Johann Ernst Rist

Johann Ernst Rist (* 15. Mai 1637 in Wedel; † 22. Oktober 1696 in Bremervöör) weer en düütschen Verwaltungsbeamten.

Rist is 1637 as dat öllste von fiev Kinner von Elisabeth, borene Stapel (* vör 1609-27. Juli 1662), un den Pastoor Johann Rist (8. März 1607-31. August 1667) boren. He hett sik 1652 an de Universität Rostock inschreven. Von 1653 bet 1656 weer he op dat Akademische Gymnasium in Hamborg. 1656 hett he sik an de Universität Helmstidde inschreven un 1658 an de Universität Leiden. Vör 1663 hett he sik en Tied lang in Kiel ophollen.

He is 1670 von Carl Gustav Wrangel as Verwalter un Amtmann för dat Slott un dat Amt Bremervöör insett worrn. Woneem Rist sik in de Tied ophollen hett, as Bremervöör von 1675 bet 1680 na’n Bremen-Veerner Feldtog von Truppen von dat Förstbisdom Mönster besett weer, is unbekannt. Nadem de Besatters aftagen sünd, is Wrangel sien Lehn an de Kroon von Sweden trüggfullen. Sweden hett Rist denn aver as königlichen Amtmann wedder insett. 1680 harr he interim ok dat Amt as Landsyndikus in Bremen-Veern.

1685 hett Rist den Börgermeester Bremer in Bremervöör den eenstelligen Hoff Freedag för 400 Rieksdaler afköfft. Ünner Rist is 1690 ok dat Jordebook tohoopstellt worrn, dat de Rechten un den Besitt in dat Amt Bremervöör vertekent.

Rist weer verheiraadt mit Anna Judith Kröger († 1696). De beiden harrn de Kinner Ilse Judith (1674-3. August 1750), Johann Hinrich (* 1678), Gottfried Christian (1680-1. Mai 1738), Carl Ernst (* 1683), Susanna Maria (* 1689) un Gustav Friedrich (1684-1721). Rist is in de Liborius-Kark in Bremervöör begraven.

Warken

• Die Kaiser des Juliani. Das ist, Eine anmuhtige Satyra oder Schimpfgedichte des Abtrünnigen Kaisers Juliani. Hamborg 1663
• Bericht vom Zustande des Herzogtums Bremen und Verden, wie solcher bey Ertzbischöflichen und nachmals Kgl. Schwedischen Zeiten qua statum iuris publici gewesen und noch jetzt ist. 1694
• Die Edelste Eitelkeit, oder, Abgenöthigte Vertheidigung nicht nur der Geomantia in genre, besondern auch in Specie: worinnen durch ohnwidertrebliche Gründe erweisen wird. 1704
• Suecus mundo medicinam faciens, sive, tractatus historico politicus de Suecieaæ regum pro salute Europa bella atque pace gloriosissime per secali decursum susceptis et actis expeditionibus. Stood 1707