Johannes Thingnes Bø

Johannes Thingnes Bø (* 16. Mai 1993 in Stryn) is es norweegsch Biathlet. He tell to de gröttst Talenten vun sien Sports, is dreefack Weltmeester un is mehrfack Jögd- bzw. Juniorenweltmeester. Af un to nimmt he ok an Langloopwettbewarfen deel. In‘ Januar 2013 geev he sien Debüt in den Biathlon-Weltcup un kunn in disse hööchste Rennserie bitlang 20 Mal winnen – mit 20 Johren is he todem de jüngste Weltcup-Sieger siet Mark Kirchner 1991 un mit 21 Johren de jüngste Sprintweltmeester siet den Titel vun Kirchner in dat Johr 1990. All in sien tweet Weltcupsaison kunn Bø den darten Platz in de Gesamtwertung haalen.

Johannes Thingnes Bø 2012

Persönlich Achtergrund

Bø is dat tweetjüngste Kind vun Klemet Bø und Aslaug Hildegunn Thingnes Bø (beid * 1957); he hett dree Bröers un een Süster. Sien Moder bedrifft in Stryn en eegen physiotherapeutische Praxis, sien Vader is in de Melkveehhhollen tätig, sien knapp fiev Johr öllere Bröer Tarjei is as Olympia- un Gesamtweltcupsieger as ok mehrfack Weltmeester ebenfalls bannig spoodriek Biathlet. De Sportjournalist, Moderator un Fotograf Harald Endre Thingnes is Johannes sien Unkel vun moderssiet. He hett de wiederführen School (Stryn vidaregåande skule) in sien Heimatoort besöcht un truck in‘ Mai 2012 nah Lillehammer, wo neben Tarjei ok völ anner norweegsch Biathleten leven un traineeren. Dor hett he sück an de Hoochschool Lillehammer inschreeven.

Sportlich Loopbahn

Anfänge

Bø speel tonächst af sien fievt Levensjohr Football un hett dat dor bit in de Kreisliga schafft. As he mit 16 Johren up de wiederführen School wesseln dee, wull he dor oorsprünglich ok Football as Sport-Wahlfack wählen. Sien Öllern hemm hüm aber dorvan övertüügt – ok ünner den Indruck vun den Spood vun sien Broer Tarjei –, een Maand lang Biathlon uttoprobeeren. An dat Enn‘ vun disse lütt Periood hett he sück all twee Titel bi de norweegsch Jöögdmeesterschapen in‘ Sömmerbiathlon 2009 haalt un konzentreer sück dornah blots noch up Biathlon. In de Folge gull Bø as völverspreeken Talent un groot Nahwusshaapen un he wunn tallriek wiedere Juniorenrennen. Bi de in Åmot utdragen norweegsch Meesterschapen 2010 belegg he an‘ 9. April in‘ Sprint över 10 Kilometer mit 01:51 Minüüt Rückstand woll blots den teihnten Platz, weer aber binnerhalv vun dit Dezett blots een vun twee Athleten ahn Scheetfehler un mit blots 16 Johren de jüngste Biathlet, de je bi de Seniorenmeesterschapen en so hooch Platzeeren recken kunn.

Eerst Winter up internatschonale Bühne (2010/2011)

To’n Uptakt vun de Saison 2010/11 geev he an‘ 27. November 2010 in Beitostølen sien Debüt in‘ IBU-Cup un wunn mit den 28. un den 16. Rang in twee Sprintrennen glieks eerste Punkte. Dat bleeven allerdings för mehr as twee Johren sien eenzigen Insätze.

