Mairie Horborg
De Mairie Horborg weer in de Franzosentied (1810 bet 1813) een von de twee Mairien, in de de Kanton Horborg indeelt weer. De Seet weer in Horborg. Se harr 5394 Inwahners.[1]
Historie ännern
De Ümgegend von Horborg hett vör de Franzosentied to de Stadt Horborg un dat Amt Horborg (mit de Huusvaagdie un de Vaagdien Höpen, Lauenbrook un Neeland-Over) in dat Förstendom Lümborg höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Horborg een von de fiev Mairien in’n Kanton Horborg von’n Distrikt Horborg, Departement von de Nedderelv.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Horborg weer nu een von de twee Mairien in’n Kanton Horborg, Distrikt Horborg, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to fiev Mairien höört harrn: de Mairien Horborg, Lauenbrook, Eißendörp un Marmsdörp ut’n Kanton Horborg un de Mairie Neeland ut’n Kanton Hittfeld. Von de Mairie Neeland is blots de Oort Neeland an de Mairie Horborg gahn. De annere Oort, Seevenhusen, is in de Mairie Mäkelfeld wesselt.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd ännern
Dor hebbt düsse Öörd tohöört:
- Kaiserriek Frankriek:[1]
- Horborg (3625 Inwahners), Slott-Bezirk (172), Neeland (414), Heimfeld, Wehlkoth (157), Kattwiek, Hogeschaar (20), Eißendörp (255), Marmsdörp (189), Lauenbrook (298), Wilstörp, Langenbeek, Butenmöhl (264)
Vondaag sünd düsse Öörd all Deel von de Stadt Hamborg.
Footnoten ännern
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 59
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 38