Homo heidelbergensis

De Homo heidelbergensis (lat. för Heidelbargminsch) is en utstorvene Aart mank dat Geslecht vun de Minschen. He hett leevt vör 800.000 bit vör 150.000 Johren. He warrt ankeken as de Vörlöper vun den Neanderdaler un, unner Umstänn, vun den Homo sapiens. De Aart stimmt to'n Deel övereen mit den Neanderdaler, man ok mit den modernen Minschen un mit den Homo erectus. Fröher hett he den Naam vun den „Prä-Neanderdaler“ oder vun den „archaischen Homo sapiens“ harrt. Sien Naam Homo heidelbergensis hett he vun den düütschen Anthropologen Hermann Klaatsch kregen. Överresten vun den Homo heidelbergensis sünd funnen wurrn in Afrika, in Asien un ok in Europa. De Fraag is, of düsse Aart en Twuschenform is in de Evolutschoon vun den Minschen, oder of he in Afrika sik fudder entwickelt hett to den Homo sapiens un dor denn an de Stäe vun de annern Minschenaarden treden is.

Heidelbargminsch

Systematik

Ornen:	Primaten
Ünnerornen:	Dröögnesenapen
Böverfamilie:	Ooltweltapen (Catarrhini)
Familie:	Minschenapen (Hominidae)
Tribus:	Hominini
Geslecht:	Homo
Oort:	Homo heidelbergensis

Wetenschoplich Naam

Homo heidelbergensis

Schoetensack, 1908

Ofschoonst dat Överresten gifft, de bit hen to 900.000 Johre oolt sünd un to de Homo heidelbergensis torekent weert, warrt doch annahmen, dat man sik bloß up de Överresten seker verlaten kann, de bit hen to 500.000 Johre oolt sünd. De öllern Överresten weert doch vun en Reeg vun Wetenschopplers betwiefelt.

De Homo rhodensiensis warrt ok to düsse Aart torekent.

Fundsteden binnen Europa
Fundoort	Johr	Tied Fossil	Updecker
Petralona	1960	unbekannt	unbekannt
Arago	unbekannt	unbekannt	Henry de Lumley
Heidelbarg	1907	600.000 Johre	Daniel Hartmann
Siera de Atapuerca	1993	350.000 Johre	unbekannt
Boxgrove	1994	500.000 Johre	Roger Pederson
Gran Dolina	1994	800.000 Johre	unbekannt
Ceprano	1994	max 900.000 Johre	unbekannt

Weblenken

Homo heidelbergensis. Mehr Biller, Videos oder Audiodateien to’t Thema gifft dat bi Wikimedia Commons.