Julius Ludowieg

Julius Hermann Ludowieg (* 9. Juli 1830 in Hitzacker; † 12. September 1908 in Waldhausen) weer en düütschen Verwaltungsbeamten.

Ludowieg is 1830 in Hitzacker boren. He weer in Hannover un Holzminnen op Gymnasium un hett denn von 1850 bet 1853 Juristeree un Natschonalökonomie an de Universitäten Göttingen un Berlin studeert. In Göttingen is he 1851 Maat von dat Corps Brunsviga Göttingen worrn. Na de beiden juristischen Staatsprüfungen is he Avkaat in Hannover worrn. 1862 bet 1868 weer he kommissarsch Stadtsyndikus un Börgermeester in Aimbeck. 1868 is he denn richtigen Börgermeester von Aimbeck worrn. 1879 bet 1885 weer he Börgermeester in Hameln. 1886 is he as Börgermeester na Horborg gahn un is dor 1888 Böverbörgermeester worrn. 1889 (17. Wahlperiood) is he för den Wahlkreis Lümborg 7 (Horborg) as Afornten in dat Prüüßsche Aforntenhuus wählt worrn. He weer dor in de Natschonalliberale Partei. In siene Amtstied hett sik Ludowieg besünners för den Bo von en Wasserleitung in Horborg insett. Dör dat reine Drinkwater harr Horborg 1892 bi de Choleraepidemie von 1892 blots ganz wenig Fäll. An’n 30. September 1899 hett Ludowieg de Ole Horbörger Elvbrügg inwieht.

1899 is Ludowieg Ehrenbörger von Horborg worrn. 1950 is de Julius-Ludowieg-Straat in Horborg na em nöömt worrn. De Ludowieg-Born na en Entwurf von Rudolf Kolbe is von 1909 un steiht vondaag in’n Horbörger Stadtpark.