Lüh-Schulau-Fähr
De Lüh-Schulau-Fähr (LSF) is en Fähr över de Elv, de twüschen den Fähranlegger an de Lüh in Greundiek (53° 34′ N, 9° 38′ O) un den Fähranlegger Willkomm-Höft in Schulau bi Wedel (53° 34′ N, 9° 42′ O) föhrt. För de Fohrt bruukt de Fähr üm un bi 25 Minuten.
De Fähr is blots för Footgängers un Fohrrääd dor. Autos hebbt dor keen Platz op. Dat is de eenzige Fähr över de Elv twüschen de Elvfähr Glückstadt–Wischhoben un de Fähr Cranz–Blanknees.
Na’n Winterfohrplaan von November bet März föhrt de Fähr blots von Maandag bet Freedag, na’n Sommerfohrplaan ok an de Wekenennen.
Historie
ännernDe Lüh-Schulau-Fähr GmbH is an’n 25. März 1918 grünnt worrn.[1] De eerste Fähr weer de Barkass Cecilia ut Vesack.[1] Dat Schipp is al op’n Weg von Vesack na Schulau sunken, nadem de Sleper Vorwärts de Cecilia bi Stodersand rammt hett.[1] Dat Schipp is aver wedder flottmaakt worrn un is von’n 1. Juni 1919 af an ünner’n Naam Lüh twüsche Greundiek un Schulau föhrt.[1] An’n 22. Mai 1919 harr ok al de Fährverkehr mit de Barkass Lüh-Schulau I anfungen.[1] Dat Schipp is twee Maal an’n Dag föhrt.[1]
1922 hebbt se in Warnmünn noch en Schipp köfft, dat denn ünner den Naam Schulau lopen is.[1]
1927 hett de Stoder Schippswarft en neet un grötter Schipp boot, dat den Naam Lüh kregen hett.[1] 1959 is dat Schipp veer Meter länger maakt worrn un noch bet 1989 föhrt.[1] 1935 is op de Warft D. H. Kremer de Schulau boot worrn.[1] Se is bet Harvst 1991 föhrt.[1]
För de Lüh is 1989 de Dat Ole Land nee kamen.[1] Dat ne’e Schipp 1991 hett wedder Schulau heten.[1] De Scheep sünd all beid bi de Warft Menzer in Bardörp boot worrn un kunnen 12 Knoten lopen.[1]
Mit de Tied sünd de Pendlertallen dalgahn.[1] Dorüm hett de LSF 2001 beslaten, de Schulau an de Reederee Kipp op Rügen to verköpen.[1]
2010 is en neet Schipp bi de Warft Bolle in Derben in Opdrag geven worrn.[1] De Dat Ole Land is bet to’n 31. Dezember 2011 lopen un denn an de Fluss- und Hafentouristik GmbH Carstensen in Cuxhoben verköfft worrn.[1] Den Fährverkehr hett an’n 5. März 2012 dat ne’e Schipp Dat Ole Land II övernahmen.[1] Dat Schipp hett Platz för 250 Fohrgäst un 70 Fohrrääd. Se hett en Längd över allens von 34,92 m, is 8,15 m breed, hett en middleren Deepgang von 1,40 m un en Verdrängung von 210,0 Tunnen. De Maschien is von Scania un bringt mit 331 kW en Tempo von 11,7 Knoten.
Footnoten
ännernWeblenken
ännern
- Websteed von de Fähr (hoochdüütsch)