Över Expertenkrinken herut rück he eerstmals in dat Blickfeld vun dat apenlich Interesse un de Medienberichterstattung, as Tarjei an‘ 10. Dezember 2010 in‘ Ansluss an sien eegen eerst Weltcupsieg in Hochfilzen in en Interview seggt hett:

„Aber ich weiß, da gibt es noch einen besseren [als ihn selbst]: Meinen jüngeren Bruder Johannes. Da hab ich schon Schiss, wenn er mal weltcuptauglich ist. Der ist wirklich gut! Ich hoffe schon, dass wir irgendwann in der Staffel zusammen laufen können, aber im Einzelwettkampf wird er mal ein harter Konkurrent.“

De Norges Skiskytterforbund (Norweegsch Biathlon-Verband) hett Bø kört dorup för den Kader upstellt, de dat Land in‘ Februar 2011 bi dat European Youth Olympic Festival in dat tschechisch Liberec vertreeden sull. Dor wunn g´he sowohl mit de Mixed-Staffel as ok in dat Eenzel jewiels de Sülvermedaille un den Sprint up sien Naam schrieven. Trotz veer Straafrunnen hett he bi dit Rennen wiels de Slussrunn 17 Sekunnen uphaalt un wunn. Anfang März vun dat glieker Johr hett he sück doröver herut noch twee norweegsch Juniorenmeestertitel haalt un an‘ 25. März wunn he in Dombås den Supersprint vun de natschonale Rennserie Norgescup in de Kategorie U-18 un seker sück mit söben Daagsiegen ok de Gesamtwertung. Dormit harr he ok den olden Rekord vun Ole Einar Bjørndalen braaken, de bi sien Juniorengesamtsieg 1990/1991 fiev Eenzelerfolge fiern kunn. Enn‘ vun den Maand is he in Målselv to sien tweet norweegsch Meesterschapen antreeden, dor reck he sowohl in‘ Sprint as ok in dat Eenzel över 20 Kilometer un mit de Staffel den sössten un in de Verfolgung den negenten Platz.

Eerstmals Juniorenweltmeester (2011/2012)

Ok dat Johr 2012 fung spoodriek för Bø an. An‘ 23. Januar hett man hüm för de kört dornah anfangen Biathlon-Junioreneuropameesterschapen in dat slowaaksch Osrblie upstellt. Dor wunn he en kompletten Medaillensatz un reck in‘ Sprint Platz 8. Wenige Week dorup fier he bi sien eerst Juniorenweltmeesterschapen sien Karrierehööchtpunkt bit dorhen. As Favorit verpass he in dat Eenzel över 12,5 Kilometer den Postestplatz as Veert blots um 19 Sekunnen – un dat, ofschons he wegen sien Scheetfehler mit söss Straafminüüt beleggt wurrn weer. Tosommen mit Erling Aalvik, Marius Hol un Vetle Sjåstad Christiansen reck he aber dat Staffel-Gold un ansluutend ok noch Sprint und Verfolgung. Bi dat Verfolgungsrennen keem Bø, de sück dree Scheetfehler leisten, knapp twee Minütt vör den tweetplatzeeren un fehlerlos Matthias Dorfer in’t Teel. Mit sien dree Goldmedaillen weer he dormit de spoodriekste Athlet bi disse Wettkämpen.

Bi de norweegsch Meesterschapen in Trondheim to’n Afsluss vun de Saison weer Platz 4 in den Massenstartwettbewarf sien best Ergevnis.

Vördere Platzeeren in‘ IBU-Cup un Weltcupdebüt (2012/2013)

