Leigh Richardson
Dit Woort hett noch annere Bedüden: kiek dorför ünner Lee Richardson.
Leigh Isaiah Allison Richardson (* 26. April 1924 in Puerto Castilla, Honduras; † 27. Oktober 2008 in New York, USA) weer en Journalist un Politiker ut Brietsch-Honduras (PUP, HIP).
Leven ännern
Richardson is 1924 in Puerto Castilla, Honduras, as een von negen Kinner von Leigh Richardson Sr. un Egzine Coffin boren.[1] Siene Öllern weren ut Brietsch-Honduras (dormals brietsche Kolonie, nu Belize) un in’t Öller von 5 is Richardson mit siene Öllern dorhen trüggtagen. Von 1937 af an weer he op dat St. John’s College in Belize-Stadt.[2] Na de School is he sülvs Schoolmeester worrn un hett an dat Wesley College Ünnerricht geven.[1]
Richardson hett sik för de Unafhängigkeit von Brietsch-Honduras insett, ünner annern in de Johren 1940 in de „Open Forum“-Bewegung.
He weer Mitgrünner von dat Belize Billboard, en polietsch Daagbladd, dat in de Johren 1940 un 1950 in Brietsch-Honduras rutgeven worrn is.[1] 1949 hett he een Johr lang Journalismus in London studeert un is in’n August 1950 trügg na Belize.[2] Nadem he ut London trügg weer, is he direkt Maat von dat People’s Comittee worrn, ut dat in’n September 1950 de People’s United Party (PUP) worrn is.
Ok in de General Workers’ Union weer Richardson aktiv un weer dor Gewerkschaftssekretär.
He is von Oktober 1951 bet August 1952 tohoop mit Philip Goldson as „Opröhrer“ in Haft kamen, nadem se an’n 17. Juni 1951 in en Artikel in dat Belize Billboard schreven harrn There are two roads to self government (Independence). Evolution and Revolution. We are now trying evolution. („Dat gifft twee Weeg, de na de Sülvsverwaltung (Unafhängigkeit) föhrt. Evolutschoon un Revolutschoon. Wi versöcht dat opstunns mit Evolutschoon.“).[2] Dat is von de brietsche Verwaltung so utleggt worrn, dat Goldson un Richardson as nächsten Schridd en Revolutschoon andrauht.
Nadem Richardson ut de Haft freekamen is, hett he den PUP-Parteivörsitt övernahmen (John Smith harr sien Amt freewillig afgeven un is na de USA gahn)[2] un hett de Partei to ehren eersten Wahlgewinn bi de Parlamentswahl 1954 föhrt.
Richardson sülvs weer bi düsse Wahl Kannedaat in’n Wahlkreis Belize West un hett de Wahl mit 71,7 % von de Stimmen gegen Lionel Francis von de NP un den unafhängigen Frederick Westby wunnen. Dormit weer he von 1954 bet 1957 Afornten von de Legislativversammlung. He weer in düsse Tied Member for Natural Resources (Vörlöper von dat Amt as Minister för Natürliche Ressourcen).
1956 hett binnen de PUP de Flögel ünner George Cadle Price de Bavenhand kregen un Price hett den Parteivörsitt von Richardson övernahmen. Dorüm sünd en Reeg Maten von’n Richardson/Goldson-Flögel ut de PUP rut un hebbt an’n 4. Oktober 1956 de Honduran Independence Party (HIP) grünnt. Richardson is Parteibaas worrn.
Bi de Wahl 1957 is Richardson för de HIP in’n Wahlkreis Belize West antreden un hett 26,7 % von de Stimmen haalt. Dormit kunn he sik nich gegen Albert Cattouse von de PUP dörsetten.
Över dat ganze Land rekent harr de HIP 18,3 % von de Stimmen kregen, wat en achtbor Resultaat weer. Dör dat Mehrheitswahlrecht in Brietsch-Honduras kunn de Partei aver nich een Afornten in de Legislativversammlung schicken.
An’n 21. Februar 1958 hett Richardson den Parteivörsitt von de HIP afgeven un is na Jamaika tagen. De HIP ünner Goldson hett sik en poor Maand later in’n Juni 1958 mit de National Party to de National Independence Party (NIP) tohoopslaten. Noch later, 1973, is de NIP in de United Democratic Party opgahn.
In Jamaika hett he as Journalist för’n Daily Gleaner arbeidt.[1] Ut Richardson siene Sicht weer dat en Exil, ok wenn dat dor keen Beleg för gifft, dat he von buten dwungen worrn is. Von Jamaika is he wieder na Trinidad tagen un weer dor Baas von dat Büro in Trinidad von dat jamaikaansche Newday Magazine.
Von Trinidad ut is Richardson later na New York in de USA tagen un hett dor bet an dat Enn von sien Leven wahnt. He harr toletzt Parkinson un is an’n 27. Oktober 2008 doodbleven.
Ehren ännern
Ofschoonst he al över 50 Johr buten Belize leven dee, is Richardson an’n 18. September 2008, as Belize 27 Johr Unafhängigkeit fiert hett, för sien Warken as Patrioot uttekent worrn un hett den Order of Distinction kregen.[2] Richardson sien Broderfro hett den Orden för em annahmen, denn Richardson sülvs weer to de Tied al to krank för en Reis na Belize.