Louis Paulsen

Hermann Louis (Ludwig) Paulsen (* 15. Januar 1833 in Gut Nassengrund bi Blomberg, Förstendom Lippe; † 18. August 1891 ok dor) weer en vun de starkst Schachspeler vun dat 19. Johrhunnert ut Düütschland.

Louis Paulsen in de 1850er oder 1860er Johren

De Schachfamilie

He stamm ut en schachbegeisterten Gootsbesitterfamilie (sien Vader Dr. Carl Paulsen weer Buer un Kartuffeltüchter). Sien öllere Bröer Wilfried Paulsen (1828–1901) weer ok en Schachmeester. De hett aber nich so völ an Turnieren deelnommen un hett sück mehr dorup konzentreert, de Landwertschap vun den Vader wieder to führen.

De middlere Bröer Ernst speel wesentlich swaaker, he is 1854 in de USA utwannert. Ok de öllere Süster Amalie (later Amalie Lellmann) (1831–1869) hett dat Schachspeel lehrt un hett dat to en överdörsnittlich Speelstärke brocht, hett sück aber dorup beschränkt, Louis antospornen un so sien Karriere to fördern.

Schachloopbahn

Louis Paulsen un Paul Morphy 1857 in New York

Paulsen sülvst gung 1854 ok in de USA un keem dor bald to en hooch Ansehn as Schachspeler. To'n grooten Deel weer dat up sien Fähigkeit in dat Blindspeel torüchtoführen. Nah söss Johren kehr he weer nah Europa torüch, wo he gegen de beropensten Speler mit Spood kämpen dee. In dat New Yorker Turnier van 1857 muss sück Louis Paulsen blots den to de Tiet besten Speler vun de Welt, Paul Morphy, slahn geven. In de Johren 1871, 1878 un 1880 wunn he de Mesterschapen vun den Westdüütschen Schachbund. 1877 in Leipzig wurr he Eerst vör Adolf Anderssen un Johannes Hermann Zukertort bi den Kongress vun den Middeldüütschen Schachbund. Tweet achter Berthold Englisch wurr he bi den 1. Kongress vun den Düütschen Schachbund 1879 in Leipzig.

Wegen sien unspektakuläär, in' Gegensatz to völ anner Speler vun sein Tiet ehrder defensiv utricht Speelstil weer Paulsen nich so bekannt as Adolf Anderssen, ofschons he gegen de en positive Bilanz uptowiesen harr. He hett dree Wetkämpe gegen sien beropen Landsmann speelt, vun de een (London 1862) 4:4 (+3-3=2) to Enn' gung, aber twee (beid in Leipzig) Paulsen för sück entscheeden kunn: 5,5:4,5 (+5-4=1) 1876 un 5,5:3,5 (+5-3=1) 1877. Nah de Historsch Elo-Tall weer Louis Paulsen tüschen 1862 un 1878 all tosommen 39 Maand lang de Nummer een vun de Welt.

Paulsen is 1891 an Diabetes storven.

Nahwirkung

Ludwig Rellstab versöcht de schachgeschichtliche Bedüüden vun Paulsen ünner Betoog up dat Oordeel vun den eersten offiziellen Schachweltmeester intoschätzen. Wilhelm Steinitz haarr lobend anerkannt, wu völ he Paulsen verdanke, un 1890 schreeven: „Anderssen und Paulsen waren meine eigentlichen Lehrer für eine beträchtliche Zeit.“ Bi dat Londoner Turnier 1862 hett Steinitz Anderssen un Kolisch persönlich kennenlehrt un hett sück later erinnert: „Als ich sie zuerst traf, drückte ich mich sehr absprechend über Paulsens Spielweise aus. Diese beiden Meister verteidigten Paulsen jedoch gegen meine allgemeine Kritik, und das brachte mich zum Nachdenken.“ Steinitz betekent Louis Paulsen as en hervörragen Pionier vun de modern Schachschool: „Paulsen lenkte die Aufmerksamkeit zuerst darauf, daß zwei Läufer gegen Läufer und Springer oder zwei Springer überlegen sind.“

Nah hüm − bzw. oorsprünglich nah sien ölleren Bröer Wilfried − is de Paulsen-Variante in de Siziliaansch Verteidigung nömmt wurrn.

De Schachvereen vun de Stadt Detmold is hüm to Ehren „Schachgemeinschaft Detmold DSK 62 / SC Paulsen 1900 e.V.“ nömmt. Dat Vereensliddmaat Horst Paulussen hett sück as Biograph vun Paulsen de Pleeg vun sien Andenken un sien Nahlass zo Upgaav maakt. Vun hüm stammt dat Book Louis Paulsen 1833-1891 und das Schachspiel in Lippe 1900-1981, Ein Beitrag zur Geschichte des Deutschen Schachspiels (Detmold 1982, herutgeven vun den Lippischen Heimatbund, Verlag Topp und Möller).

Literatur

• Horst Paulussen: Louis Paulsen 1833 - 1891 und das Schachspiel in Lippe 1900 - 1981. Verlag Topp und Möller, Detmold 1982
• Helmut Wieteck: Paulsen,Louis. In: Neue Deutsche Biographie (NDB). Band 20, Duncker & Humblot, Berlin 2001, ISBN 3-428-00201-6, S. 127 f.

Weblenken

• Nahroop up Louis Paulsen (engelsch) rutkommen in de New York Times
• Schachpartien vun Louis Paulsen up chessgames.com (engelsch)