Mary Outerbridge

Mary Ewing Outerbridge (* 9. März 1852 in Philadelphia, Pennsylvania; † 3. Mai 1886 in New York) weer en Pionierin van den modernen Tennis in den USA. Se wurrd ok as „Moder“ van den amerikaanschen Tennis bezeichnet.

Biographie

Outerbridge wurr 1852 in Philadelphia as Dochter vun Alexander Ewing Outerbridge un sien Fru Layura Catherine Harvey boren. Later is se in den New Yorker Stadtteil Staten Island trucken. Bi en Besöök bi Verwandten up Bermuda um dat Johr 1874 rüm hett se dat vun Walter Clopton Wingfield in dat sülvig Johr utfunnen moderne Tennis dör engelsch Suldaten kennen lehrt. Later hett se up dat Gelände vun den Staten Island Cricket Club en Tennisfeld upbaut. De Präsident van den Club, August Emilius Outerbridge, weer hör Bröer. Up dat Gelände vun den Club funn 1880 de eerste amerikaansch Tennismeesterschap statt. O. E. Woodhouse ut England, de sück in den USA uphollen dee, hett dat Turnier wunnen.

Outerbridge is all 1886 in dat Öller vun 34 Johren storven. 1981 wurr se in de International Tennis Hall of Fame upnommen.

In de 1930er Johren hemm Malcolm Whitman, as ok later William Henderson, de Ansicht vetrtreeden, Outerbridge harr all Anfang 1874 en Set nah Nordamerika inführt un somit dat eerste Tennis up amerikaansch Bodden speelt. Dat gellt aber intüschen as twiefelhaft, wiel Wingfield sien Regelbook, dat tosommen mit den Sets verköfft wurr, eerst an’n 25. Februar 1874 herutbrocht wurr. Wohrschienlicher is, dat se eerst in’n Mai 1875 vun en wiederen Upenholt up Bermuda dat Tennisset mitbrocht hett. Um 1874 wurr buterdem vun James Dwight, den „Vader“ vun den amerikaanschen Tennis, bi Boston Tennis speelt, dorneben vermootlich ok up en Farm in Arizona.

Borns un Weblinks

• B. Collins: History of Tennis. 2. Uplaag. New Chapter Press, New York 2010, ISBN 978-0-942257-70-0, S. 624.
• Mary Outerbridge in de International Tennis Hall of Fame (engelsch)