Laura Dahlmeier

Laura Dahlmeier (* 22. August 1993 in Garmisch-Partenkirchen) is en ehmalge düütsch Biathletin.

Laura Dahlmeier 2018

Sportlich Loopbahn

Laura Dahlmeier hett as Söbenjohrige mit den Biathlonsport anfungen un hett eerst ok noch Wettkämpen in' alpinen Skirennsport bestreeden, bevör se sück nah twee Johren för Biathlon entscheeden dee. Mit 17 Johr hett se in de Saison 2010/11 eerste gröttere Erfolge harrt. So hett se in den Düütschlandpokal mit twee eersten un twee tweeten Platzen up sück upmarksom maakt. Bi de Juniorenweltmeesterschapen 2011 hett se twee Bronzemedaillen wunnen. Bi dat kört dorup in Liberec utdragen European Youth Olympic Festival hett se mit Siegen in all dree Rennen (Sprint, Eenzel un Mixed-Staffel) en perfekt Ergevnis haalt.

In dat Johr dorup kunn Dahlmeier bi de Juniorenweltmeesterschaen in Kontiolahti nich an hör bitherig Erfolge anknütten un verpasse Top-Ten-Ergevnisse in de Eenzelwettbewarfen. In de Staffel reck dat tominst gemeensam mit Franziska Preuß un Julia Bartolmäs to'n sössten Platz. In den Düütschlandpokal wunn se aber veer Entscheedungen un de Gesamtwertung vun disse Reeg in hör Öllersgrupp. In' März 2012 reck se bi de Düütsch Jögd- un Juniorenmeesterschapen in Oberhof jewiels Platz een in' Sprint un in' Einzel. Dör den Sieg in de Staffel mit Franziska Preuß un Iris Grandl wunn se denn ok noch den darten Jöögdmeestertitel.

Dör hör goot Leistungen in' Düütschlandpokal wurr Dahlmeier Anfang Januar 2013 vun den Düütschen Skiverband för de Juniorenweltmeesterschapen in Obertilliach utwählt. Glieks to'n Uptakt belegg se dor den eersten Rang in' Sprint. Nahdem se bi de ansluuten Verfolgung mit Platz twee (achter Olga Podtschufarowa) weer up dat Podest leep, seker se sück wiedere Titel in't Eenzel un in de Staffel. Mit all tosommen dree Gold un een Sülvermedaille wurr se de spoodriekste Deelnehmerin bi de Juniorinnen. Wegen hör stark Leistungen hett de Düütsche Skiverband hör ok för de een Week later stattfinnen Weltmeesterschapen in Nové Město nomineert. Dor wurr se anstäe vun Nadine Horchler för de Damenstaffel upstellt un reck gemeensam mit Franziska Hildebrand, Miriam Gössner un Andrea Henkel den fievten Rang. Bi hör Debüt in' Weltcup un to glieker Tiet eben ok bi en Weltmeesterschap hett se hör Runnen ahn Scheetfehler un mit de dartbeste Looptiet loopen un övergeev in Führung liggend an de Slusslöperin Henkel.

Bi den folgen Biathlon-Weltcup 2012/13 in Oslo hett se hör eerst Eenzelrennen bestreeden un keem in' Sprint up Platz 7. In dat ansluutend Verfolgungsrennen reck se Platz 10. Dordör kunn se sück denn ok för den Massenstart qualifizeeren, in den se up den 27. Platz lann. In' Sprint vun Sotschi kunn se hör goot Resultat vun Oslo bestätigen un reck achter hör Teamkollegin Evi Sachenbacher-Stehle den söbenten Rang. Een Dag later kunn se sück an' 10. März bi hör tweeten Staffelinsatz as Slusslöperin vun de düütsch Staffel üm Andrea Henkel, Evi Sachenbacher-Stehle un Miriam Gössner dör twee fehlerfree Scheetinlagen un en överragen Slussrunn den eersten Sieg in' Biathlonweltcup sekern.

An' 15. Dezember 2013 reck se mit Platz fiev in de Verfolgung vun Annecy-Le Grand-Bornand hör bit dorhen best Weltcupresultat in en Eenzelrennen. An' 28. Dezember 2013 wunn se, tosommen mit Florian Graf, de World Team Challenge in de Veltins-Arena in Gelsenkiärken.

