Johann Friedrich Schröter (1786–1850)
Johann Friedrich Schröter (* 11. Juni 1786 in Sankt Jürgen; † 20. August 1850 in Leendaal) weer en düütschen Verwaltungsbeamten.
Schröter is 1786 as Söhn von Ahlke Lankenau (1762–1837) un den Amtmann un Astronoom Johann Hieronymus Schröter (30. August 1745–29. August 1816) in Sankt Jürgen boren.[1] Siene Öllern weren nich verheiraadt, aver Schröter hett sien Söhn kort na de Geboort adopteert. 1796 is Karl Ludwig Harding Schröter sien Optrecker worrn.
Nadem dat Kurförstendom Hannover 1810 Deel von dat Königriek Westfalen worrn is, hett Schröter sien Vader sien Steed as Amtmann von dat Amt Leendaal verloren. Dat Königriek Westfalen hett de Verwaltung nee organiseert un dat Amt ümwannelt in den Kanton Leendaal. Wilhelm Olbers hett sik dor mitt för insett, dat Johann Friedrich Schröter as Kantonsmaire von dissen Kanton insett worrn is.[2] Sien Vader kunn so mit siene Studien an de Steernwacht Leendaal wiedermaken. As de Franzosentied toenn weer, is de Vader wedder Amtmann worrn. Schröter sülvs hett wieldes Juristeree studeert un 1816 sien Dokter maakt. Na’n Dood von sien Vader is Schröter an’n 1. September 1817 na Borgdörp gahn un is dor denn Amtsassesser bi dat Amt Borgdörp worrn. En Deel von de Instrumente von sien Vader, de nich na Göttingen gahn sünd, hett he dor hen mitnahmen.
1821 is he as Amtsassesser in dat Amt Neenborg versett worrn. Nadem Amtmann Burchhard Ludwig von der Decken 1834 doodbleven is, is Schröter to’n Titulär-Amtmann opstegen un hett von 1834 bet 1837 dat Leid över dat Amt övernahmen. He is aver keen richtigen Amtmann worrn un harr dat Leid jümmer blots kommissarsch.
Schröter weer verheiraadt mit Charlotte Friederike Kirchhof (1792–1865).[1] De beiden harrn acht Kinner: Hieronymus (1812–1845), Elisabeth (fröh doodbleven), George (1816–1860), Wilhelm (1. Dezember 1818–8. Oktober 1896)[1], Heinrich (1821–1885), Adelheid (* 1834), Charlotte (* 1831) un Albertine (1834–1860).
