Lisa Vittozzi

Lisa Vittozzi (* 4. Februar 1995 in Pieve di Cadore, Venetien) is en italieensch Biathletin.

Vittozzi 2023 in Oberhof

Anfänge

Lisa Vittozzi löppt för G.S. Fiamme Gialle. Hör internatschonal Debüt geev se in' Rahmen vun de Olympisch Jöögd-Winterspelen 2012 in Innsbruck. Bi de glieker Veranstaltung 2013 in Obertilliach wunn se in' Sprint achter Uljana Kaischewa de Sülvermedaille. De Juniorinnenrennen bi de Biathlon-Europameesterschapen 2014 in Nové Město na Moravě hemm hör de Ränge teihn in Sprint un Verfolgung inbrocht, in' Eenzel leep se achter Anastassija Jewsjunina un Anastassija Merkuschyna up den Bronzerang. Ehrn internatschonalen Dörbröök harr Vittozzi kört dornah bi de Biathlon-Juniorenweltmeesterschapen 2014 in Presque Isle. In Sprint un Verfolgung wunn se de Titel vör Anna Weidel, in' Eenzel muss se sück blots Julia Schwaiger slahn geeven. Mit Carmen Runggaldier un Rachele Fanesi keem se denn in de Staffel noch up den fievten Platz.

To dat Saisonfinale 2014 in' IBU-Cup in Martell kunn Vittozzi hör internatschonal Debüt bi de Fruen geeven. As 19. vun den Sprint wunn se ok glieks de eersten Punkte. In dat Mixed-Staffelrennen kunn se an de Siet vun Michela Ponza in deren letzt Karriererennen, Christian De Lorenzi un Markus Windisch den tweeten Rang un dormit hör eerst Podiumsplatzeeren recken.

Bi de Biathlon-Weltmeesterschapen 2015 reck se mit de italieensch Fruen-Staffel gemeensam mit Karin Oberhofer, Nicole Gontier un Dorothea Wierer de Bronzemedaille. Dormit wurr se de jüngste Medaillenwinnern vun de WM in Kontiolahti.

Upstieg in de Weltspitze (2015 bit 2019)

Vittozzi bi den Weltcup in Oberhof 2018

De Biathlon-Weltcup Saison 2015/16 broch hör an’t Enn‘n den 39. Platz in de Gesamtwertung, wobi Platz 13 in de Verfolgung vun Oslo hör best Eenzelergevnis bleev. Bi de Biathlon-Weltmeesterschapen 2016 keem se mit de italieensch Fruenstaffel up Platz 7, aber sonst to kien Insatz.

In de folgen Saison verbeter se sück in den Gesamtweltcup up Platz 27, reck mehrmals en Platz ünner de best Teihn un reck mit Platz 3 bi dat Verfolgungsrennen in Kontiolahti sogor en Podestplatz. Bi de Biathlon-Weltmeesterschapen 2017 in Hochfilzen verpass se mit Platz 4 in‘ Sprint blots knapp en Medaille. In de Verfolgung full se nah dree Scheetfehler up Platz 14 torüch bleev aber noch vör hör Landsfru Alexia Runggaldier. In‘ Eenzel bleev se mit Platz 36 ünner hör Mögelkeiten. In‘ Massenstart bleev se ahn Fehler un keem up Platz 11. Ok in de Staffelwettbewarfen wurr dat nichts mit en Medaille. Mit de Fruenstaffel reck se den 5. Platz un in de Mixed-Staffel bleev se as eenzige vun dat italieensch Team ahn Fehler un reck Platz 4.

2017/18 stunn se as Sösste eerstmals ünner de best Teihn in’t Weltcup un in’n März 2019 wurr se achter hör Mannschapskollegin Dorothea Wierer Tweet in’n Gesamtweltcup.

Wiels disse Johren fier Vittozzi hör eerst beid Weltcupsiege in Eenzelrennen: In’n Januar 2019 hett se in Oberhof sowohl den Sprint (vör Anaïs Chevalier un Hanna Öberg) as ok de Verfolgung (vör Anastasiya Kuzmina un Chevalier) för sück entscheeden, wobi se in’n Sprint mit all teihn Schööt drapen dee un in de Verfolgung vun de tweet Runn an en klaren Vörsprung up de Konkurrentinnen harr, de se trotz twee Straafrunnen bit in’t Teel hollen dee. Todem reck se in’n Weltcup noch mehrere Podestplätze.

