Henry Gibson
Henry Gibson (* 21. September 1935 in Germantown, Pennsylvania, USA; † 14. September 2009 in Malibu) weer en US-amerikaanschen Schauspeler un Leedermaker. In de USA is he sünners vun sien velen Optreden in de Sketch-Comedy-Reeg Rowan and Martin’s Laugh-In Enn vun de 1960er Johren bekannt worrn.
Leven un Wark
ännernBoren weer Gibson ünner den Naam Bateman as Söhn vun Dorothy (boren Cassidy) un Edmund Albert Bateman[1]. He hett na de School de Catholic University of America in Washington D.C. besöcht un dor dat Fack Drama maakt. In de 1950er Johren deen he as Narichtenoffizeer bi de United States Air Force. To disse Tiet schreev he en Wark, wo binnen he en Dichter porträteer, de en Süüdstatenakzent harr, un in disse Periood hett he ok sien Bühnennaam Henry Gibson annahmen, de anspeelt op den Naam vun den norweegschen Dichter Henrik Ibsen un de sik ok gliek anhöört, wenn man jem gau utsnacken deit.
Al wiel sien Kindheit hett he in de 1940er Johren eerste Insichten in’t Theaterspelen kregen[2]. Sien Filmloopbahn füng 1963 an mit en Rull in den Jerry-Lewis-Film The Nutty Professor. Dorna harr he enige Rullen in enkelte Episoden in verscheden Feernsehserien. Een Dag weer he to Gast in de Dick Van Dyke Show, woneem he dat Gedicht Keep A Goin’ vördrägen de. worut he later en Leed maakt hett vör den Film Nashville, in den he ok mitspeelt hett. För de Rull vun en kreperischen Country-Musiker in den Film is he mit den NSFC-Award uttekent worrn un kreeg noch wietere Nomineeren.
Groten Spood harr he vörher al mit regelmatig Rullen in de Sketch-Comedy-Show Rowan and Martin’s Laugh-In, in de he över dree Johr mitmaakt hett un de em den Dörbrook broch. en vun sien regelmatig rullen weer „de Dichter“, de vun achter de Bühn opduken de Gedichten vertell, de vun knasche Satier oder politisch Inholten hanneln deen. Sien Optreden löpen jümmers gliek af mit en Stil, de nich to verwesseln weer. Regelmatig speel he ok in dat Show-Segment „Cocktail Party“ en kathoolschen Priester, de en Sluck vun sien Tee nipp un denn de Tass afsetten de, üm dorbi en drögen Kommentar mit eernster Stimm to bringen. Dorna nipp he wieter an sien Tee.
De internatschonalen Filmkiekers kiennt Gibson mit sien goot weddertokennen Gesicht sünners dör twee vun sien Speelfilmrullen. Dat een is de Kummedie The ’burbs vun 1989, worin he den Hööftslingel speelt hett un dat annere is de Kultfilm The Blues Brothers vun Speelbass John Landis vun 1980. Dor harr he de Rull vun den Anföhrer vun de „Illinois Nazis“. Bit nu hett Gibson an wiet över hunnert Filmen un Feernsehprodukschonen mitarbeit, wobi he faken Gastrullen in Feernsehregen harr, aver ok as Synchroonsnacker in Animatschoonsfilmen mitmaakt hett, as t. B. as dat Swien Wilbur in den Kinnerfilm Charlotte’s Web ut dat Johr 1973.
Henry Gibson hett 1966 Lois Joan Geiger heiraadt, mit de he bit to ehrn Dood in’n Mai 2007 tohopenleevt hett. Se harrn tosamen dree Söhnen.
Filmografie (Utwahl)
ännernUtteken
ännernHenry Gibson hett mehrere Nomineeren för Filmpriesen hatt för den Film Nashville, een dorvun in de Kategorie Best Filmmusik tosamen mit annere Komponisten, de annern as Best Nevendorsteller. As Best Nevendorsteller weer he ok för sien Arbeit in de Sketch-Serie Rowan and Martin’s Laugh-In nomineert. Wunnen hett Gibson een Filmpries:
- 1975: den NSFC Award in de Kategorie Best Nevendorsteller in Nashville.
Borns
ännernWeblenken
ännern- Henry Gibson in de Internet Movie Database (engelsch)