Helmut Tietje

düütsch Politiker

Helmut Tietje (* 20. Mai 1926 in Rodenborg; † 7. Juni 1975 in Wasra) weer en düütschen Politiker von de CDU.

Tietje is 1926 in Rodenborg boren un weer na de Volksschool noch op de Middelschool. Later hett he sik an de Volkshoogschool un an dat Seminar von de Stoder Industrie- un Hannelskamer un in de Nedderssdsische Gemeenverwaltungsschool wiederbillt. He hett de bedrievsweertschoplich utricht Twete Verwaltungsprüfung mit en good Resultaat bestahn un is in Rodenborg bi de regionalen Versorgungs- un Verkehrsbedrieven Baas för dat Rekenwesen worrn. He is Maat in’n Gewerkschaftsraad von de Düütsche Anstellten-Gewerkschaft (DAG) worrn, weer Maat in’n Vörstand von dat Hambörger Bildungswark von de DAG, un weer Bundsvörsitter von de DAG-Fachgrupp Energiewirtschaft.

He weer Maat von de NSDAP un hett 1946 vör den Entnazifizerungsutschuss utseggt, dat he 1944, as he 18 worrn is, automaatsch in de NSDAP opnahmen worrn is un dat he dor sülvs nix bi daan hett.

In Stood weer he Vörsitter von’n CDU-Bezirk, in’n Landkreis Rodenborg weer he von 1968 bet to sien Dood a’n 7. Juni 1975 Landraad, un he weer Vörsitter von de CDU-Frakschoon in’n Rodenbörger Kreisdag.

Von’n 6. Juni 1967 bet to sien Dood an’n 7. Juni 1975 (6. bet 8. Wahlperiood) weer he as direkt wählten Kannedaat för den Wahlkreis Rodenborg Maat von’n Landdag von Neddersassen. He wer Vörsitter von’n Ünnerutschuss Frömmenverkehr un von’n Utschuss för Weertschop un Verkehr von’n 18. Dezember 1974 bet 7. Juni 1975. Sien Nafolger in’n Landdag weer Adolf Freiherr von Wangenheim.

An’n 7. Juni 1975 hett Tietje an en Manöver von de Bundswehr deelnahmen. Dorbi sünd twee Fohrtüüg von de Bundswehr tohoopstött un Tietje is bi düssen Unfall doodbleven.

De Jugendharbarg in Rodenborg, de fröher ok von de DAG bruukt worrn is, driggt vondaag na em den Naam Helmut-Tietje-Huus. De Helmut-Tietje-Straat in Rodenborg is ok na em nöömt.

Literatur ännern

  • Stephan A. Glienke: Die NS-Vergangenheit späterer niedersächsischer Landtagsabgeordneter. Abschlussbericht zu einem Projekt der Historischen Kommission für Niedersachsen und Bremen im Auftrag des Niedersächsischen Landtages. Herausgegeben vom Präsidenten des Niedersächsischen Landtages. Durchgesehener Nachdruck der ersten Auflage. Hannover 2012, S. 104f (online als PDF).