Horst Eylmann

Horst Eylmann (* 1. Dezember 1933 in Olendörp; † 13. Februar 2014 in Stood) weer en düütschen Politiker von de CDU.

Eylmann is 1933 in Olendörp boren un hett na dat Abitur an dat Athenaeum Stood 1955 anfungen Volksweertschopslehr un Psychologie to studeren, aver dat Studium nich afslaten. He hett denn Rechtswetenschoppen in Hamborg un München studeert. 1959 hett he dat eerste juristische Staatsexamen maakt. Na dat Referendariat hett he 1963 ok dat twete Staatsexamen maakt un is Avkaat in Stood worrn. Von 1968 bet 2003 weer he dor ok Notar. He is ans ok Co-Autor von en Kommentar to de Bundsnotarordnung un en Reeg Avkatenhandböker. Eylmann is Maat von’n Opsichtsraad von de Volksbank Stood un 2003 Ehrenbörger von de Stadt Stood worrn.

1968 is Eylmann in de CDU ringahn. Von 1972 af an weer he in’n Raad von de Stadt Stood un in’n Kreisdag von’n Landkreis Stood. Börgermeester von Stood weer he von 1981 bet 1986.

Von 1983 bet 1998 weer he Maat von’n Düütschen Bundsdag. 1983 is he as direkt wählt Kannedaat in’n Wahlkreis Stood wählt worrn un von 1987 denn jümmer as direkt wählt Kannedaat in’n Wahlkreis Stood-Rodenborg I. In’n Bundsdag weer he von 1990 bet 1992 Viez-Vörsitter von’n Utschuss för Wahlprüfung, Immunität un Geschäftsordnung un von 1991 bet 1992 Vörsitter von’n Ünnersökungsutschuss „Kommerzielle Koordinierung un Alexander Schalck-Golodkowski“. Von 1992 bet 1998 weer he Vörsitter von’n Rechtsutschuss. Horst Eylmann weer verheiraadt.