Melvin Hulse

Melvin Hulse (* 1947) is en Politiker ut Belize (UDP).

Leven

Hulse is 1947 as Söhn von Melvyn Hulse Sr. boren, en Landbesitter in dat Stann Creek Valley, de ut England na Brietsch-Honduras utwannert weer. He is op en Farm bi Valley Community opwussen. Hulse weer op dat Lynam College un hett in de British Honduras Volunteer Guard deent.

Hulse is verheiraadt mit Michelle Rodriguez.

Politik

Bi de Parlamentswahl in Belize 1989 weer he Kannedaat för de UDP in’n Wahlkreis Stann Creek West un hett de Wahl mit 49,4 % von de Stimmen gegen Conrad Lewis von de PUP wunnen. Bi de Wahl 1993 weer he in’n sülven Wahlkreis Kannedaat un hett mit 50,8 % von de Stimmen wedder gegen Conrad Lewis von de PUP wunnen. Bi de Wahl 1998 dorgegen hett he blots noch 37,41 % haalt un kunn sik nich gegen Henry George Canton von de PUP dörsetten.

Dormit weer he von 1989 bet 1998 Afornten von dat Repräsentantenhuus von Belize. In düsse Tied weer he ünner Premierminister Manuel Esquivel von 1993 bet 1998 ok Minister för Apentliche Arbeiden in dat Kabinett Esquivel II.

Bi de Wahl 2003 is Hulse nich antreden, weer bi de Wahl 2008 aver wedder Kannedaat in’n Wahlkreis Stann Creek West. He hett sik dor mit 56,60 % gegen Rodwell Stephen Ferguson von de PUP dörsett. Bi de Wahl 2012 is he wedder gegen Ferguson antreden, kunn sik dütmaal mit 44,06 % von de Stimmen aver nich dörsetten.

Dormit weer Hulse von’n 7. Februar 2008 bet 7. März 2012 en tweet Maal Afornten von dat Repräsentantenhuus.

Hulse weer ünner Premierminister Dean Barrow von’n 12. Februar 2008 bet 13. März 2012 Minister för Versorgung, Katastrofenmanagement, Verkehr un Kommunikatschoon in dat Kabinett Barrow I. Dat Ressort Versorgung hett he an’n 1. Juni 2010 an Elvin Penner afgeven.

Bi de Wahl 2015 wull Hulse wedder för de UDP antreden. Nadem de Mitsnidd von en Gespreek in de Medien opdükert is, in den Hulse Dean Barrow scharp kritiseert hett, hett he sik as Kannedaat trüggtagen un is kort later ok ut de Partei uttreden.