Karniggels

Karniggels (op Platt so veel as „Kaninken“) is en Speelfilm vun Detlev Buck ut dat Johr 1991. In de Hööftrullen hebbt Bernd Michael Lade, Ingo Naujoks, Inga Busch un Julia Jäger speelt. Karniggels weer de eerste Film, den Buck tosamen mit Claus Boje produzeert hett.

Filmdaten
Plattdüütsch Titel:	—
Originaltitel:	Karniggels
Düütsch Titel:	Karniggels
Produkschoonsland:	Düütschland
Johr vun’t Rutkamen:	1991
Läng:	94 Minuten
Originalspraak:	Hoochdüütsch
Öllersfreegaav in Düütschland:	FSK 12
Filmkru
Speelbaas:	Detlev Buck
Dreihbook:	Detlev Buck Wolfgang Sieg
Produkschoon:	Claus Boje WDR BojeBuck Filmproduktion GmbH
Musik:	Detlef Petersen
Kamera:	Roger Heeremann
Snitt:	Sybille Windt
Dorstellers
Bernd Michael Lade: Horst Köpper Julia Jäger: Nina Steenhagen Ingo Naujoks: Elle Inga Busch: Annarina Willy Bartelsen: Baas vun de Wacht Walter Jacob: Opa Köpper Brigitte Böttrich: Anna Köpper Axel Altmann: Gerhard Köpper Karl Knieser: Perlenverköper

Inholt

Horst Köpper is in Sleswig-Holsteen op’n rohigen Land opwussen un is nu dorbi, sien Utbilln bi de Polizei aftosluten. He stellt sik dorbi nich jüst to’n Besten an, aver dröömt vun’n tokünftigen Deenst in en grote Stadt as Kiel oder Lübeck. Man sien Utbillers seht dat en beten anners un schickt den jungen Praktikanten, de woll engagiert, man manchmol ok ’n beten dör den Wind is, eerstmol in de Provinz na Barmstedt, wo dat all’ns wat mackelicher togeiht. Dor, wo jeder jeden kennen deit un wo man as ’n normalen Börger jümmer wat argdenkern is, wenn de Polizei wat vun een will.

Sien eerste Fohrtüüchkontroll geiht denn ok gliek na achtern los, as de Autofohrer, de Slachter Elle, em eerstmol as Praktikant verschaukelt. Köpper – tomeist blots Köppe nöömt – versocht aver, sik un de annern to bewiesen, dat he wat kann un geiht ornlig an’t Wark. Mit sien Auto dreiht he nachts en poor Runnen extra, üm den sünnerboren Kohmöörder op de Spoor to kamen, de in de Gegend sien Unheel drifft. Dorbi löpt em Elle över’n Weg, de mit’n Auto liggen bleven is un nu över de Wischen un Weiden löpt, op de Söök na en Telefon. Köpp glöövt natürlich foorts, den Möörder funnen to hebben. As Elle wietergeh will, wiel em dat Verhöör to dämlich warrt, sleiht Köppe en daal. Ut dat Missverständnis warrt later en eerste Fründschap in de Frömd.

Dör en Autodeveree lehrt Köpper denn Annarina kennen, en junge Deern ut riekem Huus, un verleeft sik in ehr. As he sien ne’en Fründ Elle en överraschenden Besöök afstatten deit, findt he em in sien Garaasch vör, as he jüst dorbi is, dat klaute Auto ümtolackeeren. Foorts kummt in Köpper de Polizist togang. He mellt de Deveree un nimmt Elle mit na de Wacht. Mit Stolt bringt he Annarina den Wagen wedder torüch. De aver wiest sik gor nich so tofreden mit de ne’e Klöör, un överhööft hett de Versekern jo all lang all’ns klor maakt. Un to Köppers Verdreet mutt he ok noch mitkriegen, dat Annarina en Fründ hett un vun em gor nix weten will.

As he nu beid Fründschoppen verloren sütt, suppt Köpper sik eerst mol enen an. Op’n Weg na Huus kummt he aver sülvst in en Polizeikontroll. Nina, de mit em op de Polizeischool wesen is un in de he ok verleeft weer, versocht toeerst em to schulen, kummt dormit aver nich dör. Köpper kriggt dat mit de Angst to doon sien Arbeit to verleren un pedt op’t Gas. An’n End kriegt se em aver doch un he warrt ut’n Polizeideenst rutsmeten. Elle helpt em, wedder op de Been to kamen. Un as he denn ok noch Besöök vun Nina kriggt, schient doch all’ns wedder beter to warrn.

Achtergrund

In Karniggels geiht dat op achtergrünnig-humorvulle Oort un Wies üm verscheedene Sieten vun dat Leven op’n Land in Noorddüütschland, üm de Problemen mit de egen Geföhlen bi’t Verleeft Wesen oder de Lasten, de een hett, wenn he in dat Öller is, sik to Huus aftonaveln. De köhlige noorddüütsche Distanzeertheit warrt dorbi jüst so op de Schipp nahmen as de tyypschen Scherereen ünner Bröder, de plumpen Vörgäng bi’t Deerns anmaken oder ok de tallrieken Klischees, mit de man as Polizist so to doon kriggt.

Buck sülvst beteken den Film as en Oort Oparbeiten vun sien egen verleden Tiet as en jungen Kerl, wiel sien Öllern dat ok lever sehn harrn, wenn he bi de Polizei anfungen weer. So sütt he den Film Karniggels as en möögliche Variante, de sien egen Leven inslahn kunnt harr, wenn he nich bi’n Film lannt weer. Buck is in den Film eenmol kort as Postbaad in en Cameo-Optritt to sehn. Jüst so ok Wolfgang Sieg, de mit an dat Dreihbook schreven hett un kort as Mann in’n Goorn speelt.

De Film weer mit Ünnerstütten vun verscheeden Verenen maakt as dat Hamborger Filmbüro e.V., dat Kuratorium Jungen Düütschen Film, de Filmfödderanstalt, de Berliner Filmföddern, de Dreihbookwarksteed Berlin un dat Bundsministerium för’t Binnere.

Utteken

Detlev Buck is 1992 bi de Bayerischen Filmpriesen mit den Speelbaasnawasspries ehrt worrn.

Websteed

• Karniggels in de Internet Movie Database (engelsch)