Kattwiek

Dit Woort hett noch annere Bedüden: kiek dorför ünner Fährschipp Typ I.

Wapen/Flagg	Koort
Basisdaten
Bundsland: Hamborg Bezirk: Hamborg-Midd Stadtdeel: Willemsborg
Inwahners:
Postleettall:	21107
Vörwahl:	040
Geograafsche Laag:	53° 30′ N, 9° 58′ O

Kattwiek (hoochdüütsch Kattwyk) weer en Warder in dat Binnendelta von de Elv twüschen Süderelv un Noorderelv. Vondaag billt dat Rebeed en Deel von’n Hambörger Haven un liggt in’n Stadtdeel Willemsborg, Bezirk Hamborg-Midd, Hamborg.

Koort von’n westen Deel von dat Binnendelta von de Elv mit Groot un Lütt Kattwiek, herstellt 1789 bet 1796 ünner Gustav Adolf von Varendorf

Blick över de Raffinerie in Kattwiek

Geografie

De Warders un Öörd ümto weren Neehoff in’n Noorden, de Reiherstieg in’n Noordoosten, Willemsborg in’n Oosten, de Hoge Schaar un Lauenbrook in’n Süden, Moorborg in’n Süüdwesten un Oolwarder, Krusenbusch un Rugenbargen/Waltershoff in’n Noordwesten.

Historie

Kattwiek bestünn fröher ut Groot Kattwiek un Lütt Kattwiek. Lütt Kattwiek leeg twüschen Ole Süderelv un Süderelv (Köhlbrand) un Groot Kattwiek twüschen Süderelv un Reth. Lütt Kattwiek is denn Deel von Ellerholt worrn.

Bet in dat 20. Johrhunnert weer Kattwiek bewahnt un dor is Bueree dreven worrn. Denn sünd dor aver Havenanlagen anleggt worrn un all Inwahners hebbt Kattwiek verlaten.

Von 1958 bet 1960 is in Kattwiek op 34 Hektar en Gaswark boot worrn. De Kokeree hett ganz Hamborg mit Stadtgas versorgt. Nadem Hamborg mit Eerdgas versorgt worrn is, is dat Wark 1981 stillegt un bet 1982 afreten worrn.

In Kattwiek bestaht vondaag noch de Havenanlagen von’n Blomensandhaven un von’n Kattwiekhaven (Deel von de Rethhavens), de üm 1930 rüm anleggt worrn sünd.

Ünnernehmens in Kattwiek sünd ünner annern de Oiltanking Deutschland, DHL Freight un G.T.H. Getreide Terminal Hamburg. Na Süden to op de Hoge Schaar liggt de Raffinerie von Nynas (fröher Shell).

1953 is dat eerste Schipp von de Schippsklass Typ I von de HADAG na Kattwiek nöömt worrn.

Verwaltungsgeschicht

In de Franzosentied von 1810 bet 1814 hett de Oort to de Mairie Horborg in’n Kanton Horborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to de Vaagdie Lauenbrook in dat Amt Horborg tohöört. Na 1885 weer dat in’n Kreis Horborg. An’n 1. Juli 1927 is de Goodsbezirk Kattwiek dör dat Ünnerelvgesett denn mit Horborg un Willemsborg to de ne’e Stadt Horborg-Willemsborg tohoopslaten worrn un weer dormit ok nich mehr in’n Kreis Horborg. Mit dat Groot-Hamborg-Gesett 1937 is Horborg-Willemsborg Deel von de Stadt Hamborg worrn.

Inwahnertall

Johr	Inwahners
1793-00-001793	1 Füürsteed
1812-00-001812	20
1824-00-001824	1 Füürsteed
1848-00-001848	26 Lüüd, 2 Hüüs
1910-12-011. Dezember 1910	37

Religion

Kattwiek weer evangeelsch-luthersch präägt un hett to dat Kaspel von de Gertrud-Kark in Oolwarder höört.

För de Kathoolschen is de St.-Bonifatius-Kark in Willemsborg tostännig.

Weertschop un Infrastruktur

Verkehr

In’n Süden von Kattwiek löppt de Kattwiekdamm langs, de mit de Kattwiekbrügg över de Süderelv rövergeiht un na Moorboorg un bi Bosselbeek an de Bundsstraat 73 löppt. Bi Moorborg besteiht ok Ansluss an de Autobahn 7 över de Opfohrt 31 Moorborg. In’n Oosten geiht de Kattwiekdamm an de Hoge-Schaar-Straat ran. De Kattwiekbrügg is 1973 boot worrn. De Hoge-Schaar-Straat geiht in’n Noorden över de Reth-Brügg na Neehoff un in’n Süüdoosten mit en Brügg över’n Reiherstieg un in Willemsborg an de Opfohrt 3 Willemsborg-Süüd op de Autobahn 253 ran. In’n Noordwesten löppt de Kattwiekstraat na Krusenbusch mit dat Autoterminal Hamborg.

De nächste Bahnhoff is so bi söss Kilometer wied weg in’n Süüdoosten de Bahnhoff Horborg. De Industrieanlagen in Kattwiek hebbt aver en egen Gleisansluss.

Kattwiek weer fröher een von de Statschonen von de HADAG-Fährlien von de Lannungsbrüggen na Horborg. Von 1970 af an weer Kattwiek de Ennstatschoon un von 1983 af an sünd de Fähren blots noch na Neehoff föhrt un nich mehr na Kattwiek.