Intendantur Bremen
De Intendantur Bremen weer en Inrichtung von Sweden un dat Kurförstendom Hannover, üm den sweedschen/hannöverschen Besitt binnen de Stadt Bremen to verwalten.
Historie ännern
To dat Arzstift Bremen hebbt fröher de Stadt Bremen un dat Rebeed in’n Noordoosten von Bremen twüschen Werser un Elv tohöört.
As sik anfungen in dat 11. Johrhunnert in de Stadt en Börgerschop rutbillen dee, de sik von de Amtsdregers un Ünnerdanen von de Kark afgrenz, un as dat Bremer Stadtrecht opkamen dee, hebbt sik de Influsssphären von Arzbischop un Stadt bilütten trennt. Gegenöver de Stadt un ehren Besitt, de von’n Bremer Raad regeert worrn is, hebbt sik de Doombezirk un de Rebeden von dat Arzstift buten de Stadt afgrenzt, de je en egen Recht un Gerichtsborkeit harrn.
An’t Enn von’n Dörtigjohrigen Krieg is 1646 Bremen Rieksstadt worrn un 1648 keem dat Arzstift Bremen an Sweden un is to dat Hartogdom Bremen worrn.
Na de Grote Redukschoon von 1680 hett de Generalguvernör von de vereenten Hartogdömer Bremen un Veern, Henrik Horn, 1683 Erich Prytz as eersten bremen-veernsche Intendant in Bremen insett, de de Göder to verwalten harr, de dör de Redukschoon an dat Bremer Doomkapittel un de Ünnerstiften trüggfullen weren. 1712 sünd de Hartogdömer Bremen un Veern von Däänmark besett worrn un 1715 an dat Kurförstendom Hannover wesselt.
Dör den Rieksdeputatschoonshauptsluss is de Doombezirk 1803 an de Stadt Bremen fullen. De Intendantur is oplööst worrn. De Opgaven von de Intendantur Bremen, de bi Hannover bleven sünd, sünd an dat Gogericht Achem gahn. Dor hett de Amtsschriever Heinrich August Wilhelm Chüden düsse Opgaven övernahmen.
Intendanten ännern
- 1683–1690: Erich Prytz
- 1690–1716: Johann Burmeister
- 1717–1724: Caspar Friedrich Renner
- 1724–1732: Hermann Friedrich Ulrichs
- 1732–1741: Paul Meier
- 1741–1746: Heinrich Burchard Stegemann
- 1747–1791: Johann Christian von Danckwerth
- 1792–1803: Theodor Olbers