Helmut Rahn (* 16. August 1929 in Essen; † 14. August 2003 ok dor) weer en düütsch Footballspeler.

Rahn wurr dör dat entscheeden Door to dat 3 : 2 in dat WM-Finale 1954 gegen Ungarn berühmt, de de düütsch Footballnatschonalmannschap to‘ Weltmeester maaken dee un dat „Wunder von Bern“ begrünn. He droog wegen sien Fähigkeiten as Führungsspeler den Ökelnaam „Der Boss“.

VereenskarriereÄnnern

Helmut Rahn wurr 1929 as dart vun veer Söhns vun en Bargmannsfamilie in Essen boren un is mit 9 Johren den SV Altenessen bitreeden, den he bi nah den Tweeten Weltkrieg aktiv anhörrn dee.

In de Nahkriegstiet speel he van 1946 bit 1950 för den SC Oelde 09, wo he in een Saison 52 Doren schaaten hett. Nah een Johr bi de Sportfreunde Katernberg (1950/51) wessel he 1951 to Rot-Weiss Essen, den gröttsten un traditschonsrieksten Vereen vun sien Heimatstadt.

1953 wunn he Essen den DFB-Pokal, twee Johr later hett RWE den 1. FC Kaiserslautern in dat Finale um de düütsch Meesterschap besiegt. In dat Endspeel wunnen de Essener mit August Gottschalk as Speelführer gegen de „Walter-Elf“ mit 4 : 3. 1957 is Rahn mit sien Auto vull besaapen in en Baugruuv fohren un wurr doruphen erst mal fastnommen. Up de anrückt Polizisten is he dormals mit Füüst un Fööt losgahn.

Nah acht Johren hett Rahn 1959 sück vun Essen verafscheedt un hett bi den 1. FC Köln anhüert. Een Johr stunn he mit sien nee Mannschap weer in dat Endspeel um de düütsch Meesterschap, wo man aber gegen den Hamburger SV mit (2 : 3) verlor. Bi de Kölner hett sück Rahn eenige Disziplinarstrafen inhannelt, 1961 wurr he weer duun an‘ Stüer vun sien Auto erwischt un wurr nu to veer Week Gefängnis ahn Bewährung veroordeelt.

 
Rahn (rechts) in dat Trikot vun den SC Enschede, 1960

Angebote vun groot europääsch Clubs hett he utslahn, bit up en dreejohrig Engagement bi den Sportclub Enschede in den Nedderlannen. Bi den Start vun de Football-Bundsliga 1963 speel Rahn bi den Meidericher SV. In de eerst Bundsligasaison hett de Oltstar 18 Spelen maakt und orbi acht Doren schaaten.[1] An‘ veerten Speeldag in dat Speel gegen Hertha BSC wurr he nah en Tätlichkeit as eerst Bundsligaspeler vun dat Feld verwiest; he keem eerst weer in dat 8. Speel to’n Insatz. In de nächst Saison stunn Rahn woll noch in den Kader vun de Meidericher, keem aber wegen Problemen an de Achillessehne blots noch eenmal, bi de 2:4-Nedderlaag gegen Borussia Neunkirchen, to’n Insatz. Nah en Operatschoon an de Achillessehne muss Rahn sien Karriere 1965 in dat Öller vun 35 Johren afsluuten.

NatschonalmannschapÄnnern

Enn‘ 1951 wurr Rahn eerstmals in den Kader vun de Natschonalmannschap beropen un geev sien Debüt an‘ 21. November 1951 bi den 2:0-Sieg över de Törkie in Istanbul. Wenig Weeken later gelung hüm – in sien Heimatstadt Essen – bi dat 4 : 1 över Luxemborg sien eerst Lännerspeeldoor.

WM 1954Ännern

1954 wurr Rahn vun Natschonaltrainer Sepp Herberger för de WM-Endrunn in de Swiez nomineert. Tonnächst geev Herberger in dat Vörrunnenspeel gegen de Törkie (4 : 1) den Schalker Bernhard Klodt den Vörtoog. Rahn keem dorför in dat tweet Speel gegen Ungarn to’n Insatz, as Herberger ut taktisch Grünnen (en aftosehn Nedderlaag gegen Ungarn würr en tosätzlich Entscheedensspeel gegen de Türkei bedüüden) de Stammspeler schonen dee un de half Mannschap mit Ersatzspelern upbeeden dee.

