Hermann Lindemann (Jurist)

Hermann Lindemann (* 1880 in Osterburg; † 1952) weer en düütschen Jurist.

Lindemann is 1880 as Söhn von Elisbeth, borene Placke, un den Landgerichtsraad Hermann Lindemann in Osterburg in de Oltmark boren.[1] De Offzeer Georg Lindemann weer sien Broder. He hett Juristeree an de Universitäten Göttingen, München un Lausanne studeert.[1] Na dat Studium weer he Referendar un is Gerichtsassesser in Hameln worrn.[1] 1909 keem he as Gerichtassesser in’n Bezirk von dat Oberlandsgericht Posen un is dor in Schroda, Gnesen, Ostrowo un Posen insett worrn.[1]

Op sien eerste Richtersteed is he an’n 6. Mai 1912 beropen worrn, as Amtsrichter von dat Amtsgericht Vandsburg.[1][2] Dor hett he an’n 1. Juni 1912 anfungen.[1]

1914 is he Soldaat in’n Eersten Weltkrieg ween.[2] Nadem he verwunnt worrn is, hebbt se em na disse Tied in de Militärverwaltung insett, in’n Süden von Litauen.[2] Na’n Krieg weer he wedder an dat Amtsgericht Vandsburg, dat dat Düütsche Riek an Polen afgeven müss, nadem 1919 de Versailler Verdrag in Kraft treden is.[2] To’n 1. August 1919 is he an dat Amtsgericht Lüchow versett worrn, is denn aver doch noch wedder for en Tied trügg na Vandsburg.[1] Utreisen ut Polen dröff he eerst wedder an’n 2. März 1920.[1]

He is to’n 1. Mai 1920 as Amtsrichter an dat Amtsgericht Bassen wesselt un 1924 as Landgerichtsdirekter an dat Landgericht Veern.[2][1] Von 1938 bet 1945 weer he Präsident von dat Landgericht Veern.[2]

In Veern weer Lindemann ok Föhrer von’n Stahlhelm un Stormbannföhrer bi de SA.[2]

Na’n Tweten Weltkrieg is he nich wedder in’n Justizdeenst övernahmen worrn.[2]

Lindemann weer Eersten Bisitter von de Stadt Veern un hett von 1942 bet 1945 de Geschäften von’n Börgermeester föhrt.[3]

Lindemann hett 1910 in Posen freet.[1] He harr mit siene Fro de Kinner Inga (1911–2002), Hildegard (* 1913) un Hermann (11. September 1916–22. Februar 1951).[1][4]

FootnotenÄnnern

  1. a b c d e f g h i j k Westpreussen-Jahrbuch. C. J. Fahle, 2001, Sied 43ff
  2. a b c d e f g h Die Landgerichtspräsidenten op http://www.landgericht-verden.niedersachsen.de
  3. Ronald Klee: Das Chaos wächst und die NS-Verwaltung beginnt Dokumente zu vernichten. Akten werden verbrannt, Kreiszeitung an’n 14. April 2015
  4. Verdener Familienforscher e.V.: Domfriedhof Verden Domfriedhof Nr.: Abteilung I, Reihe 4