Marcial G. Mes (* 31. Oktober 1949; † 26. Mai 2014 bi Yemeri Grove) weer en Politiker ut Belize (PUP).

Mes is 1949 as Söhn von Rosalia Cal un Bartolo Mes boren.[1][2] He weer verheiraadt mit Odelia Mes.[1] De beiden harrn dree Söhns un fiev Döchter.[1]

Bi de Parlamentswahl in Belize 1998 weer he Kannedaat för de PUP in’n Wahlkreis Toledo West un hett de Wahl mit 65,58 % von de Stimmen gegen Wilfred Dennis Usher von de UDP wunnen. Bi de Wahl 2003 weer he in’n sülven Wahlkreis Kannedaat un hett de Wahl mit 54,45 % von de Stimmen wedder gegen Usher wunnen. Bi de Wahl 2008 dorgegen hett he blots 34,39 % kregen un keem op’n tweten Platz achter Juan Coy von de UDP un vör Fermin Choc von de NRP.

Dormit weer he von 1998 bet 2008 Afornten von dat Repräsentantenhuus von Belize. He is 1998 ünner Premierminister Said Musa Minister för Kultur un för Ländliche Entwicklung in dat Kabinett Musa I worrn. Dat Amt as Minister för Kultur hett he an’n 15. Oktober 2001 an Mark Espat afgeven.

Na de Wahl 2003 hett Mes in dat Kabinett Musa II dat Ministerium för Ländliche Entwicklung afgeven un is Minister för Minschliche Entwicklung, Lokale Verwaltung un Arbeid worrn.[3]

Dat Amt as Minister för Minschliche Entwicklung hett he an’n 5. Januar 2004 afgeven.[4] An’n 29. Dezember 2004 hett he dat Amt as Minister för Ländliche Entwicklung tokregen. An’n 14. Juli 2005 hett he all siene Ministerposten för Ländliche Entwicklung, Lokale Verwaltung un Arbeid verloren un is Minister ahn Portfolio worrn.[5]

An’n 12. April 2006 is he Staatsminister in dat Ministerium för Natürliche Ressourcen worrn, is aver al en poor Daag later, an’n 18. April 2006, in dat Ministerium för Natschonale Entwicklung ünner Minister Mark Espat versett worrn un weer dor för Ländliche Entwicklung tostännig.[6]

An’n 28. Januar 2007 hett Mes an’n Southern Highway in Forest Home twee Kinner anföhrt un swoor versehrt.[7] De Verdacht bestünn, dat he duun föhrt is, man Mes hett en Alkoholtest aflehnt.[7] Dorüm is he an’n 30. Januar von sien Amt as Staatsminister suspendeert worrn, bet de Verdacht juristisch klärt is. Nadem en Gericht Mes ut Mangel an klore Bewiesen freespraken harr, dröff he sien Amt wedder opnehmen.[7]

An’n 4. Juni 2007 is he as Staatsminister in dat Ministerium för Bildung wesselt, wat he bet to de Wahl 2008 bleven is.[8]

An’n 26. Mai 2014 is Mes na en Verkehrsunfall op’n Southern Highway bi Yemeri Grove doodbleven.[1] He weer op’n Weg von Punta Gorda na sien Heimaatoort San Marcos.[1] Siene Truurfier weer an’n 30. Mai in de röömsch-kathoolsche Kark von San Pedro Columbia.[1][2]

Footnoten ännern

  1. a b c d e f Former Minister Marcial Mes dies in traffic accident, San Pedro Sun an’n 28. Mai 2014
  2. a b Marcial G. Mes, Belize Times an’n 1. Juni 2014, Sied 15
  3. Janelle Chanona: New 13 member Cabinet sworn in, Channel 5 Belize an’n 7. März 2003
  4. Cabinet has new look for 2004, Channel 5 Belize an’n 5. Januar 2004
  5. Latest Cabinet shuffle reduces number of ministries, Channel 5 Belize an’n 14. Juli 2005
  6. More Ruffled Feathers in Musa's Cabinet, 7 News Belize an’n 19. April 2006
  7. a b c Keisha Milligan: Marcial Mes – no case to answer, Amandala an’n 26. April 2007
  8. Deputy Prime Minister John Briceno Resigns, Eamon Courtenay Joins Him, 7 News Belize an’n 4. Juni 2007