Isoseiste

Isoseisten sünd Isolienen, de Öörd mit glieke (ganztallige) Intensitäten vun en Eerdbeven mitenanner verbinnt.

De Intensität warrt na de Mercalliskala oder vundaag na de moderneren MSK-Skala bestimmt un normalerwies över Fraagbagens dör de Inwahners böhrt. De Intensität baseert op dat egen Föhlen un Hören vun Utwirken vun en Eerdbeven un op de subjektiven Inorden vun den Schaden, de dorbi an en elk sünnern Oort tostannen kamen is. Wiel de Utwirken vun dat Wackeln bi en Eerdbeven mit den Afstand vun’t Epizentrum afnimmt un bito ok noch en grote Tall vun annere Ümstännen, as t. B. de Heerdvörgang, de Deep vun’t Hypozentrum oder de Egenschoppen vun den Ünnergund un Bodden an elk Steed, afhangt, is de Intensität en Grött, de afhangig is vun den Oort. Se is dorüm nich mit de Magnitude vun en Eerdbeven to verwesseln.

De sünnere rüümliche Verdelen vun de Intensitäten in en Rebeet warrt in so nöömte Isoseistenkorten dorstellt. Vun wegen de Afhangigkeit vun’n Heerdafstand stellt sik de Isoseisten jümmers as slaten Lienentöög üm dat Epizentrum rüm dor, de ut de lokal angeven Intensitäten interpoleert warrt. De Form un dat Utsehn vun disse Lienentöög hangt vör allen vun den Heerdvörgang af, de bestimmt, woans de freesett’e seismische Energie afstrahlt warrt, un von de Egenschoppen vun’n Bodden, de fastleggt, woans de seismischen Bülgen in’n Ünnergrund överdragen warrt un sik utbreden künnt. En Influss hett aver ok de Inwahnerdicht un de generelle Boddenunroh, de op dat subjektiv Föhlen vun dat Wackeln inwirken deit. Dicht bi en Straat mit vele Lastautos kann en Minsch weniger vun en Beven marken, as wenn dat ümto afsluut ruhig is.

De verwennten Skalen kennt blots ganztallig Weerten, dorüm gifft de innerste Isoseite togliek ok den Weert för de Gröttstintensität I₀ an. Ut de Isoseistenkoort kann man toeerst mol op de Laag un Positschoon vun dat Epizentrum torüchsluten, dat jo binnen de de innersten Lien liggen mutt. Man de Afstand vun de Isoseiten geevt togliek ok en Insicht över de Deep vun dat Hypozentrum un verlööft ok in’n Rahmen vun de Nauigkeit, welke de subjektiven Angaven hebben künnt, ok en poor Annahmen över dat Utbreden vun de Bülgen in’n Ünnergrund ok in’n Betog op geoloogsch Strukturen.

Literatur

• Hans Berckhemer: Grundlagen der Geophysik, Wissenschaftliche Buchgesellschaft 2002, ISBN 978-3-534-13696-4