Littlemill

Littlemill
Land	Schottland
Region	Lowlands
Tyyp	Malt
Status	afbrennt (2004); stillleggt (1992)
Besitter	–
Grünnt	1772
Grünner	ü.a. Hector Henderson
Architekt	Glen Catrine Bonded Warehouse
Waterborn	Auchentorlie Burn
Washstill(s)	1 × 25.000 l
Spiritstill(s)	1 × 18.000 l
Produkschoonsvolumen	800.000 l

Littlemill weer en Whisky-Brenneree in Bowling, West Dunbartonshire Schottland. Enkelte Bowarken vun de Brenneree, de överduert hebbt, sünd in de schottischen Denkmollisten in de Kategorie B inordent.

Historie

De Destille weer op dat Rebeet vun en olle Broeree ut dat 14. Johrhunnert twüschen Glasgow un Dumbarton inricht. Grünnt weer de Brenneree Littlemill 1772. Se weer dormit de öllste Brenneree vun Schottland. Erste Oorkunnen vun’n Besitt stammt ut dat Johr 1817. Se weer vun Hector Henderson mitopboet, de 1846 Caol Ila grünnt hett. Ünner William Hay geev dat 1875 en Renoveren vun Grund op. Dorna hett de Brenneree bannig faken ehrn Besitter wesselt. 1988 is se opletzt bi Gibson International lannt, de 1992 de Destille stillleggt hebbt. As dat Ünnernehmen 1994 bankrott gahn is, is de Brenneree tosamen mit Glen Scotia an de Glen Catrine Bonded Warehouse gahn. De Produkschoon is aver nich wedder anlopen. 1996 is de Anlaag deelwies afboet worrn. De Lizenz liggt bi de Littlemill Distillery Co. Grote Deelen vun de Brenneree sünd an’n 4. September 2004 dör en Füür tonichten maakt worrn. In’n Mai 2006 sünd de Deelen, de överbleven sünd in sik tosamen fallen.

Produkschoon

Littlemill tell to dat schottische Whiskyrebeet Lowlands. Dat Water för de Produkschoon stamm ut den Auchentorlie Burn in de Kilpatrick Hills, de al to de Highlands tellt. De Anlaag barg inst en Meeschfatt vun fief Tünnen un en Gäärfatt vun 25.000 l. Brennt weer in en washstill vun 25.000 l un en spirit still vun 18.000 l. De Brennblasen weern mit Damp hitt maakt. In’t Johr weern ruchweg 800.000 l Whisky produzeert. In de Johren vun 1875 un 1930 is in Littlemill dreefack destilleert worrn.

Blangen den Littlemill sülvst, weer in de Brenneree en Tiet lang ok Dunglass un de törfige Dumbuck herstellt. Disse Affüllen sünd vundaag kuum noch to finnen un sünd as Sammlerstücken veel söcht.

Kiek ok

• List vun de schottischen Brennereen