Matthäus-Kark (Brouk)

De Matthäus-Kark is en Kark von de Sülvstännige Evangeelsch-luthersche Kark in dat Dörp Brouk (Gemeen Kerklinneln). De Karkengemeen hett üm un bi 120 Maten. Ehren Naam hett se von’n Apostel Matthäus.

Historie

Ünner dat Inwarken von de Erweckungsbewegung von Louis Harms sünd in’t Vörjohr 1879 söss Familien ut Brouk un ümto ut de Landskark Hannover uttreden. Toeerst harrn se sik in Holbm drapen, üm Goddsdeenst to fiern. Aver de Buur Badenhoop ut Brouk hett denn in’n August 1879 beslaten, Land hertogeven, üm dor en Kapell op to boon. He sülvs hett noch in’n sülven Maand anfungen, de Kapell to boon. De Goddsdeenst weer in de Botied bi Badenhoops op de Deel. Nadem de Kapell trech weer, is se an’n 5. November 1879 von Theodor Harms inwieht worrn. To düsse Tied bestünn de Gemeen ut üm un bi 40 Maten. De Karkengemeen hett sik de Hannöversche evangeelsch-Luthersche Freekark anslaten.

An’n 21. Dezember 1888 is de eerste Klock ophängt worrn in en Klockentoorn, de dor extra för boot worrn is. Vondaag hängt disse Klock in’n Karkentoorn.

1885 hett Johann Hinrich Badenhoop de Karkengemeen en Hüßelhuus schenkt, dat to en Parrhuus utboot worrn is. 1926 is blangen dat ole Parrhuus en neet Parrhuus boot worrn.

Bet 1901 weer de Gemeen so wussen, dat de Kapell nich mehr utreckt hett. Nu hett de Hoffbesitter Georg Rosebrock Land geven, üm dor de hüdige Kark to boon, de an’n 16. April 1902 inwieht worrn is. De Kark is 18 Meter lang un 11 Meter breed. De Karkentoorn is 3,5 Meter lang, 4 Meter breed un 18 Meter hoog. De Kark harr dree Emporen, op de beiden Sieden un achtern. Allens tohoop harr se Platz för 400 Lüüd.

1960 is de Kark ümboot worrn. Ünner annern sünd de Emporen an de Sied rutkamen un de Süüdgevel hett en grötter Altarfinster kregen. Na disse Arbeiden hett de Kark noch 200 Plätz. Se is an’n 14. August 1960 nee inwieht worrn.

1945 is de Hannöversche evangeelsch-Luthersche Freekark Deel von de Sülvstännige Evangeelsch-luthersche Kark worrn, de sik 1972 noch wedder mit annere Verbänn to de hüdige Sülvstännige Evangeelsch-luthersche Kark tohoopslaten hett.

Örgel

De eerste Örgel hett de Kark 1917 kregen. Se harr een Manual un söss Registers. De Örgel harr keen Pedaal. 1948 is de Örgel ümboot worrn un hett en Pedaal kregen. 1976 is de Örgel noch wedder ümboot worrn un harr nu twee Manuals un negen Registers.

Pastoorn

• 1879–1900: Christoph Meyer
• 1900–: Ahlert Dierks
• ~1926: Johannes Körtje
• 1956–1966: Ferdinand Bellin
• opstunns: Andreas Otto

Weblenken

• Websteed von de Karkengemeen (hoochdüütsch)