In‘ April 2012 wurr he mit man blots 18 Johr in den A-Natschonalkader för den Weltcup 2012/2013 upnommen un weer dormit dat tweetjüngst Mannschapsliddmaat vun all Tieden. In‘ Sömmer vun dat glieke Johr gelung hüm dat bi eenig Testrennen eerstmals, Ole Einar Bjørndalen, Emil Hegle Svendsen un Lars Berger zu besiegen. To Anfang vun den folgen Winter full Bø aber wegen en Viruserkrankung u tun de norweegsch Sportchef Per Arne Botnan hett seggt, dat he dorum weder för den Weltcup-Uptakt in Östersund noch för den eersten IBU-Cup in Idre upstellt würr. En Insatz bi den tweeten IBU-Cup in Beitostølen weer aber düchtig wohrschienlich. Dat düer denn aber doch länger as vermoot un Johannes Thingnes Bø kehr eerst an‘ 5. Januar 2013 to’n veerten IBU-Cup in dat eestnisch Otepää in dat Team torüch, as he in dat Eenzel över 20 Kilometer mit söss Scheetfehlern un en Rückstand vun 05:04 Minüüt den 23. Platz belegg. Dat weer eerst sien dart Insatz överhoopt in disse Wettkampreeg. An den folgen Dag reck he in‘ Sprint ahn Scheetfehler den tweeten Rang – mit 10,2 Sekunnen Rückstand up den Winner Magnus Jonsson ut Sweden. Anstatt ok to’n nächsten Cup nah Ostrow wieder to reisen, traineer he in Vörbereiten up de in Obertilliach utdragen Biathlon-Juniorenweltmeisterschaften in Norwegen. Sien in dat Vörfeld sett Teelen för dissen Saisonhööchtpunkt muss he wegen sien gesundheitlich Probleme in de Saison aber nee anpassen; sien Teel weer nu Staffelgold un een Eenzelmedaille. He hett sück dorhengahnd ütert, dat he woll eerst kört nah de Juniorenweltmeesterschapen weer sien vull Leistungspensum würr afropen können.

Wegen sien good Leistungen in‘ IBU-Cup, mehrere Utfälle in de Stammformatschoon (ünner annern Emil Hegle Svendsen un Ole Einar Bjørndalen) un to dat Vörbereiten up de Juniorenweltmeesterschapen kunn Bø an‘ 20. Januar 2013 bi dat Staffelrennen in dat italieensch Antholz sien Weltcupdebüt fiern. He weer achter Lars Helge Birkeland un Alexander Os dart Starter vun dat Quartett, dat Henrik L’Abée-Lund afsluuten dee. Mit twee Nahladern in dat liggend un sogor een Straafrunn in dat stahnd Scheeten füüg he sück aber in dat dörwussen Gesamtbild vun de kumplett nee upstellt norweegsch Mannschap in, de blots up den 10. Platz keem.

In dat eerst Rennen vun de Juniorenweltmeesterschapen Enn‘ Januar 2013, den Sprint, wunn Bø mit een Scheetfehler de Sülvermedaille – 4,9 Sekunnen achter den stark loopen Russen Alexander Wiktorowitsch Loginow|Alexander Loginow]], up de he aber noch 1,5 Kilometer vör Rennenn‘ noch en Vörsprung vun knapp acht Sekunnen harr. De Bronzemedaille seker sück Loginow sien Landsmann Maxim Zwetkow. An den dorupfolgen Dag keem dat bi de Verfolgung to en Rokaad vun de dree Eerstplatzeerten, in de Bø sien veerten Weltmeestertitel haalen dee. In dat Eenzelrennen keem he blots up Platz 9 un Loginow wunn sien tweeten Titel. An‘ letzten Dag vun de Wettkämpe führ he – as tovör as Teel utgeeven – de norweegsch Staffel as Slusslöper to de Titelverteidigung un hett ansluutend seggt: „Das ist das wichtigste Rennen. […] Wenn wir im Sommer trainieren, ist eines unserer Ziele, in diesem Wettkampf Gold zu gewinnen.“

