Horbörger Stadtpark

De Horbörger Stadtpark is en 90 Hektar groten Volkspark in Hamborg. De Park liggt in’n Stadtdeel Wilsdörp, Bezirk Horborg.

Historie

De Park is rund üm’n Butenmöhlendiek anleggt worrn, de in dat 16. Johrhunnert för en Watermöhl anstaut worrn is. Siet 1890 is de Diek as Baadanstalt bruukt worrn. Von 1913 af an sünd op dat Gelänn eerste Boarbeiden vörnahmen worrn, de de Baadanstalt in dat Kunzept von’n Volkspark inbunnen hebbt. De Park sülvs hett in’n Mai 1926 apenmaakt. De Stadt Horborg wull dor in de Stadt en Ruum to’n Verhalen schaffen. Dorto sünd ünner annern en Amphitheater, Flächen to’n Liggen un för Gymnastik un 1931 op üm un bi acht Hektar en Schoolgoorn inricht worrn. Dat Kunzept to disse Anlagen keem von’n prüüßschen Goornbodirekter Georg Hölscher. Siene Plaans sünd na sien Dood 1932 von sien Söhn Ferdinand foortsett worrn.

De Bo von’n Horbörger Stadtpark hett to en Beschäftigungsprogramm för Noodstandsarbeiders höört, dat Walter Dudek vöranbröcht hett.

Later is noch Land för den Park toköfft worrn. 1950 is en ehmalig Fabrikgelänn un en Privatgelänn an’n Park anslaten worrn. Dormit verbunnen weren Ümboarbeiden, de trech weren, kort bevör de Internatschonale Goornschau 1953 apenmaakt hett. 1985 bet 1987 sünd dor noch mehr Flächen süden den Butenmöhlendiek tokamen. Dor is nu en Vagelschuul- un Broodrebeed in’e „Langenbeekschen Wischen“.

Tosätzlich is de Stadtpark dör’n olen Horbörger Karkhoff, de vondaag ok as Park bruukt warrt, mit dat Phoenix-Veerdel un dat Stadtzentrum verbunnen.