Caol Ila

Caol Ila ([kʌl iːlə]; „Islay-Sund“) is en Whisky-Brenneree op dat Eiland Islay in Schottland. Se produzeert verschedene Single-Malt-Whiskys, dorünner ok een vun de dörteihn so nöömten Classic Malts.

Caol Ila
Brenneree Caol Ila
Land	Schottland
Region	Islay
Tyyp	Malt
Status	aktiv
Besitter	Diageo
Grünnt	1846
Grünner	Hector Henderson
Waterborn	Loch nam Ban
Washstill(s)	3 x 35.345 l
Spiritstill(s)	3 x 29.549 l
Produkschoonsvolumen	6.500.000 l

Historie

En Buddel Caol-Ila-Whisky

De Brenneree Caol Ila is 1846 vun Hector Henderson – de ok Littlemill mit opboet hett – in en Bucht an de Oostküst vun Islay grünnt worrn. De Destille liggt ’n beten nöördlich vun Port Askaig direkt an’n Islay-Sund an’t nöördliche Enn vun de hüütige Straat A 846. Keen fief Kilometer wieter na Noorden to liggt mit Bunnahabhain en wietere Islay-Brenneree.

In’t Johr 1854 hett Norman Buchanan de Brenneree övernahmen, de to de Tiet ok de Brenneree Isle of Jura bedreven hett. 1863 güng Caol Ila an Bulloch, Lade & Co., de de Destille 1879 utboet un renoveert hebbt. 1920 is de Brenneree vun Robertson & Baxter övernahmen worrn, söven Johr later güng se an de Distillers Company Limited (DCL), de dat operative Gewarf 1930 an dat Dochterünnernehmen Scotish Malt Distillers (SMD) överdragen hett. Bit 1937 weer se denn stillleggt. De Produkschoon weer denn vun 1941 bit 1945 wedder ünnerbroken.

Vun April 1972 bit Januar 1974 is de Destille vun Grund op renoveert worrn. Ok in disse Tiet, weer de Produkschoon vullstännig ünnerbroken. De Tall vun de Brennblasen is vun twee op söss wossen. DCL is 1987 in dat Ünnernehmen United Distillers (UD) un 1999 denn to Diageo worrn. De Dochter SMD heet vundaagUnited Malt and Grain Distillers (UMGD) un besitt de Lizenz, de bit 1992 noch bi Bulloch, Lade & Co. leeg. De Originalaffüllen vun den Single Malt sünd siet 1988 wedder op’n Markt to kriegen.

Produkschoon

De Destille hett en Meeschfatt (Mash tun) vun 11,5 Tunnen ut Eddelstahl un teihn Gäärfatten (Wash backs) to 63.000 l ut Lärkenholt. Brennt warrt de Whisky in dree Wash stills to 35.345 l un dree Spirit stills to 29.549 l, de mit Damp hitt maakt warrt. Dat Molt warrt vun Port Ellen Maltings anköfft un bargt ruchweg 30 ppm Phenol. Dat Water för de Produkschoon stammt ut den Loch nam Ban (Torrabolls Loch).

Blangen de egen Lagerhüüs warrt vun de Destille ok de Lagers vun de Brenneree Lochindaal in de Neeg vun Port Charlotte bruukt, de al 1929 dicht maakt worrn is. De Produkschoon liggt jeed Johr bi mehr as 6.000.000 Liter Whisky. De gröttste Deel vun de Produkschoon warrt versneden un to’n Bispeel för de Blends vun Bulloch Lade oder den Vatted Malt Glen Ila bruukt.

Kiek ok

• List vun de schottischen Brennereen

Literatur

• Charles MacLean (Rutgever): Whisky. World Guide, Regions, Distillers, Malts, Blends, Tasting Notes. Dorling Kindersley, London et al. 2008, ISBN 978-0-7566-3349-3.
• Walter Schobert: Das Whiskylexikon. Fischer Taschenbuch Verlag, Frankfort an’n Main 2003, ISBN 978-3-596-15868-3.

Weblenken

Caol Ila. Mehr Biller, Videos oder Audiodateien to’t Thema gifft dat bi Wikimedia Commons.