In' Februar 2014 nehm se an de Biathlon-Wettbewarfen vun de XXII. Olympisch Winterspelen in Sotschi deel. Hör best Ergevnisse weern dor Platz 13 in' Eenzel und Platz 13 mit de Staffel. De Mixed-Staffel wurr sogor disqualifizeert. In' August 2014 is Dahlmeier bi dat Klautern in dat Zugspitzmassiv störrt un truck sück en Bänderriß an dat rechte Sprunggelenk as ok en Knakenprellung an' Knöchel to. Wegen disse Besehren un den dormit verbunnen Trainingsrückstand verpass se den Weltcup-Uptakt vun de Saison 2014/15 in Östersund un den tweeten Weltcup in Hochfilzen. To'n darten Weltcup in Pokljuka kunn Dahlmeier weer antreeden un reck, as beste Düütsche, Platz 9 Bi dat Sprintrennen in Antholz belegg Dahlmeier den darten Platz un stunn dormit eerstmals up en Podiumsplatz in' Weltcup.

An' 7. Februar 2015 gelung Dahlmeier in dat Sprintrennen vun Nové Město de eerste Eenzel-Weltcupsieg in hör Loopbahn, 1 Sekunn vör Franziska Hildebrand, de ehrn eersten Podestplatz fiern kunn. In de Generalproov to de Weltmeesterschap kunn se hör goot Form in den Sprint vun Oslo mit en tweeten Platz bestätigen. Bi de WM in Kontiolahti reck se in dat Sprintrennen trotz dree Scheetfehler aber mit Loopbesttiet vun all Deelnehmerinnen den veerten Platz. In de ansluuten Verfolgung wunn se mit Sülver hör eerst WM-Medaille. In dat Eenzelrennen stunn se mit twee Scheetfehler up Platz söss, wurr aber mit de Damenstaffel eerstmals Weltmeester.

Bi dat letzt Saisonrennen in Chanty-Mansijsk kunn se hör tweeten Weltcuperfolg fiern. An' Enn' vun de Saison leeg se in den Gesamtweltcup up Platz 8, ofschons se an acht vun 25 Rennen nich deelnommen harr. Dahlmeier fier in disse Saison hör eerst Siege un Podiumsplatzeeren. All tosommen keem se in acht Eenzelrennen up dat Podest un kunn sück 15 Mal ünner de Top-10 platzeeren, blots tweemal hett se dat nich schafft.

In de Saison 2015/16 kunn se an de eerst Statschoon in Östersund wegen Krankheit nich deelnehmen, wunn aber ansluutend in Hochfilzen de Verfolgung vör Maren Hammerschmidt un Gabriela Soukalova. Den Weltcup in Pokljuka fung se mit en tweeten Platz in Sprint an un verpass den Sieg blots um 1,1 Sekunn. An de folgen Dag schaff se bi dat Verfolgungsrennen hör veerten Weltcupsieg. Bi den Weltcup-Sprint an' 8. Januar 2016 in Ruhpolding (insprungen as Utdragensoort för Oberhof) belegg Dahlmeier den 4. Platz. An den nächsten Dag schaff se bi dat Verfolgungsrennen ehr fievten un noch weer een Dag later bi den Massenstart ehrn sössten Eenzel-Weltcupsieg.

Privatleven

Dahlmeier leevt in Garmisch-Partenkirchen. Se is de Dochter vun Andreas Dahlmeier un sien Ehefru Susi (borene Buchwieser). De Öllern weern Anfang vun de 1990er-Johren spoodriek Mountainbikefohrer un hemm mehrere natschonale un internatschonale Titel haalt. An' 1. August 2011 wurr Dahlmeier in dat Toll-Ski-Team upnommen un hett hör Utbillen in' eenfacken Deenst (Zollwachtmeisterin) afslooten. 2019 hett se hör Rückträe van den aktiven Sport bekannt geeven.

Utteknungen

För hör Leistungen hett Dahlmeier all verscheeden Utteknungen kreegen ünner annern 2013 as best Nahwussbiathletin vun de IBU.

Weblenken

Laura Dahlmeier. Mehr Biller, Videos oder Audiodateien to’t Thema gifft dat bi Wikimedia Commons.

• Offizielle Websteed
• Laura Dahlmeier in de Datenbank vun de IBU (engelsch)
• Laura Dahlmeier in de Datenbank vun de FIS (engelsch)
• Laura Dahlmeier bi den Düütschen Skiverband
• Laura Dahlmeier bi de Bundstollverwaltung