Hilliger Rasmus

De hillige Rasmus (* üm 240 in Antiochia; † 303 in Formia) weer en Bischop un is en Märtyrer vun de kathoolsche Kark; he is ok ünner den Naam Elmo oder Ermo bekannt un warrt as Schuulhilligen vun de Seelüüd ansehn.

de Veerteihn Noothelpers mit ehre Attribute

Leven

Vun Rasmus sien echt Leven weet wi nich veel, binah allens sünd Legennen. Rasmus höört to de Hilligen, de op’t mehrst verehrt warrt. Rasmus keem ut Antiochien, wo he ok Bischop weer, doch he müss vun sien Bisdom weg, as ünner Diokletian de Christen verfolgt worrn sünd. Na de Legenn is he op en Barg in’n Libanon trocken, wo he söven Johr lang op wunnersame Wies vun en Raav nehrt worrn is. As em en Engel erschienen is, güng Rasmus na sien Bisdom trüch, wo he kort later fangennahmen worrn is. Se hebbt em grusam foltert, doch he hett dat allens dörstahn. Mit Bistand vun Gott is he wedder freekamen un is na Italien kamen, wo he as Seelsorger in de Gegend vun Formia arbeid. Dor is he denn na de Legenn na söven Johr in en hooch Öller doodbleven. 842 hebbt se siene Gebeen na Gaeta wat noorden Neapel bröcht, vun wegen dat de Sarazenen Formia innahmen hebbt, wo he bet hüüt Patron vun’n Doom is. Dat he as Hilligen verehrt warrt, dat is siet dat 6. Johrhunnert nawiest. Siet üm un bi 1300 warrt he to de Veerteihn Noothelpers tellt. He is de Schuulhillige vun’t Füer, vun wegen dat Füer an Boord vun de Holtscheep en temliche Gefohr weer. Wenn de Seelüüd op jümehr Segels wat Glöhen segen - elektrische Ladungen, de bi swoor Gewitter ut de Masten kemen -, denn segen se dorin den Geest vun’n hilligen Elmo un glöven dat he jüm schulen dei. Dat weer de Grund, dat se dat Glöhen Elmsfüer nömen.

In’n Averglöven vun de Seelüüd is ut Rasmus denn de Herr vun’t Meer un vun de Winn’ worrn un wenn en Seemann över Boord güng, denn wörr seggt: „Den hett de Rasmus haalt“.