Springbank

Springbank is en Whisky–Brenneree op dat Halfeiland Kintyre, Schottland. Se höört blangen Glen Scotia to de letzen Brennereen in dat Whiskyrebeet Campbeltown, in de dat fröher mol dörtig Destillen geven hett. En drüdde Brenneree (Glengyle) is 2004 apen maakt worrn. De Bowarken vun de Destille sünd in de schottischen Denkmollisten in de Kategorie B inordent.

Springbank
De Brenneree Springbank
Land	Schottland
Region	Campbeltown
Tyyp	Malt
Status	aktiv
Besitter	J & A Mitchell & Co. Ltd.
Grünnt	1828
Grünner	Reid Family
Waterborn	Crosshills Loch
Washstill(s)	1 × 20.000 l
Spiritstill(s)	2 × 12.274 l
Produkschoonsvolumen	100.000 l
Websteed	www.springbankdistillers.com

Historie

De Brennblasen vun Springbank

De Brenneree is 1828 dör de Familie Reid grünnt worrn. Se weer de veerteihnte Destille, de in Campbeltown dokumenteert worrn is. De Lizenz to’n Brennen hebbt se 1837 kregen, as de Destill in’n Besitt vun de Fmailie Mitchell gahn is. Se is bit vundaag unafhangig. As 1920 in de USA de Prohibitschoon anfüng, harrnok de Brennereen in Schottland düchtig to lieden, vunwegen dat veel weniger Whisky verköfft warrn künn. En groten Deel vun de dormoligen Brennereen in de Stadt hebbt opgeven müsst un jemehrn Bedrief in de Johren dorna instellt. In de Johren vun 1926 bit 1935 weer ok Springbank stilleggt. Siet August 2006 warrt de Brenneree Springbank vun Stuart Robertson leidt.

Produkschoon

Whisky-Fatten in en Lagerhuus

Springbank tellt to dat schottische Whiskyrebeet Campbeltown un betütt dat Water för de Produkschoon ut den Crosshills Loch – jüst so, as de annern beiden Destillen in de Stadt. De Brenneree hett en egene Malteree un bruukt för den Whisky ok blots dat egene Malt. Brennt warrt in een Wash Still vun 20.000 l un twee Spirit Stills to 12.274 l. Dat Sünnere an dat Destillatschoons-Verfohren bi Sprinkbank is, dat de Naloop ut den eersten Brenndörgang sammelt un dreemol brennt warrt, de Rest man blots tweemol. Man snackt dorüm ok vun en twee’n’halffacke Destillaschoon.

De Whisky ut de Brenneree warrt meist blots as Single Malt affüllt, wat dormit to doon hett, dat de Destille noch jümmer in’n Familienbesiit is un all Aflööp sülvst bestimmen kann. Blots en lütten Andeel warrt to’n Herstellen vun Blend-Whisky bruukt, as den Campbeltown Loch oder den Mitchell’s 12 year old.

Kiek ok

List vun de schottischen Brennereen

Weblenken

Springbank. Mehr Biller, Videos oder Audiodateien to’t Thema gifft dat bi Wikimedia Commons.

• Indrag op wormtub.com