Highlander II: The Quickening
Highlander II: The Quickening (op plattdüütsch so veel as „De vun’t Hoochland II: De Versnellen“; dt. Titel: Highlander II — Die Rückkehr) is de Titel vun en Fantasy-Film ut dat Johr 1991 vun den Speelbaas Russel Mulcahy. De Film is de tweete Deel vun den Film Highlander, de 1986 in de Kinos to sehn weer un ok vun Russel Mulcahy dreiht weer.
| Filmdaten | |
|---|---|
| Plattdüütsch Titel: | — |
| Originaltitel: | Highlander II: The Quickening |
| Düütsch Titel: | Highlander II – Die Rückkehr |
| Produkschoonsland: | USA |
| Johr vun’t Rutkamen: | 1991 |
| Läng: | 91 Minuten |
| Originalspraak: | Engelsch |
| Öllersfreegaav in Düütschland: | FSK 18 |
| Filmkru | |
| Speelbaas: | Russell Mulcahy |
| Dreihbook: | Peter Bellwood |
| Produkschoon: | Peter S. Davis William N. Panzer |
| Musik: | Stewart Copeland |
| Kamera: | Phil Meheux |
| Snitt: | Anthony Redman Hubert C. de la Bouillerie |
| Szenenbild: | Roger Hall |
| Kledaasch: | Deborah Everton |
| Dorstellers | |
| |
Inholt
ännernDe Ozonschicht vun’t Johr 1994 is wegen de Ümweltversmudden tonichten maakt. Vele vun de Minschen blievt wegen de starken UV-Strahlen doot. Ok Brenda, de Fründin vun Connar ut den eersten Deel, is een vun de Oppers. Man se seggt Connar, dat he sik dorüm sorgen mutt, dat dat wedder in de Reeg kummt. Mit Wetenschopplers tosamen boet he en Schuulschild, de de Eer un de Minschen vör de Strahlen schulen schall.
In’t Johr 2024 leevt de Minschen nu al 25 Johren ünner den Schild un Connar MacLeod is en ollen Mann worrn. As he in de Oper sitt, kriggt he en Vision in de he doran denken mutt, dat he egentlich gor nich ut de Highlands kummt, man vun den Planet Zeist. Dor weer he inst Anföhrer vun Rebellen, de gegen den General Katan streden hebbt. De hett em dormols op de Eer verbannt,woneem he blots starven künn, wenn man em den Kopp afhaun de. Un so geev dat en grote Tall vun Rebellen, de nich doodblieven künnen un op de Eer togang weern – ünner den Dwang, gegen’nanner kämpen to möten, bi blots noch een vun jem över is.
Nu, as dat mit Connar toenn geiht, is Katana bang, dat he torüch na Zeist kummt. Üm em doran to hinnern schickt he sien beiden Mackers Reno un Corda los, dat se em an de Siet maken schüllt. Dat passerrt, as jüst Louise Marcus op Connar MacLeod tokummt, de as Ümweltaktivistsche vun de Polizei söcht warrt. Se hett rutfunnen, dat de Schild gor nich mehr bruukt warrt, vunwegen dat de Ozonschicht sik in’n Verloop vun de Tiet wedder verhaalt hett. Dör den Kamp gegen Corda un Reno, de Connar beide utschalten kann, winnt he an Energie dorto (in’t Original as Quickening betekent) un warrt dordör wedder to en jungen Mann, de nich starven kann.
Wiel den Kamp röpt he sien ollen Fründ Ramirez an, de dordör torüch op de Eer kamen deit, sik aver eerstmol in de Nutiet torecht finnen mutt. Connar ünnersöcht mit Louise, wat dat mit de Ozonschicht nu op sik hett un stellt fast, dat de Schild an sik gor nich mehr bruukt warrt. Man, de Bedriever vun den Schild seggt dat nich na, üm jemehrn wichtigsten Born för Profit nich to verleren. In de Twüschentiet is Katana sülvst na de Eer kamen un slutt ok glieks en Partnerschop mit Blake, den Baas vun de Schildsellschop.
Tosamen mit Ramirez un Louise brickt Connar in de Firma in, üm dor den Schildgenerater tweitomaken. Dorbi hebbt se allerhand Gefohren un Gegners to överstahn. Ramirez oppert sik op, dat de annern beiden ut en Fall rutkamen künnt. Connar mutt sik kort vör sien Teel ok noch gegen Katana to Wehr setten. Wohrhaftig winnt he dat Gefecht gegen den legen General un kann opletzt mit de Hülp vun sien Energie den Generater anhollen. De Schild lööst sik op un de Minschen hebbt wedder fre’e Sicht op den Himmel.
Produkschoon
ännernSnittfaten
ännernDe Film is in verschedene Snittfaten rutbröcht worrn [1]:
- de US-amerikaansche Kinofaten
- de düütsche Kinofaten, de üm eenige Gewaltszenen kört worrn is un af 16 Johren freegeven is un en alternativ Enn hett.
