Martin Oldenstädt

Martin Oldenstädt (* 27. November 1924 in Baarnstrup; † 21. November 2004 in Veern) weer en düütschen Inschenör un Politiker von de CDU.

Kannedatenplakaat von Oldenstädt to de Bundsdagswahl 1980

Leven

Oldenstädt is 1924 in Baarnstrup boren. Na de School un sien Kriegsdeenst as Offzeer bi de Marien hett he 1948 en Studium in Vermessungswesen an de Technische Hoochschool Hannover anfungen, dat he 1958 mit dat twete Staatsexamen un 1960 mit de Promotschoon as Dr. ing. afslaten hett. Von 1951 af an weer he Mitarbeider in en Vermessungsbüro und is 1959 as Vermessungsinschenör tolaten worrn.

Oldenstädt weer 1960 Mitbegrünner von en Vermessungsbürogemeenschop in Wittörp, von de he later dat Leid övernahmen hett. Von 1963 bet 1987 weer he Viez-Vörsitter un von 1987 bet 1989 Geschäftsföhrer von’n BDVI. 1995 güng he in Rohstand.

Politik

Bi de Bundsdagswahl 1972 is Oldenstädt över de Landslist von de CDU Neddersassen in’n Düütschen Bundsdag wählt worrn. He weer Maat in’n Utschuss för Bildung un Wetenschop. Bi de Bundsdagswahl 1976 is he nich wedder in’n Bundsdag intagen. Eerst an’n 11. September 1979 is he över de Landslist von de CDU Neddersassen narückt, nadem de Afornte Philipp von Bismarck sien Mandaat dalleggt harr. Von 1980 bet 1987 weer Oldenstädt Maat in’n Utschuss för Verdeffenderen. Bi de Bundsdagswahl 1983 is he mit 46,6 % von de Eerststimmen as Direktkannedaat in’n Wahlkreis Veern wählt worrn. 1987 is he ut’n Bundsdag utscheden.

Literatur

• Rudolf Vierhaus un Ludolf Herbst (Rutgevers): Biographisches Handbuch der Mitglieder des Deutschen Bundestages 1949–2002. Band 2, N–Z, Saur, München 2002, ISBN 3598-23782-0, Sied 618