Nah dat krankheitsbedingt Utlaaten vun de Junioreneuropameesterschapen in Bansko hett Bø an‘ 28. Februar mit den Sprint in Oslo sien tweet Weltcuprennen bestreeden. Wiels sück mit Loginow un Zwetkow sien starkste Konkurrenten vun de Juniorenwettbewarfen ünner de best Teihn platzeeren kunnen, muss he sück allerdings mit een Scheetfehler un 01:39 Minüüt Rückstand up den Sieger – sien Bröer Tarjei – mit Rang 28 tofräe geven. Twee Daag later hett he sück in dat Verfolgungsrennen up den 25. Platz verbetern, hett denn aber up de Deelnahm an den Massenstart verzicht. An de norweegsch Juniorenmeesterschapen hett he nich deelnommen, dorför aber an den vörletzten Weltcup in Sotschi. De Uptakt in dat russisch Rennweekenn‘ up de düchtig löperisch ansprööksvull Strecke vun de Olympisch Winterspelen 2014 verleep för Bø ganz schlecht, as he dat Eenzelrennen mit över söben Minüüt Rückstand blots up Rang 68 afsluuten kunn. Fehlerfree bleev he dorgegangen in dat Sprintrennen un keem dormit up Platz 20 to wiedere Weltcuppunkte. Bi dat afsluuten Staffelrennen an‘ 10. März wurr Tarjei Bø sien Wunsch ut den Dezember 2010 wohr. Tosommen mit sien jüngere Bröer in en Staffel starten to können. Johannes övergeev as dart Löper an hüm un dat norweegsch Quartett verpass up den veerten Rang blots knapp de Podestplätze. An‘ 16. März 2013 gung sluutend sien eerst Weltcupsaison in Chanty-Mansijsk. Woll gelung hüm mit Rang 20 in de Verfolgung en düütlich Verbeetern um 17 Plätze in‘ Vergliek to’n Sprint vun den Dag vörher – dat he aber trotz veer fehlerfree Scheetinlaagen noch en Rückstand vun över twee Minüüt harr, hett sien Defizite in dat Loopen apen leggt. För den afsluuten Massenstart kunn he sück nich qualifizeeren. An dat Enn‘ vun de Saison harr he sück in den Gesamtweltcup up Rang 59 inreeht.

To’n Saisonafsluss in Dombås wunn Bø sien eersten Medaillen bi norweegsch Seniorenmeesterschapen – twee sülvern in Individualrennen un den Titel mit de Staffel Sogn og Fjordane SSK.

Dörbröök in‘ Weltcup (2013/2014)

Kört vör Anfang vun dat Sömmertraining hett sück Bø in de letzt Aprildaag 2013 bi en Fohrradunfall up den Nordsetervegen in Lillehammer besehrt un sück dat Slötelbeen braken. Doruphen muss he sien Vörbereiten up de Weltcup-Saison 2013/2014 um mehrere Weeken verschuven un kunn eerst in‘ August weer mit dat Intensivtraining anfangen. Midden November weer de Biathlon-Weltelite to den offiziellen Saison-Start in dat norweegsch Sjusjøen to Gast. Bø wies sück good verhaalt un reck in den Sprint en achten un in‘ Massenstart Platz 7. In‘ Vörfeld vun de Veranstaltung hett Per Arne Botnan, Sportdirekter vun den norweegschen Biathlon-Verband seggt:

„Er muss im Schießen noch stabiler werden. Aber an einem maximalen Tag mit voller Ausbeute [beim Schießen] kann er ein Rennen im Weltcup gewinnen. Er sollte das jetzt noch nicht als Ziel haben, aber es kann passieren.“

Glieks dornah geev de norweegsch Trainer Espen Nordby Andersen de Kadernomineeren för de eerst dree Weltcups vun den Winter 2013/2014 bekannt, dornah sull Bø bi de tweet Statschoon in Hochfilzen togunsten vun Lars Berger utsetten.