- de Renegade-Faten, de in’n Vergliek to de Kinofaten grote Ännern an den Inholt wiest un ahn de GEschicht vun de Buterirdischen utkummt.
- de Special Edition, de gegenöver de Renegade-Faten noch mol ’n beten ännert worrn is.
Dat dat de Renegade-Faten gifft, liggt doran, dat de Speelbaas un de Produzenten kort för Afsluss vun den Film de Rechten an den Film wegnahmen worrn sünd. De Geldgevers vun den Film hebbt den Film na jemehr egen Vörstellen snieden laten. Mulcahy künn de Kinofaten eerst 1995 na sien Ansichten bearbeiten, wo denn de Renegade-Faten bi rutkamen is. 2004 hebbt de Produzenten Panzer un Davis beslaten, noch mol en poor Ännern to maken, de denn as Special Edition rutbröcht weer.
Anner’t Enn
ännernMeist all Kinofatens vun den Film, de in Europa wiest worrn sünd, hebbt en anner’t Enn as de US-amerikaanschen Faten. As Connar un Louise den Schildgenerater tonichten maakt hebbt un an’t Över langs gaht, fraagt Louise, woneem Connar nu hengahn wull. Connor wiest op en Steern an’n Himmel un beide befinnt sik kort later op magische Wiest op Zeist. In de Renegade-Faten is disse Szeen nich wedder bruukt worrn, vunwegen dat de Zeist-Geschicht in de Faten vullstännig weglaten worrn is. De Lüüd, de nich starven künnt, kamt an Steed vun den Planet ut en „verleden Tiet wiet weg“.
Produkschoonsachtergrund
ännernDe Film is to’n gröttsen Deel in Argentinien dreiht worrn. Al in de eersten Phaas vun de Dreiharbeiten weer de Situatschoon twüschen Speelbaas un Geldgevers teemlich anspannt, wat denn dorto föhren de, dat Mulcahy vun de Postprodukschoon utslaten worrn is. ChristophLambert schall vun ümschreven Dreihbook gor nich gefallen hebben un hett versöcht ut de Produkschon uttostiegen. Mulcahy weer mit de Kinofaten so untofreden, dat he op de Premiere al na föffteihn Minutten ut dat Kino rutgahn is. Ofschoonst de Presse bannig slecht weer, hett de Film in de US-amerikaanschen Kinos mehr as 15 Millionen US-Dollars inspeelt. Finanziell is dat bit hüüt de spoodriekste Film ut de Highlander-Reeg
Oorsprünglich schüll Higlander II en Prequel to den eersten Film wesen. Wegen sien snaakschen Geschicht tellt de Film nich to de offiziellen Highlander-Tietlien. Highlander III: The Sorcerer is dorüm ok so dreiht worrn, as harr dat den tweeten Deel nienich geven. Russel Mulcahy weer över den Snitt vun de Geldgevers so frustreert, dat he sik för den Afspann dat Pseudonym „Alan Smithee“ toleggen wull. Ut rechtliche Grünnen weer dat aver nich tolaten.
De Rull vun Ramirez weer in den tweeten Deel anfangs nich plaant. Man, de Geldgevers un ok Christopher Lambert hebbt dorop bestahn, dat Ramirez wedderkamen müss, vunwegen dat se Sean Connery wedder mit dorbi hebben wullen. Plaant weer, dat Flashbacks dreiht warrn schülln, in de Connar un Ramirez na jemehr Verbannen op de Eer ankamt un woans se jemehr ne’en Persönlichkeiten opnehmt. Stuntdoubles sünd in den Film nich veel bruukt worrn. Christopher Lambert un Michael Ironside hebbt vele vun jemehr Stunts sülvst maakt.
Kritik
ännern- Dat Lexikon vun’n internatschonalen Film meen, dat Russel Mulcahy, jüst as in’n eersten Deel, de jüngere Filmhistorie plünnern de, man nich mehr in’t glieke Utmaat de (Böverflachen)-Reizen vun de Videoclip-Ästhetik verfallen weer. De Geschicht weer as dör’nanner dorstellt, man se geev Connery in sien Blangenrull de Mööglichkeit to feine Kummedie-Inlagen.[2]
- Roger Ebert beteken Highlander II as den unverständlichsten Film, den he siet lange Tiet sehn harr, un de meist al utermatig slecht weer. Science-Fiction-Fans vun de nächsten Johrteihten weern sik an den Film as en Deeppunkt vun’t Genre torüch besinnen.[3]
Borns
ännern- ↑ Highlander II – Die Rückkehr op Schnittberichte.com vun’n 6. September 2009; afropen an’n 3. Juni 2011
- ↑ Lexikon vun’n internatschonalen Film, CD-ROM-Utgaav, Systhema, München 1997
- ↑ Highlander 2: The Quickening Roger Ebert an’n 1. November 1991, afropen an’n 5. April 2013
Weblenken
ännern- Highlander II: The Quickening in de Internet Movie Database (engelsch)