Hieronimus von der Decken
Dit Woort hett noch annere Bedüden: kiek dorför ünner Hieronymus von der Decken.
Weipart Ludolf Hieronimus Wigand von der Decken (* 28. Februar 1781 op Laak; † 10. April 1845 in Veern[1]) weer en düütschen Offzeer ut de Familie von der Decken.
Von der Decken is 1781 as Söhn von Claus von der Decken (1741–1803) boren. He weer Arvherr op Laak. Von 1794 af an hett he in de Armee deent.[2] Toeerst as Kornett in dat 4. Kavallerieregiment, bi dat he 1801 Sekondeleutnant worrn is, un denn 1804 bet 1810 as Premierleutnant un Riddmeester in de King’s German Legion bi dat 1. swore Dragunerregiment un dat 3. lichte Draguner- (later Husaren-)Regiment.[2][1] He weer 1807/1808 bi de Expeditschoon na Rügen dorbi.[2] Ok gegen Kopenhagen un na Göteborg is he tagen un denn na Portugal.[2] Dor hett he 1808 un 1809 den Trüggtog na Coruña (na de Slacht bi Talavera) mitmaakt.[2] 1810 is he ut Familiengrünn na Düütschland trügg.[2]
Von der Decken hett gegen Joseph Morand en Landstorm-Trupp opbaden, de aver wedder uteneenlopen is.[2]
An’n 25. März 1813 hett de russ’sche General Friedrich Karl von Tettenborn von der Decken un Christian von Zesterfleth beopdragt, in Bremen-Veern en Legion ünner hannöversch Feldteken tohooptostellen, üm in de Freeheitskriege gegen de Franzosen gegenan to gahn.[2] De Bremen-Veerner Husaren hebbt mit een Swadroon de Slacht an de Göhr mitmaakt un jüstso den Krieg von 1815.[2] He weer 1813 toeerst Riddmeester, denn Major un is 1814 Oberstleutnant worrn.[1] 1821 is he königlich hannöverschen Oberst bi dat 3. Husarenregiment worrn, 1831 Generalmajor un 1838 Generalleutnant.[1] Siet 1834 weer he in Veern statschoneert. Ut’n aktiven Deenst is he in’n Januar 1845 rut.[1]
He hett an’n 7. März 1816 Margarete Johanne Adelheid von der Wisch (20. Juni 1784–27. Dezember 1840) freet. De beiden harrn de Dochter Adelheid (30. November 1816–18. September 1895).
Privat hett he sik vördaan as Forscher to de Familiengeschicht un den Familienstammboom von de Familie von der Decken.
Footnoten ännern
Weblenken ännern
- Bild von Hieronimus von der Decken (däänsch)