Bezirk Horborg
De Bezirk Horborg is een von de söven Bezirke von de Stadt Hamborg. De Bezirk liggt in’n Süüdwesten von Hamborg un grenzt in’n Noorden an’n Bezirk Hamborg-Midd, in’n Süden an’n Landkreis Horborg un in’n Westen an’n Landkreis Stood. De beiden Landkreise doot in Neddersassen liggen.
De Bezirk hett 163.771 Inwahners (Stand 31. Dezember 2016) un hett en Fläch von 125,4 km². Baas von dat Bezirksamt is Thomas Völsch von de SPD.
To’n Bezirk höört de Stadtdelen Cranz, Eißendörp, Francop, Good Moor, Horborg, Heimfeld, Huusbrook, Langenbeek, Marmsdörp, Moorborg, Neeland, Neefeld, Neegraven-Fischbeek, Oolwarder, Rönnborg, Sinsdörp un Wilsdörp.
Historie ännern
Bet 1927 hett de Stadt Horborg un denn 1927 bet 1937 de Stadt Horborg-Willemsborg to de prüüßsche Provinz Hannover höört. To’n 1. April 1937 sünd Horborg-Willemsborg un en Reeg Gemenen in dat Ümland dör dat Groot-Hamborg-Gesett Deel von Hamborg worrn.
Hamborg weer denn för korte Tied indeelt in Kreise, Dat Rebeed von’n Bezirk Horborg hett to’n Kreis Willemsborg, Horborg, Süderelv, Finkwarder tellt.
Dör dat hambörgsche Gesett över de Bezirksverwaltung von’n 21. September 1949 is Hamborg in söven Bezirke indeelt worrn. De eersten Bezirksutschüss sünd bi de Börgerschopswahl an’n 16. Oktober 1949 wählt worrn. De Bezirk is denn to’n 11. Mai 1951 billt worrn.
Bet to’n 31. Dezember 2007 weer de Bezirk indeelt in de dree Oortsämter Horborg, Süderelv un Willemsborg. To’n 1. Januar 2008 hett de Bezirk den Stadtdeel Willemsborg an den Bezirk Hamborg-Midd afgeven un de Oortsämter sünd oplööst worrn.
Dat Wapen von de ole Stadt Horborg gellt nich as offiziell Hoheitsteken von’n Bezirk, warrt aver liekers fakener op Drucksaken von de Horbörger Bezirksversammlung bruukt.
Politik ännern
Bezirksversammlung ännern
Na de Wahl to de Bezirksversammlung 2014 is de Vörsitter von de Bezirksversammlung Manfred Schulz von de SPD.
| Johr \ Partei | Tall | CDU | SPD | FDP | GAL/Gröne | Linke | AfD | PRO | FHO |
|---|---|---|---|---|---|---|---|---|---|
| 2001 | 41 | 11 | 15 | 3 | 8 | 4 | |||
| 2008 | 51 | 18 | 21 | 3 | 5 | 4 | |||
| 2011 | 51 | 14 | 26 | 5 | 3 | 3 | |||
| 2014 | 51 | 14 | 20 | 2 | 7 | 5 | 3 |
Kay Wolkau un Isabel Wiest von de Grönen un Anna-Lena Bahl un Barbara Lewy von de SPD sünd in’n Harvst 2014 ut jemehr Frakschonen rut un hebbt sik de Partei von de Ne’en Liberalen anslaten. As in’n September 2015 Bahl ehr Mandaat dalleggt hett, dröff de SPD den Platz nee besetten.
Baas von dat Bezirksamt ännern
- 1945–1954: Alfred Höhlein
- 1954–1957: Werner Stelly
- 1958–1968: Walter Mohr
- 1968–1977: Hans Dewitz
- 1977–1984: Helmut Raloff
- 1984–1990: Jobst Fiedler
- 1991–1998: Michael Ulrich
- 1998–2004: Bernhard Hellriegel
- 2004–2011: Torsten Meinberg
- 2012–2017: Thomas Völsch
Weblenken ännern
Koordinaten:53° 28′ N, 9° 59′ O
