Kitarō
Kitarō (jap. 喜多郎; börgerlich Masanori Takahashi 高橋 正則; * 4. Februar 1953 in Toyohashi) is en japaansche Musiker. De Ökelnaam Kitarō (so veel as: „Mit veel Freid segent Mann“) is en Anspelen op de Figur Kitarō ut den japaanschen Manga Ge Ge Ge no Kitarō.
Leven un Wark
ännernKitarō is in en Buernfamilie opwossen. He hett wiel sien Böverschooltiet an’n leevsten Soul un Rhythm & Blues höört. Sien eerst Instrument weer en E-Gitarr, de he sik sülvst to spelen lehrt hett. Mit sien eerste Grupp Albatross hett he Musik op Partys un in Clubs maakt. De gröttste musikaalsche Influss keem to de TIet vun Otis Redding. Kitarō vergliekt de Deep vun sien Musik ok vundaag noch geern mit de vun’t Rhythm & Blues. De Tohörers warrt op de glieke Wies anröhrt. He meen, dat sien Musik keen Rhythm & Blues weer, man sik as Soul anföhlen deit.
To Anfang vun de 1970er Johren is he vullstännig op Keyboards ümstegen. He is denn in de Musikgrupp Far East Family Band ringahn un tour mit jem üm de Welt. As se inst in de 1970er Johren in Europa togang weern, hett he Kuntakt kregen to de düütschen Synthesizermusik kregen un drööp dat fröhere Tangerine Dream-Liddmaat Klaus Schulze. Schulze hett twee Alben vun de Grupp produzeert un hett Kitarō in en Crashkurs wiest, woans Synthesizer to spelen gaht un wies em dorbi ok Arbeitswiesen, de nich in Lehrböker stünnen.
1976 is Kitarō ut de Far East Family Band rutgahn un hett en Reis dör Asien maakt. Dorbi is he dör Länner as Laos, China un Thailand kamen. In Indien is he na Poona reist, woneem he ruchweg en half Johr an den Ashram vun Bhagwan Shree Rajneesh leevt hett.
As he torüch in Japan weer, hett he 1977 sien Solo-Loopbahn anfungen. Sien eersten beiden Platen Ten Kai un From the Full Moon Story sünd goot ankamen bi de Tohörers un stegen ok gau in de Gunst vun de New-Age-Szeen, de sik jüst billn de. Internatschonal is he eerst dör den Soundtrack to de NHK-Reeg Silkroad („De Siedenstraat“) bekannt worrn.
1986 hett Kitarō en Verdrag mit Geffen Records över de weltwieten Verdriefsrechten afslaten. In de Johren dorna hett he mit vele verschedene Musikers tosamenarbeidt, as to’n Bispeel mit Mickey Hart vun Grateful Dead un Jon Anderson vun Yes. Bit 1987 harr he tosamen al weltwiet mehr as 10 MIllionen Alben verköfft un weer mehrmols för en Grammy vörslahn. In’t Johr 1994 hett he sogor den Golden Globe kregen för den Soundtrack to den Film Heaven & Earth vun Oliver Stone. Sien gröttsten musikaalschen Spood weer de Grammy, den he 2001 in de Kategorie „New Age“ för sien Album Thinking of You kregen hett.
Kitarō weer vun 1983 bit 1990 mit sien eerste Fro Yuki verheiraat, mit de he en Söhn hett. Mitt vun de 1990er Johren hett he de Musikersche Keiko Matsubara heiraat. Mit ehr un ehrn Söhn hett he vele Johren lang in Ward in de Neeg vun Boulder/Colorado in de USA leevt, woneem he en Huus mit egen Toonstudio (Mochi House) hett. Üm 2007 rüm sünd se na Sebastopol in Noordkalifornien ümtogen.
Diskografie (Utwahl)
ännern
|
|
Weblenken
ännern- Domo Records – Platenfirma vun Kitarō
- Kitaro House – Fan-Siet mit wietere Informatschonen