Kanzlershoff

De Kanzlershoff (hoochdüütsch Kanzlershof) weer en Good in’n hüdigen Stadtdeel Rönnborg, Bezirk Horborg, Stadt Hamborg. Later hett sik rund üm dat Good en lütten Oort billt, de vondaag as Deel von Rönnborg tellt.

Geografie

De Kanzlershoff liggt in dat Randmoorrebeed an de Grenz von de Masch von de Süderelv na de Geest.

De Naveröörd sünd Good Moor in’n Noorden, Brammerhagen in’n Noordoosten, Groot un Lütt Moor in’n Oosten, Freeswardermoor in’n Süüdoosten, Mäkelfeld in’n Süden, Rönnborg in’n Süüdwesten un Wilsdörp in’n Noordwesten.

Historie

1540 hett Hertog Otto I. den Seevkanaal dör dat Mäkelfeller Moor graven laten. De Kanaal weer för den Transport dor, schull de Horbörger Binnenmöhlen andrieven un helpen, dat Moor to koloniseren. Otto sien Enkel Willem August hett 1630 sien Kanzler Johann von Drebber en free Good in dat Moor schenkt. Disse Domään hett dorüm denn Kanzlershoff heten. Dor hett veel Land in’n hüdigen Stadtdeel Good Moor tohöört. De Naam von’n Stadtdeel Good Moor kummt von’n Kanzlershoff her.

1713 is dat Herrnhuus anleggt worrn. 1782 hett Johann Ludwig von Wallmoden-Gimborn dat Good köfft. Nadem von Wallmoden 1811 doodbleven is, hebbt siene Arven dat Good an den Amtsvaagd Meineke in Neeland verköfft. As de aver nich tahlen kunn, is dat Good an en Gumprecht ut Hamborg övergahn. De hett dat Good 1815 denn an’n Speditör Michaelis ut Horborg verköfft. Von Michaelis hett dat denn later Augustus von Zastrow köfft.

To’n 1. Mai 1847 hett de Bahnlien Hamborg–Hannover den Bedriev opnahmen, de in’n Westen dicht bi’n Kanzlershoff an’n Geestrand langsgeiht. De eerste Verkehr op de Bahnlien Hamborg–Bremen is an’n 1. Juni 1874 lopen. Disse Bahnlien lööp in’n Oosten von’n Kanzlershoff langs. Dormit weer de Oort von beide Sieden von Gleise ümgeven, twüschen de Gleise weer blots en üm un bi 100 Meter breden Striepen Land nableven. Mit de Iesenbahnen hebbt sik bi dat Good denn von de Midd von dat 19. Johrhunnert af an bilütten ok mehr Lüüd ansiedelt un Kanzlershoff is to en lütten Oort wussen.

Dat Herrnhuus müss 1910 afreten warrn, as de Rangeerbahnhoff Horborg utboot worrn is. Dorför hett de Prüüßsche Iesenbahnfiskus dat Good von sien letzten Besitter, en Matthies ut Hainholt, köfft.

Vondaag is blots noch de Stratennaam Kanzlershoff von dat ole Good nableven.

Goodsherrn

• 1630–1647: Johann von Drebber
• 1782–1811: Johann Ludwig von Wallmoden-Gimborn
• –1832: Augustus von Zastrow
• –1910: Matthies

Verwaltungsgeschicht

De Oort hett vör 1885 to de Vaagdie Höpen in dat Amt Horborg tohöört. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn. Mit dat Groot-Hamborg-Gesett is Kanzlershoff Deel von de Stadt Hamborg worrn.

Inwahnertall

Johr	Inwahners
1793-00-001793	1 Füürsteed
1824-00-001824	2 Füürsteden
1848-00-001848	5 Lüüd, 1 Huus
1871-12-011. Dezember 1871	128 Lüüd, 12 Hüüs

Religion

De Kanzlershoff is evangeelsch-luthersch präägt un höört siet 1960 to dat Kaspel von de Bugenhagen-Kark in Rönnborg. Fröher hett dat Good to de Dreeeinigkeits-Kark in Horborg un de Kark in Sinsdörp höört.

För de Kathoolschen is de Franz-Joseph-Kark in Wilstörp tostännig. Von 1864 bet 1914 weer de St.-Maria-Kark in Horborg för de Kathoolschen tostännig. Disse beiden Karken billt siet 2006 tohoop de Karkengemeen St. Maria-St. Joseph.

Kultur

Verenen

De Schüttenvereen Kanzlershoff is 1895 grünnt worrn.

Weertschop un Infrastruktur

Verkehr

Kanzlershoff is över lüttjere Straten mit Rönnborg un Good Moor verbunnen un över disse Öörd mit Horborg.

De nächste Autobahn is de Autobahn 1 (Hambörger Süüdümgehung), de in de Tied bet 1962 anleggt worrn is. De Opfohrt 38 Horborg liggt so veer Kilometer in’n Noordoosten von Kanzlershoff. De Opfohrt 6 Wilsdörp op de Autobahn 253 liggt noch bichter bi, blots twee Kilometer in’n Noordwesten.

De nächsten Bahnhööv sünd so bi veer Kilometer wied weg in’n Noordwesten de Bahnhoff Horborg an de Bahnlien Hamborg–Hannover, de Bahnlien Hamborg–Bremen un de Nedderelvbahn un in’n Süüdoosten de Bahnhoff Mäkelfeld an de Bahnlien Hamborg–Hannover.

Lüüd

De Politikerin Elisabeth Ostermeier, borene Gottschalk, is 1913 in Kanzlershoff boren.