Ok in dat eerst Weltcuprennen vun den Winter, de Mixed-Staffel in dat sweedsch Östersund, hett man Vetle Sjåstad Christiansen un Tarjei Bø vörtrucken, so dat Johannes an‘ 28. November bi dat Eenzel-Rennen in de nee Saison starten dee. Nah veer Scheetfehlern muss he sück mit den 27. Platz tofräe geveen, sammel aber weer Weltcuppunkte. Twee Daag later wies he in‘ Sprint sien bit dato starkste Leistung in‘ Weltcup un leep dank en flink Slussrunn as best Norweger up Platz negen; in de Top Ten weer he todem de eenzige Athlet mit twee Scheetfehler. Dat Verfolgungsrennen hett man denn aber wegen to starken Wind afseggt. Bø sien Konkurrenzkamp mit den an sien Stäe loppen Berger wurr wiels den Weltcup in Hochfilzen noch scharper, nahdem de unverwacht den Sprint winnen un sück so för sien längerfristige Präsenz in de eerst Mannschap Warf bedrieven kunn. Een Week later an‘ 14. Dezember weer Bø bi de darte Statschoon in Le Grand-Bornand aber baben up, as he sien eerst Weltcupsieg fiern kunn: He bleev in Afwesenheit vun sien Bröer Tarjei, Ole Einar Bjørndalen un Emil Hegle Svendsen in‘ Sprint ahn Scheetfehler, kunn sück mit en stark Loopleistung an de Tipp vun dat Feld setten un harr in’t Teel 32,9 Sekunnen Vörsprung up Ondřej Moravec un sogor 37,1 Sekunnen up den bit dorhen de Saison un de Vörjohren domineeren Dartplatzeerten Martin Fourcade. An den nächsten Dag hett he denn ok de Verfolgung wunnen un weer dormit in de Weltspitze ankommen.

Wegen sien övertüügend Leistungen wurr Johannes Thingnes Bø as Liddmaat vun dat sössköppig norweegsch Mannlüüdteam för de Olympisch Winterspelen 2014 in Sotschi nomineert. De eerst Wettbewarf, de Sprint, den de Teamkolleeg Bjørndalen wunn, verleep för hüm aber overhoopt nich good mit. Mit veer Scheetfehler un blots dörsnittlich Loopleistung reck he bi dit Rennen blots Platz 55 un kunn sück dormit man blots knapp för den Verfolger qualifizeeren. In de Folgerennen wurrn aber insbesünnere sien Scheetleistungen beter un in‘ Massenstart keem he sogor up Platz 8. In den Massenstart wurrn hüm aber Bjørndalen un Svendsen (de den Massenstart wunnen harr) vörtrucken. An den vörletzten Dag vun de Spelen bill he gemeensam mit sien Bröer as ok Bjørndalen un Svendsen den norweegsch Staffel, wo he good Leistungen in’t Scheeten un Loopen afropen kunn. Up en seker Medaillenkurs liggend hett sück Slusslöper Svendsen in dat letzt Scheeten aber to völ Fehler leist, so dat de norweegsch Staffel blots up den veerten Platz lannen dee.

Nah de Olympisch Winterspelen hett Bø Anfang März up en Start bi de Biathlon-Juniorenweltmeesterschapen 2014 in Presque Isle, USA, verzicht, um sück up de restlichen Weltcuprennen vun de Saison to konzentreeren. Bi den vörletzten Weltcup vun de Saison in Kontiolahti wunn he bi düchtig schlecht Windbedingungen all dree Weltcuprennen un verbeter sück dormit up Platz 2 in de Gesamtwertung. Dissen Platz kunn he bi de letzt Weltcupstatschoon an‘ Holmenkollen in Oslo nich hollen (he keem dor nich ünner de best Teihn un muss noch Emil Hegle Svendsen an sück vörbitrecken laaten), liekers reck he sowohl in de Gesamtwertung as ok in‘ Sprintweltcup jewiels an dat Enn‘ vun de Saison den darten Platz, womit he in de Weltspitze ankommen weer.

Weltmeester (2014/2015)

To de Vörbereiten up de nee Saison is Bø in‘ Sömmer 2014 bi de bekannt Blinkfestivalen antreeden, in dessen Rahmen in Sandnes un umto mehrere Skilangloop- un Biathlon-Wettbewarfen up Rullskiern utdragen wurrn. An‘ 31. Juli hett he dorbi in Lysebotn dat Skilangloop-Barguprennen över en Distanz vun söben Kilometern mitmaakt un keem dorbi up den sössten Platz – direkt achter sien Bröer Tarjei un vör Skilangloopprofis as bispeelswies Petter Northug, Federico Pellegrino, Roland Clara, Finn Hågen Krogh un Devon Kershaw.

