Lara-Maria Wichels

Lara-Maria Wichels (* 5. August 1992 in Stood) is en düütsche Schauspelerin.

Wichels is 1992 in Stood boren un in Harsfeld opwussen. Al as Schölerin keem se in de Schauspeel-AG in Kuntakt mit de Schauspeleree un ehre eerste Rull weer de Anna ut Blomendol ut Dietrich Alsdorf sien Romaan. 2008 weer se bi de Projektweek StageWeek von de Hambörger Speelbaasfro un Choreografin Anja Launhardt dorbi: Klinikgeflüster und mehr... keem in dat Stadeum in Stood op de Bühn. Von 2010 af an hett Wichels in en dramaturgsche Form von’n historischen Romaan Isern Hinnerk bi Lesungen von’n Schriever Dietrich Alsdorf de Ideke von Borlah speelt.

Wichels weer an de Schauspeelschool Bühnenstudio in Hamborg un hett dor en Diplom maakt.

2012 un 2013 stünn se in’n Medienbunker Hamborg ünner Speelbaas Marc Letzig in Fräulein Jolie un Alice im Wunderland op de Bühn. In Film un Feernsehn hett se in lüttjere Rullen speelt: in Lars Kokemüller sien Kortfilmen Baal.Macht.Greuel un Zombie Apokalypse oder as Barkeeperin in en Episood von dat Großstadtrevier.

Von August 2014 bet Juli 2015 weer se in de Rull as Nathalie Greve in de Telenovela Rote Rosen to sehn, de in dat Eerste Programm lööp.

2017 hett se anfungen, as Schauspelerin an dat Ohnsorg-Theater in Hamborg to spelen.

Siet 2011 leevt Wichels in Hamborg.

Filmografie (Utwahl)

• 2013: Großstadtrevier (Feernsehreeg, Episood Beatlemania)
• 2014–2015: Rote Rosen (Telenovela, Serienrull)
• 2015: In aller Freundschaft – Die jungen Ärzte (Feernsehreeg, Episood Neues Leben)
• 2016: Notruf Hafenkante (Feernsehreeg, Episood Shopping)

Weblenken

• Lara-Maria Wichels in de Internet Movie Database (engelsch)
• Lara-Maria Wichels ehr Websteed (hoochdüütsch)