Bi de Weltmeesterschapen 2019 in Östersund wunn se in den 15-Kilometer-Wettkamp de Sülvermedaille un schoot dorbi as de Siegerin Hanna Öberg kien Fehler. Över de gesamte Saison 2018/19 harr Vittozzi en Drapensquote vun 88 % un hörr dormit to de sekersten Schütten in’n Weltcup, wobi se besünners Stark in’t Stahndscheeten mit en Quote vun 91 % weer. Hör Looptieden weern um etwa 3 Perzent flinker as de Dörsnitt vun dat Feld. Dormit bleev se woll achter de best Löperinnen um Denise Herrmann un Kaisa Mäkäräinen torüch, weer aber in etwa gliek stark as Dorothea Wierer un Laura Dahlmeier. Bit to dat Weltcupfinale in Oslo stunnen Wierer un Vittozzi in Konkurrenz um den Gesamtweltcup, den Wierer letztlich mit 23 Punkten Vörsprung wunn. Vittozzi kunn aber den Disziplinenweltcup in‘t Eenzel up hör Naam schrieven.

Tosätzlichen Spood harr Vittozzi as Staffelliddmaat: In’n Dezember 2015 weer se Startlöperin vun dat Quartett um Karin Oberhofer, Federica Sanfilippo un Dorothea Wierer, dat in Hochfilzen to’n eersten Sieg vun en italieensch Fruenstaffel in de Weltcupgeschichte leep. Dree Johr later hett de Staffel (nu mit Alexia Runggaldier anstäe vun Oberhofer) dissen Spood nochmals henkreegen un ok weer in Hochfilzen. Bi hör eerst Olympiadeelnahm bi de Spelen 2018 in Pyeongchang wunn Vittozzi mit de Mixed-Staffel an de Siet vun Wierer, Lukas Hofer un Dominik Windisch de Bronzemedaille, ebenso 2019 bi de Weltmeesterschapen. Af den Sömmer 2018 wurrn disse veer Athleten in en geslechtergemischten Elite-Trainingsgrupp afsünnert vun de anner italieensch Kaderathleten vun Andreas Zingerle un Andrea Zattoni traineert.

Nahlaatend Scheetleistungen un Ergevnisse (2019 bit 2022)

Vittozzi kunn in de Johren nah den tweeten Platz in’n Gesamtweltcup 2018/19 nich an de Resultate vun hör bit dorhen spoodriekste Saison anknütten. Vör allen in’t Liggendscheeten wurr se schlechter: vun etwa 85 % in de Saison 2018/19 up 60 % in‘n Winter 2021/22. De italieensch Natschonaltrainer Andreas Zingerle hett in en Interview in‘n April 2022 seggt, dat dat Betrüerteam harr – ahn erkennbare Wirkung – an Vittozzi hör Scheetpositschoon, an dat Omen un an hör Gewehr arbeit. In sien Oogen hannel sück dat nich um en technisch Problem, wiel de Athletin in den Staffeln ok meest goot schaaten harr. Vittozzi hett tegenöver de Gazzetta dello Sport seggt, dat se völ mit en Mentaltrainer tosommenarbeiten dee. En Grund för de nahlaaten Leistungen weer buterdem de Infektschoon mit COVID-19 kört vör Anfang vun de Saison 2020/21 ween, de hör in de entscheeden Phase vun de Vörbereitung torüchschmeeten harr.

2019/20 reck Vittozzi den 10. Rang vun den Gesamtweltcup un reck twee Eenzel-Podiumsergevnisse. Mit de Mixed-Staffel wunn se todem den Weltcupauftakt in‘n November 2019 in Östersund un later bi de Heimweltmeesterschapen 2020 in Antholz de Sülvermedaille achter dat Team ut Norwegen. De Winter 2020/21 leep weer nich so goot. Vittozzi keem in den Grsamtweltcup up den Rang 16 un reck eenmal dat Podium bi den Sprint vun Nové Město. Dat Johr dorup leep noch schlechter. In kien een Eenzelwettkamp reck se dat Podest un keem in de Gesamtwertung up Rang 31.

In’n Gegensatz dorto wurr se bi de Sömmerbiathlon-Weltmeesterschapen 2022 en vun de spoodrieksten Athletinnen. Weer se in’n Supersprint noch vun hör Landsfru Dorothea Wierer up den tweeten Platz verwiest wurrn, kunn se an den folgenden Dag den Sprint vör Marketa Davidova up hör Naam schrieven.