Bi dat eerst Weltcuprennen vun de Saison 2014/2015 – de Mixed-Staffel in Östersund – keem Bø an‘ 30. November noch nich to’n Insatz. Up de tweet Statschoon in Hochfilzen keem he in‘ Sprint all to sien sössten Weltcupsieg. Sien nich so konstant Scheetleistungen hemm hüm in disse Saison aber eenig good Platzeeren köst. Eerst in‘ Januar 2015 gelung hüm dat, sien Leistungen up hooch Niveau to hollen. Mit de Staffel muss he sück in Oberhof blots den Russen slahn geven, in‘ Sprint verpass he as Veert knapp dat Podest. Weniger as een Week later führ he de norweegsch Staffel up de nächst Weltcup-Statschoon in Ruhpolding to’n Sieg un kunn ok den Sprint up sien Naam schrieven. Den afsluuten Massenstart harr he wohrschienlich ok wunn, denn eerstmals in disse Disziplin bleev he in all veer Scheetinlagen ahn Fehler. In de dart Loipen-Runn is aber de vör hüm in Führung loopen Jakov Fak to Fall kommen; Bø kunn nich mehr utwieken un is ebenfalls stört. En dordör notwennig Skiwessel hett hüm denn Tiet köst un he keem dornah nich mehr an de Führenden heran un belegg denn den 10. Platz. Dat geev ansluutend noch wiedere Siege mit de Staffel in Rasen-Antholz as ok mit de Mixed-Staffel in dat tschechisch Nové Město na Moravě un mehrere Top-Ten-Platzeeren.

Anfang März is Bø mit de norweegsch Mannschap to de Biathlon-Weltmeesterschapen 2015 nah Kontiolahti reist. In dat eerst Rennen dor, de Mixed-Staffel, bleev he ahn Fehler. Een Straafrunn dör Tiril Eckhoff verhinner aber en beter Ergevnis as Rang dree. De Die Bronzemedaille weer dormit dat eerste Edelmetall vun Johannes Thingnes Bø bi de Weltmeesterschapen vun de Senioren. Twee Daag later hett he sück in‘ Sprint woll een Fehler bi den stahn Anslag leist, harr aber Glück, dat de annern windbedingt noch schlechter scheeten deen. Mit sien good Loopleistung seker he sück den Titel vör den Kanadier Nathan Smith un sien Bröer Tarjei. Mit 21 Johren weer he dormit de jüngste Sprintweltmeester siet den Sieg vun Mark Kirchner 1990. De bannig good Utgangspositschoon kunn Bø in dat Verfolgungsrennen nich bruukbor ümsetten. Ditmal sünd hüm to völ Scheetfehler ünnerloopen un he keem blots up Rang 31. In dat Eenzel reck he weer en 7. Platz un mit de norweegsch Staffel wunn he denn noch de Sülvermedaille achter de Mannschap ut Düütschland.

Wiel he ok to de letzt Weltcupstatschoon nah Chanty-Mansijsk reisen dee, hett he up en Deelnahm an de norweegsch Meesterschapen in Sirdal verzicht. In den Gesamtweltcup keem he an’ Enn‘ up den 5. Platz. Dissen Platz reck he ok in den Eenzel- und Sprintweltcup vun de Saison.

Weltcuptweet un Düppelweltmeester (2015/2016)

De Vörbereitung up sien veerte Weltcupsaison verleep för Johannes Thingnes Bø ahn Probleme. Van‘ 21. bit 23. August 2015 hett he an de norweegsch Sömmerbiathlon-Meesterschapen in Os deelnommen, wo Platz veer in de Verfolgung sien best Ergevnis weer.

