Simon Schempp

Simon Schempp (* 14. November 1988 in Mutlangen) is en ehmalger düütsch Biathlet.

Simon Schempp (2018)

Karriere

Simon Schempp leev in sien Kindheit in Uhingen un sien Vereen is immer noch Ski Zunft Uhingen. In de eerst Johren hett he in sien Heimat Uhingen traineert. To disse Tiet geev dat dor blots en lütt Trainingsgrupp ünner de Upsicht vun sien Vader Reiner Schempp, de sülvst as Biathlet den Landeskader anhörrt harr. Wiel de Trainingsbedingungen in Uhingen nich de besten weern, wurr Schempp fakener nah Gosheim oder Ulm to'n Traineeren brocht. Dor weer de Upsichtspersonen Reiner Schempp, Mathias Rösch un Roland Schmauder statt. In de Johren tüschen 2004 un 2008 hett Schempp dat Skiinternat Furtwangen besöcht un dor vun Steffen Hauswald traineert. An dat Skiinternat hett he denn ok sien Abitur maakt, todem wurr hüm de Alfred-Maul-Gedächtnismedaille für hervorragende Leistungen in Sport verleeht, de hüm vun Simone Hauswald övergeven wurr. Siet 2008 traineert he in Ruhpolding un trett för dat Zoll-Ski-Team an.

Internatschonal is Schempp siet 2006 toeerst in' Junioren-Europacup antreeden. Bi sien eerst Rennen in Obertilliach wunn he en Sprint un keem up den tweeten Platz in dat ansluuten Verfolgungsrennen. In Martell leep he 2007 sien eerste Juniorenweltmeesterschap. In Südtirol keem he in' Eenzel up den 5. Platz, in' Sprint up Platz 4, wunn in dat Verfolgungsrennen Bronze un gemeensam mit Daniel Böhm, Sebastian Berthold un Christoph Stephan in' Staffelwettbewarf de Goldmedaille. Een Johr later weer in Ruhpolding de Platz 9 in' Eenzel dat schlechteste Resultat, in Sprint un Verfolgung keem he up Platz 5 un gemeensam mit Manuel Müller, Arnd Peiffer un Florian Graf reck he mit de Staffel de Bronzemedaille. Besünners spoodriek wurr de Saison 2009. Bi de Juniorenweltmeesterschap in Canmore reck Schempp in' Sprint den sössten Platz, keem in' Eenzel up Platz 5, wunn in de Verfolgung achter Lukas Hofer Sülver un mit de Staffel an de Siet vun Erik Lesser, Benedikt Doll un Graf de Goldmedaille. Bi de Junioreneuropameisterschaft in Ufa verpass he as Veertplatzeerter in dat Eenzel en Medaille noch knapp, in' Sprint un in de Verfolgung wunn he achter den Norweger Tarjei Bø jewiels de Sülvermedaille. To dat Staffelrennen wurr he bi dat to glieker Tiet to de Junioreneuropameesterschap utdragen Staffelrennen vun de Mannlüüd insett. Gemeensam mit Böhm, Norbert Schiller un Christoph Knie wunn he achter de Staffel ut Norwegen de Sülvermedaille un wies dorbi en good Leistung in sien eerst Rennen bi de Utwussen.

Nah de Europameesterschap wurr Simon Schempp vun Bundstrainer Frank Ullrich eerstmals in dat Weltcup-Team beropen un fier bi den Biathlon-Weltcup in Whistler, de Generalproov för de Olympisch Winterspelen 2010, sien Debüt mit en 24. Platz in' Eenzel. In' Sprint twee Daag later reck he sogor Rang 17. De Dag later keem he to sien eersten Insatz in en düütsch Staffel. As Startlöper bill he gemeensam mit Böhm, Peiffer un Michael Rösch de jüngste Staffel, de jemals in' Weltcup för Düütschland antreeden weer un keem up de darten Platz, gliekbedüüdend mit den eersten Sprung up dat Podest bi en Weltcup. Nach en dörwussen Saison 2009/10, in de Schempp de half Olympianorm schaff un twee good Staffelinsätze vörwiesen kunn, wurr he as Kandidat för de Olympisch Winterspelen 2010 in Vancouver hannelt. Aber en düchtigen Leistungsinbröök, de up körperliche Erschöpfung torüchtoführen weer, hett en Nomineeren binah verhinnert. De DOSB hett hüm aber denn doch för de Spelen nomineer, wo he as Startlöper vun de Düütsch Staffel to'n Insatz keem un gemeensam mit Andreas Birnbacher, Arnd Peiffer un Michael Greis up den fievten Platz keem. Wenig Daag later wunn he mit Erik Lesser, Daniel Böhm un Christoph Knie in de düütsch Mannlüüdstaffel Gold bi de Biathlon-Europameesterschapen 2010 in Otepää. Bi den Weltcup in Kontiolahti 2010 belegg Schempp in de düütsch Mixed-Staffel mit Kati Wilhelm, Magdalena Neuner un Erik Lesser den tweeten Platz. Bi den dorup folgen Weltcup an' Holmenkollen leep Simon Schempp nah en 9. Platz in' Sprint in dat Verfolgungsrennen mit fehlerfree Scheetleistung noch up den 2. Platz un schaff dormit to'n eersten Mal bi en Eenzelrennen in' Weltcup den Sprung up dat Siegerpodest. In dat letzt Rennen vun de Saison 2009/2010 gelung hüm sien bit dorhen gröttste Erfolg. He wurr in Chanty-Mansijsk gemeensam mit Magdalena Neuner, Simone Hauswald un Arnd Peiffer Weltmeester in de Mixed-Staffel.