De düütsch Reserve-Elf wurr vun de Ungarn mit 3 : 8 düütlich slahn. Rahn weer noch en vun de best Spelern un hett ok en Door schaaten – för Herberger mit en Grund, hüm in dat Veertelfinale gegen Jugoslawien uptostellen, wo Rahn bi dat 2 : 0 ok weer drapen dee. Nah en 6 : 1 över Öösterriek stunnen de Düütschen unverwacht in’t Endspeel, wo se weer up Ungarn drapen deen. Nah 0:2-Rückstand hett de düütsch Elf dör Doren vun Max Morlock un Rahn utgleekn, de in de 84. Minüüt ok noch dat Siegdoor to’n 3 : 2 scheeten dee. Dat „Wunder von Bern“ weer perfekt un ganz Düütschland fier sien Weltmeester.

In‘ Kontext vun dat sück langsam weer entfalten Sülvstbewusstween vun Nahkriegsdüütschland gellt dat Siegdoor vun Rahn gegen de favoriseerten Ungarn bit hüüd as dat woll berühmteste Door in de düütsch Footballgeschichte. Övermittelt wurr dat dör de Radio-Reportage vun Herbert Zimmermann;[2]: „… Kopfball – abgewehrt – aus dem Hintergrund müsste Rahn schießen – Rahn schießt! – Tooooor! Tooooor! Tooooor! Tooooor! …“

WM 1958Ännern

Ofschons Rahn in de folgen Johren dör Eskapaden in negative Schlagzeilen geraden weer, hull Herberger an sien Rechtsbuten fast un hett hüm ok to de WM 1958 in Sweden mitnommen. In der Vörrunn hett Rahn twee Doren gegen Argentinien (3 : 1) as ok een Door gegen Nordirland (2 : 2) un de Tschechoslowakei (2 : 2) schaaten. Noch en Door gelung Rahn in dat Veertelfinale gegen Jugoslawien, so dat Düütschland in dat Halffinale intrecken dee. Hier ist Düütschland nah en 1 : 3 gegen Gastgever Sweden utscheeden. Dat Speel um Platz 3 gegen Frankriek hett man mit 3 : 6 ut de Hand geven.

Nah söss WM-Doren un en insgesamt stark Turnier wurr Rahn 1958 bi de Wahl to‘n Footballer vun dat Johr in Europa up Platz 2 wählt un weer dormit bit 1970 bestplatzeert düütsch Speler bi disse Wahl.

Sien letzten Insatz för de Natschonalmannschap harr he an‘ 27. April 1960 bi dat 2 : 1 gegen Portugal, wobi hüm nochmal en Door gelung. Nah 40 Lännerspelen (21 Doren) truck he sück ut dat internatschonale Geschäft torüch.[3]

 
Denkmal an dat ahmalge Georg-Melches-Stadion

Leben nah den FootballÄnnern

1965 kunn Rahn up en lang un spoodriek sportlich Loopbahn torüchkieken. As Geschäftsmann bleev he aber wietgahnd ahn Spood. Gemeensam mit sien Bröer Hans hett he sück as Gebruuktwagenhändler versöcht, later hett he as Repräsentant un Verkoopsbaas vun en Entsörgensfirma för Bauschutt arbeit. In de 1970er Johren hett he noch eenige Benefizspelen organiseert, bi de he af un to sülvst noch mitspeelt hett. Dornah is he apenlich Upträen in Tosommenhang mit sien Footballertiet ut den Weg gahn. Sülvst för de Dreiharbeiten to Sönke Wortmann sien Speelfilm Das Wunder von Bern, in dat de Rull vun Helmut Rahn in‘ Middelpunkt steiht, kunn he nich för en beraden Mitwarken överreedt wurrn. Regelmatig antodrapen weer he blots in sien Stammkneipe, de Friesenstube in Essen up de Frohnhauser Straat, wo hüüd en Tafel an hüm erinnert.

FamilieÄnnern

Helmut Rahn hett 1953 de Verköperin Gertrud heiraadt. He harr twee Söhns, Uwe (* 1954) un Klaus.[4] De Enkel vun en Cousin is de ghanaasch Natschonalspeler Kevin-Prince Boateng.