Rückkehr in de internatschonale Spitze un Weltmeestertitel (siet 2022)

In‘n Sömmer 2022 hett en nee Trainerstaff um Alexander Inderst un Jonne Kähkönen dat italieensch Natschonalteam övernommen. In dat nee Umfeld wurrn de Leistungen vun Vittozzi weer beter. In de Weltcupsaison 2022/23 kunn se weer an de Erfolge ut den Winter 2018/19 anknüppen. In söben Eezelwettkämpen reck se dat Podest. In dat 15-Kilometer Eenzelrennen kunn se an’n 12. Januar 2023 in Ruhpolding sogor to’n eersten Mal nah veer Johren winnen. In den Gesamtweltcup keem se an dat Enn’n vun de Saison up Rang 3 achter Julia Simon un hör Teamkollegin Dorothea Wierer. Buterdem wunn se as ok all 2018/19 den Eenzel-Disziplinenweltcup. Bi de Weltmeesterschapen 2023 führ Vittozzi dat italieensch Fruenquartett as Slusslöperin to de eerst Staffelgoldmedaille. Todem wunn se bi de Weltmeesterschapen in Oberhof Sülver mit de Mixed-Staffel as ok Bronze in 15-Kilometer-Rennen un in de Single-Mixed-Staffel mit Tommaso Giacomel. Den Grund för hör Leistungsanstieg – vör allen för de düütliche Verbetern an’n Scheetstand – seech Vittozzi insbesünnere in de Tosommenarbeit mit de Scheettrainern Kähkönen un Edoardo Mezzaro. De beid Betrüüer harrn hör weer Lichtigkeit un Spaß vermittelt, todem harr se hör Scheetschema ännert, um sück vun olt Gewohnheiten to lösen.

Im November 2023 wunn se dat eerste Eenzelrennen vun de Saison 2023/24. Se wurr in den Eenzelwettkamp in Östersund Eerste mit en Teihntelsekunn Vörsprung up Franziska Preuß. Dornah geev dat wiedere Podestplätze, dorünner Platz 3 in’n Sprint vun Ruhpolding, worup in de Verfolgung Platz 1 herutkeem (vör Ingrid Landmark Tandrevold, Juni Arnekleiv, Lou Jeanmonnot un annern). To dat Enn’n vun de Saison wurr se aber immer starker un wunn in Sprint un Verfolgung in Canmore un seker sück dormit de Weltcup-Gesamtwertung in disse Saison. Dorto keem ok noch de Gewinn vun den Eenzelweltcup un den Verfolgungswettkamp.

Bi de Biathlon-Weltmeeiterschapen 2024 wurr se in’t Eenzel Weltmeesterin vor Janina Hettich-Walz und Julia Simon, reck in’n Sprint Platz 7 un keem in de Verfolgung up Rang 2, ebenso in’n Massenstart. Ok in de Single-Mixed-Staffel wunn se an de Siet vun Tommaso Giacomel noch Sülver.

Apenlich Bild

Italieensch Weltmeesterstaffel van 2023: Samuela Comola, Dorothea Wierer, Hannah Auchentaller un Lisa Vittozzi (vun links nah rechts)

De Erfolge vun Lisa Vittozzis un Dorothea Wierer hemm in de laat 2010er Johren mit dorto führt, dat de Biathlonsport in Italien mehr in den Blickpunkt keem. Dorbi speel ok dat Verhältnis vun de beid Teamkolleginnen en Rull, besünners af de Saison 2018/19, in de se de Ränge een un twee in’n Gesamtweltcup beleggen deen. In en Interview wiels dat Winter hemm beid seggt, dat se goot mitnanner utkommen, aber kumplett verscheeden Charaktere weer: Wierer hett Vittozzi as „viel ruhiger und konzentrierter“ as se sülvst betekent un hör beschienigt – anners as sück – „[d]en Willen, stundenlang hart zu arbeiten“. Vittozzi up de anner hett seggt, dat se sück in hör gesamte Karriere an de fief Johr öllere Wierer orienteert harr un „jeden Tag mit dem Ziel trainiert, zu ihr aufzuschließen“. Ok medial wurr Vittozzi as „bescheiden“ oder ok „[u]nscheinbar“ beschreeven, in’n Gegensatz to de as extroverteert gellend Wierer.

Vör de Heimweltmeesterschapen 2020 in Antholz kreeg en Interview vun Vittozzi mit dat Lokalblatt Messaggero Veneto breet mediale Upmarksomkeit. Dorin hett de kritiseert, dat Wierer de Staffel bi den Weltmeesterschapen 2019 in’n Gegensatz to hör utlaaten harr, wordör hör Konkurrentin sück länger för den ansluuten Massenstart harr verhaalen kunnt. Wierer weer vun de Utseggen vun Vittozzi „enttäuscht“ un hett dat törüchwiest, beid hemm aber dorup henwiest, dat de Konflikt överdreeven dorstellt un nah en Utspraak bileggt wurrn weer. In dat eerst WM-Rennen leepen Vittozzi un Wierer denn gemeensam mit Lukas Hofer un Dominik Windisch to de Sülvermedaille in de Mixed-Staffel.

Weblenken

• Lisa Vittozzi in de Datenbank vun de IBU (engelsch)
• Lisa Vittozzi in de Datenbank vun de FIS (engelsch)
• Porträt up de Websteed vun den italieenschen Verband