Karl Olfers

Karl Olfers (* 14. April 1888 in Dorum; † 22. April 1968 in Cuxhoben) weer en düütschen Politiker von de SPD.

Leven

Olfers is 1888 in Dorum as Söhn von en Buur boren un weer op de Volksschool un denn op Fortbildungsscholen. He hett Timmermann lehrt. Von 1909 bet 1911 weer he Soldaat un weer later in’n Eersten Weltkrieg ok wedder Soldaat. Von 1925 bet 1933 weer he Geschäftsföhrer von de Bohütt Cuxhoben. Nadem he ünner de Natschonalsozialisten all sien Ämter verloren hett un en poor Maal fastnahmen worrn is, hett he von 1933 bet 1944 as Vertreder för Versekerungen arbeidt. He hett in disse Tied in Millm leevt. 1944 hebbt se em to’n Wehrdeenst intagen.

Politik

Karl Olfers is 1907 in de Gewerkschaft un 1912 in de SPD ringahn. Von 1919 af an weer he Stadtvertreder, Maat von’n Magistrat un von 1924 af an tweten Börgermeester von Cuxhoben, as Vertreder von Max Bleicken (DDP). He weer 1933 Maat von’n Landsutschuss, von’n Opsichtsraad von de staatliche Fischereesellschop un annere öffentliche Sellschoppen bevör de Natschonalsozialisten em ut all sien Ämter smeten hebbt.

Von 1919 bet 1933 weer Olfers för de SPD Maat von de Hambörgsche Börgerschop.

Na 1945 hett he bi dat Wedderopboon von de SPD in Cuxhoben un in de Werserregion hulpen. He is 1945 Stadtraad un 1946 Böverbörgermeester von Cuxhoben worrn un dat bet 1952 bleven. Von 1956 bet 1966 weer he wedder Böverbörgermeester. 1946 is he in’n Landdag von Neddersassen wählt worrn. Dor weer he de Präsident von’n Landdag von 1946 bet 1955 un von 1959 bet 1963.

Von Januar 1966 af an tütt he sik bilütten ut de Politik trügg. Sien Mandaat in’n Landdag behöllt he noch bet 1967. 1968 blifft Olfers in Cuxhoben dood.

Ehren

An’n 31. Januar 1954 hett he dat Grootkrüüz von’n Verdeenstorden von de Bundsrepublik Düütschland kregen un an’n 1. Mai 1954 de Neddersassische Landsmedallje. Ok dat Grote Verdeenstkrüüz von’n Neddersassischen Verdeenstorden hebbt se em an’n 1. November 1961 geven. 1966 hett de Stadt Cuxhoben em to’n Ehrenbörger maakt un ok den Karl-Olfers-Platz na em nöömt.