DoodÄnnern

 
Dat Graff vun Helmut Rahn

An‘ 14. August 2003 is Helmut Rahn nah lang, swoor Krankheit twee Daag vör sien 74. Gebortsdag in sien Essener Wahnen storven. Sien Graffstäe befind sück up den Margaretenkarkhoff in Essen-Holsterhausen. An‘ 12. Juli 2004 wurr mit en Festakt in dat Essener Georg-Melches-Stadion vör etwa 5500 Tokiekers en Denkmal to sien Ehren enthüllt. Siet 2014 steiht disse meest levensgroot Bronzestatue vun Inka Uzoma up den Helmut-Rahn-Platz an dat nee Stadion.[5] De Helmut-Rahn-Sportanlaag in Essen-Frohnhausen drocht siet 2010 sien Naam. In Oelde wur en Straat nah Rahn nömmt.[6]

StatistikÄnnern

  • 40 Lännerspelen; 21 Doren för Düütschland
  • 1 B-Lännerspeel; 2 Doren
  • 1. Bundsliga
    19 Spelen; 7 Doren Meidericher SV
  • Böverliga West
    201 Spelen; 88 Doren Rot-Weiss Essen
    29 Spelen; 11 Doren 1. FC Köln
  • Endrunn um de Düütsch Meesterschap
    7 Spelen; 3 Doren 1. FC Köln
  • Westpokal
    2 Spelen; 2 Doren 1. FC Köln

In de KunstÄnnern

De Speelfilm Das Wunder von Bern ut dat Johr 2003 is Helmut Rahn widmet. Dorto kummt dat glieknamige Musical, in dat hüm en groot Rull tokummt.[7] He wurrd in dissen Film vun Sascha Göpel dorstellt.[8]

Düütsch FootballmuseumÄnnern

De linke Schoh, mit de Helmut Rahn in de WM 1954 dat entscheeden Door schaaten hett, is in dat Düütsch Footballmuseum in Düörpm utstellt.[9]

EhrungenÄnnern

LiteraturÄnnern

  • Helmut Rahn: Mein Hobby: Tore schießen. 1959, ISBN 3-421-05836-9. (Nee upleggt mit Vör- un Nahwoort vun Hermann Beckfeld. Henselowsky Boschmann Verlag, Bottrop 2014, ISBN 978-3-942094-40-5.)
  • Helmut Rahn: In den guten Schuhen wird nicht Fußball gespielt. In: … der Boss spielt im Himmel weiter: Fußball-Geschichten aus dem Ruhrgebiet. Herutgever: Hermann Beckfeld, Werner Boschmann. Henselowsky Boschmann Verlag, Bottrop 2006, ISBN 3-922750-62-1.

WeblenkenÄnnern

  Helmut Rahn. Mehr Biller, Videos oder Audiodateien to’t Thema gifft dat bi Wikimedia Commons.

Enkeld NahwiesenÄnnern

  1. Matthias Arnold: [1] Helmut Rahn - Matches and Goals in Bundesliga, Rec.Sport.Soccer Statistics Foundation
  2. „Rahn müsste schießen“. sporthelden.de, afropen an‘ 19. Juni 2014
    Oskar Beck: „Rahn müsste schießen“. Der Siegeszug von Schwarz-Rot-Gold begann im Berner Wankdorfstadion. Welt am Sonntag, 30. Mai 2009.
    Andreas Bellinger: Das Finale: „Aus dem Hintergrund müsste Rahn schießen“. Stern.de, 1. Oktober 2003
  3. Michael Mühlen [2] Helmut Rahn - Goals in International Matches, Rec.Sport.Soccer Statistics Foundation
  4. Helmut Rahn. Die Helden von Bern, 2004; afropen an‘ 19. Juni 2014.
  5. www.derwesten.de. Afropen an‘ 25. Februar 2017.
  6. Heinz Werner Drees: [url=http://oelder-anzeiger.de/rahn/] Oelde und »Boss« Helmut Rahn, Oelder Anzeiger
  7. Helmut Schümann: Nachruf zum Tod von Helmut Rahn: Der Wundermann von Bern. Tagesspiegel, 16. August 2003.
  8. Das Wunder von Bern (2003). Düütsch IMDb, afropen an‘ 19. Juni 2014.
  9. dfb-fussballmuseum.de: Rahns WM-Schuh erinnert an „Das Wunder von Bern“, 4. Juli 2014
  10. Elf Fußball-Legenden und eine Trainer-Ikone