De Saison fung för hüm an‘ 29. November 2015 in Östersund, wo he mit de Staffel glieks winnen dee. Insgesamt gelungen Bø in de Saison söben Weltcupsiege un söss wiedere Podiumsplatzeeren. Mit 820 Punkten belegg he sluutend den tweeten Platz in‘ Gesamtweltcup achter Martin Fourcade. Todem reck he den darten Platz in‘ Verfolgungsweltcup un kunn sien darten Platz in den Sprintweltcup ut den Winter 2013 / 2014 wedderhaalen.

Hööchtpunkt vun disse Saison weern in‘ März 2016 die Weltmeesterschapen in Oslo. Gliek in den eersten Wettkamp seker he sück mit de norweegsch Mixed-Staffel de Bronzemedaille. Wiels he ansluutend sowohl in den Sprint, as ok in de Verfolgung un in‘ Eenzel jewiels blots up den veerten Platz keem, wunn he an‘ 12. März mit de Staffel vör dat düütsche Quartett. Blots een Dag later wies he in den Massenstart en unverwacht good Scheetleisitung un wurr nah en Duell up de letzt Runn mit 2,8 Sekunnen Vörsprung up Martin Fourcade Weltmeester.

Saison 2016/2017

De Saison 2016/17 fung mit Platz 2 in dat Eenzel vun Östersund bannig good an. Ok in Pokljuka reck he in Sprint den 2. Platz. In Oberhof up de veerte Statschoon is he nich antreeden und keem in dat nee Johr in Ruhpolding nich besünners good torecht, wunn aber den Massenstart vun Antholz vör Quentin Fillon Maillet un Anton Schipulin. An dat Enn vun de Saison reck he Platz 3 in den Gesamtweltcup.

Bi de Biathlon-Weltmeesterschapen 2017 reck he in den Sprint den tweeten Platz achter Benedikt Doll un hull dissen Platz ok in de ansluuten Verfolgung, blots dat jetzt Martin Fourcade vör hüm leeg. In‘ Eenzel reck he den 8. Platz, in‘ Massenstart aber to’n darten Mal den 2. Platz, ditmal achter Simon Schempp. De beid norweegsch Staffeln, in de he insett weer, reck jewiels blots den 8. Platz.

Utteknungen un Ehrungen

In dat Öller vun 18 Jahren wurr Johannes Thingnes Bø an‘ 22. Januar 2012 mit den Karolineprisen uttekent. Disse Utteknung gellt as renommeertest Nahwussspries vun Norwegen un wurrd Schölern vun wiederführen Schoolen tospraaken, de sück entweder in‘ Sport, in de Musik oder in de Kunst besünners hervördaan hemm u nto glieker Tiet bannig good Schoolleistungen vörwiesen können.

An‘ 23. Dezember 2013 geev de Jury vun de siet 2002 jährlich utricht Idrettsgallaen (de.: Sportgala) Bø sien Nomineeren in de Kategorie „Dörbröök vun dat“ bekannt. Sien Konkurrenten um den Pries weern Tiril Sjåstad Christiansen (Freestyle-Skiing), Caroline Graham Hansen (Football), Tom Beier Jensen (Sportscheeten), Henrik Kristoffersen (Ski Alpin) as ok Are Strandli / Kristoffer Brun (Rudern). An‘ 4. Januar 2014 in dat Oslo Spektrum hett man Bø den Pries tospraaken. Sien Bröer Tarjei harr den sülvigen Pries 2011 kreegen.

Anmarken: De Utteknungen in‘ Rahmen vun de Idrettsgallaen sünd nich to verwesseln mit de Ehrung as „Sportler vun dat Johr“.

Weblenken

Johannes Thingnes Bø. Mehr Biller, Videos oder Audiodateien to’t Thema gifft dat bi Wikimedia Commons.

• Johannes Thingnes Bø in de Datenbank vun de IBU (engelsch)
• Johannes Thingnes Bø in de Datenbank vun de FIS (engelsch)
• Eugen Epp: Der Konkurrent aus dem Kinderzimmer. spox.com 22. Februar 2012; afropen an‘ 31. Januar 2013.