Hemeln

Stadtdeel vun Bremen Hemeln

Wat to seggen is		Rang
Flach:	29,76 km²	2/23
Inwahners:	41.897	2/23
Inwahnerdicht:	1408 Inwohners/km²	16/23
Andeel Butenlänners:	14,8 %	8/23
Arbeitslosenquoot:	18 %	13/23
Wannehr:	Midde 2005
Ortsdelen: Arbargen, Hastedt, Hemeln, Mahndörp, Segelsbrugge
Website:	Ortsamt Hemeln
E-Mail-Adresse:

Hemeln (hoochdüütsch Hemelingen) is en Stadtdeel vun Bremen un höört to den Stadtbezirk Oost. Hemeln sett sik tohopen ut de Oortsdelen un vörmoligen Dörper Hemeln, Hastedt, Segelsbrugge, Arbargen un Mahndörp.

Korten Överblick över de Historie

Vun dat 7. Johrhunnert v. Chr. af an: Wohnsteden in Hemeln un Mahndörp
1238: To'n eersten Mol is in en Urkunn wat vun Hemeln to lesen.
1803: Hastedt un Delen vun Segelsbrugge kaamt to dat Bremer Landgebiet hento.
1902: Hastedt warrt Deel vun de Stadt Bremen
1921: Segelsbrugge warrt Deel vun de Stadt Bremen
1939: Hemeln, Arbargen un Mahndörp weert Deel vun de Stadt Bremen

Wat in Hemeln los is un wat een sik dor ankieken kann

Musik

In'n Oortsdeel Hemeln steiht de Aladin Music Hall. Dat is ene Diskothek, man dor gifft dat ok allerhand Kunzerten to hören. De Club Tivoli slutt sik justament an de Music Hall an.

Museum

Bi dat Depot vun de Stratenbahn in Segelsbrugge gifft dat en Museum över de Geschicht vun de Stratenbahn in Bremen. Dor kann en sik ok ole Stratenbahnwagens ankieken. In Hastedt gifft dat in de Grundschool Up de Hohwisch en Utstellung över de School un wie dat dor fröher weer. Dor is ok allerhand över tohopensammelt wurrn.

Slott un Park

In Segelsbrugge liggt de Slottpark mit en Herrenhuus ut dat 17. Johrhunnert. Nevenan finnt sik dat Slottpark-Bad, wat en Swimmbad för Jan un allemann is.

Weertschop

Grote Delen vun Hemeln weert hüdigendags vun Bedrieven un Hannel bruukt. De Weertschop speelt en grote Rull in düssen Stadtdeel. Bi 20% vun dat Bremer Sozialprodukt kümmt in Hemeln tostanne. In'n Mai 2005 is de Autobahntobringer Hemeln fardig wurrn. Vun dor af an hett dat nee Bedrievenrebeet Hansa-Linie en egen Autobahnansluss harrt.

Verkehr

Hemeln liggt an de Bundsautobahn A1 un is nich wiet af vun de A27. Vun de Autobahn kann en över dree Affahrten na Hemeln henkamen: Vun de A1 över de Affahrten Hemeln un Uphusen/Mahndörp un vun de A27 över de Affahrt Segelsbruge. Bahnhööv gifft dat in Hemeln, in Segelsbrugge un in Mahndörp. In den Hemelner Werserhaven gifft dat noch en Bahnhoff för Göderümslag. In Hastedt un Segelsbrugge fahrt de Stratenbahnlinien 2, 3 un 10. De Linie 1 schall laterhen mol bit na den Mahndörper Bahnhoff gahn. Vun'n Johr 2009 af an schall dat mit dat Längermaken losgahn un bit 2011 schall de nee Linie denn fardig ween.

Lüde, de wat mit Hemeln to kriegen hefft

De Oortsdeel Hemeln

Dat ole Dörp Hemeln is de gröttste Oortsdeel in den Stadtdeel Hemeln. Dor gifft dat al siet vele Johren de Firmen Kraft Foods, Atlas Elektonik, Rheinmetall Defence Electronic, Wilkens un Söhns - Bremer Sülverwarenfabrik (BSF), Coca Cola un Karl Könecke Fleeschwaren. Siet Johrenden al warrt in'n Süden vun Hemeln an dat Bedrievenrebeet Hansa-Linie arbeit. Dat is en grodet Bedrievenrebeet, wat up de vörmalige Hemeler, Arbarger un Mahndörper Masch boot wurrn is.

In'n Oortsdeel Hemeln gifft dat veer Scholen. Dat sünd de Grundscholen an de Brinkmannstraat, an'n Osterhop un an de Klockenstraten un dat Schoolzentrum Drebberstraten. Veel Hökers hefft sik mit jem ehr Koopmannladens in de twete Hälft vun de 1990er Johren ut Midden-Hemeln torüchtagen. Veel Ladens stünnen vun dor af an leddig. Vun 2003-2004 af an geiht dat avers suutje wedder vörut mit de Hökeree. En Geschäft, wo ok Lüde vun wieter weg kopen doot, is de Laden för Iesenbahnmodellen an de Bahnbrügg över de Ossenbrügger Straat, nich wiet af vun'n Bahnhoff.

An de Eck Hemeler Bahnhoffstraat/Dietrich-Wilkens-Straat steiht de vörmolige Villa vun den Grünner vun de Sülverfabrik. Dor is hüdigendags dat italieensche Restaurant Rimini in ünnerbröcht.

Weblinks

Hemeln up www.bremen.de (hoochdüütsch)
Lütten Mexiko

Bremer Stadtdelen un Oortsdelen