Klooster Niewohl

Dat Klooster Niewohl is en christlich Klooster in Niewohl, dat de Ridderschop von dat Hertogdom Bremen-Veern tohöört.

Stifthuus

1219 is in Millm an’n Rand von de Hoge Lieth von de Eddellüüd von Deefholt en Klooster grünnt worrn. Von wegen dat de Benediktinerinnen dor jümmer wedder mit de Wuster anenannerkamen sünd, is dat Klooster 1282 in de Tied von Arzbischop Gisbert na Olenwoold ümtagen. Dor hett dat al en Kapell geven mit en Splinter von dat Hillige Krüüz as Reliquie, von de ok de hüdige Kark in Niewohl ehren Naam hett. 1334 ünner Arzbischop Burghard II. is dat Klooster denn aver noch en tweet Maal ümtagen na Niewohl. Dat Klooster harr dichtbi, in dat nu wööste Dalem, en Watermöhl.

In dat Johr 1500 is dat Klooster von de Swarte Garr utrövert un dalbrennt worrn.

De Reformatschoon is 1571 na Niewohl kamen.

1629 is dat Klooster afbrennt. In dat sülve Johr gifft Kaiser Ferdinand II. dat Restitutionsedikt rut, dat den evangeelschen Kloosterbesitt an de Katholiken trügggifft. 1630 kaamt denn de Jesuiten na Niewohl üm dat Klooster to övernehmen. De olen Inwahners müssen denn wegtrecken. Na de Slachten von Breitenfeld un von Lützen müssen de Jesuiten wedder nageven un de Kloosterfroon sünd na Niewohl trüggkamen. In de tokamen Johren bet 1636 sünd denn op de olen Grundmuurn dat Klooster un de hüdige Hilligkrüüzkark nee boot worrn.

An’t Enn von’n Dörtigjohrigen Krieg hebbt de Sweden dat Hertogdom Bremen-Veern övernahmen un 1648 hett Melchior von Schlangenfeld dat Klooster as Lehn kregen. Nadem von Schlangenfeld doodbleven weer, hett König Karl XI. 1683 dat Klooster an de Ridderschop von dat Hertogdom Bremen-Veern geven. De Ridderschop wull dat Klooster as Konvent hebben in dat de unverheiraadt Froonslüüd ut’n Adel von dat Hertogdom sik utbillen laten un en Utkumst finnen kunnen.

1719 warrt dat Klooster na Süden hen utboot. In de Franzosentied warrt an’n 7. Oktober 1810 dat Klooster ophaven un kummt in’n Besitt von König Jérôme. Eerst 1816 kummt de ole Stand von vör de Franzosentied trügg un in dat Klooster leevt denn wedder Stiftsdamen.

Dat Patrimonialgericht, dat dat Klooster billt hett, is to’n 1. Januar 1843 oplööst worrn. Na disse Tied hett dat Klooster to’n Gerichtsbezirk von dat Amt Beers höört.

Vondaag höört dat Klooster jümmer noch de Ridderschop to un siet 2005 gifft dat wedder Stiftsdamen in dat Klooster, de as Opgaav hebbt, Kunst, Kultur un Religion in dat Klooster un in dat ole Hertogdom to bewohren un vörantobringen. Dat is dat eenzige Klooster, dat in dat Rebeed von Bremen-Veern bet vondaag nableven is.

Literatur

• Dirk Behrens: Kloster Neuenwalde - Zur Geschichte des ehemaligen Nonnenklosters und heutigen Damenstiftes Neuenwalde. Stood 1993
• Heinrich Rüther: Geschichte des Klosters Neuenwalde. Oterndörp 1950

Weblenken

• Websteed von dat Klooster (hoochdüütsch)