Schempp gemeensam mit Jakov Fak un Jean-Guillaume Béatrix up dat Podium nah den Weltcup-Sprint vun Nové Město 2015.

In de Saison 2010/11 keem he blots bi de eerst dree Statschonen to’n Insatz, reck dorbi tweemal de Punkteränge un stunn an dat Enn‘ vun de Saison up den 87. Platz. Glieks bi dat eerst Weltcuprennen vun de Saison 2011/12, en Eenzelrennen in Östersund, keem he mit Platz 3 eerstmals up dat Podium.Wiedere Top-Teihn-Platzeeren brochen hüm an dat Enn‘ vun de Saison up Platz 26 in den Gesamtweltcup. He keem denn ok bi de Biathlon-Weltmeesterschapen 2012 in Ruhpolding to’n Insatz. In‘ Sprint belegg he dor den 19. Platz un keem bi de ansluutend Verfolgung noch bit up Platz 9 vör. In dat Eenzel harr he aber mit Platz 90 överhoopt kien Spood. Mit de Staffel wunn he aber gemeensam mit Andreas Birnbacher, Michael Greis un Arnd Peiffer de Bronzemedaille.

Tosommen mit Andreas Birnbacher geev he 2012 bi den 1. Chiemsee Triathlon sien Triathlon-Debüt. In dat mit tallriek Triathlon-Profis besett Feld keem he mit en Tiet vun 4:16:48,3 för de twee Kilometer Swemmen, 80 Kilometer Radfohren un 20 Kilometern Loopen up den 21. Platz.

In de Saison 2012/13 keem he överhoopt nich torech. In den Gesamtweltcup reck he blots Platz 29. Sien best Eenzelreslultat bleev Platz 5 in den Sprint vun Ruhpolding. Ok bi de Biathlon-Weltmeesterschapen 2013 in Nové Město na Moravě reck he blots de Bronzemedaille mit de Staffel.

Umso beter leep dat denn in de Saison 2013/14, ofschons he bi de eerste Statschoon in Östersund nich dorbi weer. An' 17. Januar 2014 wunn Schempp tietgliek mit Lukas Hofer in den Sprintwettbewarf in Antholz sien eerstes Weltcuprennen. Een Dag later wunn he ok dat Verfolgungsrennen un fier sien tweeten Weltcupsieg vör Jean-Guillaume Béatrix un Henrik L’Abée-Lund. Bi de Olympisch Spielen in Sotschi wunn Schempp as Slusslöper vun de Staffel en Sülvermedaille. Tovör harr he bi sien Platz 6 in de Verfolgung dör en Fehler bi sien letzt Schööt en mögelk Medaille verpasst. An dat Enn‘ vun de Saison harr he den 10. Platz in de Weltcup-Gesamtwertung reckt.

Mit Siegen an' 22. un 24. Januar 2015 in Antholz schreev Simon Schempp Geschichte, indem he as eerst Athlet in twee direkt upnannerfolgen Johren an den glieken Oort de glieker Rennen winnen kunn. An' 14. März 2015 wurr he bi de Weltmeesterschapen 2015 in dat finnisch Kontiolahti tosommen mit Erik Lesser, Daniel Böhm un Arnd Peiffer Staffelweltmeester. 2016 wunn he bi de WM in Oslo Sülver mit de Mixed- un de Mannlüüd-Staffel.

In Januar 2021 hett he bekannt geven, dat he sien Loopbahn ut gesundheitlich Grünnen beennen deiht.

Privates

Simon Schempp weer van 2008 bit 2011 mit de Biathletin Miriam Gössner tosommen. Siet den Winter 2015/16 is de Biathletin Franziska Preuß sien Früendin.

Weblenken

Simon Schempp. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Website von Simon Schempp
• Simon Schempp in de Datenbank vun de IBU (engelsch)
• Simon Schempp bi de Bundestollverwalten
• Vörlaag:Biathlon2b