Intermediär (Genetik)

De Utdruck intermediär (vun’t lat. intermedius „de Dortwüschenliggen“) warrt in de Genetik to’n Beschrieven vun’n Arvgang bruukt.

In de Genetik warrt ünnerscheedt twüschen dominant/rezessiv un intermediär Verarven. Beide Mööglichkeiten kamt vör, wenn dat Arvgoot heterozygot is, wenn also dat Gen för en sünnere Egenschop in twee ünnerscheedliche Oorden (Allelen) vörliggt. Bi den dominant/rezessiven Arvgang sett sik alleen dat dominante Allel dör (in’n Phänotyyp). Man, bi den intermediären Arvgang, warrt de Egenschoppen mitenanner vermischt un en Markmol entsteiht, wat vun beide Allelen tohopen billt warrt. En Plant, dat en Arvinformatschoon för rode as ok för witte Blöden hett, warrt na en intermediären Arvgang en rosa klöörte Blööt opwiesen.