Midnight Lace
Midnight Lace (op plattdüütsch so veel as „Middernachtsknüppels“; dt. Titel: Mitternachtsspitzen) is en US-amerikaanschen Thriller ut dat Johr 1960. Speelbaas weer David Miller, de Hööftrull weer vun Doris Day speelt. Dat Dreihbook baseertop dat Drama Matilda Shouted Fire vun Janet Green un is in de Oort vun Alfred Hitchcock sien Thrillers maakt.
| Filmdaten | |
|---|---|
| Plattdüütsch Titel: | — |
| Originaltitel: | Midnight Lace |
| Düütsch Titel: | Mitternachtsspitzen |
| Produkschoonsland: | USA |
| Johr vun’t Rutkamen: | 1960 |
| Läng: | 110 Minuten |
| Originalspraak: | Engelsch |
| Öllersfreegaav in Düütschland: | FSK 12 (nee nakeken) |
| Filmkru | |
| Speelbaas: | David Miller |
| Dreihbook: | Janet Green, Ivan Goff, Ben Roberts |
| Produkschoon: | Ross Hunter, Martin Melcher Edward Muhl, Universal |
| Musik: | Frank Skinner, Curly Howard |
| Kamera: | Russell Metty |
| Snitt: | Leon Barsha, Russell F. Schoengarth |
| Szenenbild: | Robert Clatworthy, Alexander Golitzen |
| Kledaasch: | Irene |
| Dorstellers | |
| |
Inholt
ännernDe US-amerikaansche Kit Preston stammt ut en riek Huus un leevt nu siet dree Maanden in London tosamen mit ehrn Ehmann Anthony Preston, de en Gewarfsmann in hoge Positschoon is. Se is hin un weg un freit sik op de Hochtietsreis, de na Venedig gahn schall. Man, ehr Ehmann hett veel üm de Ohrn un is nich faken tohuus. As se in’n dichten Nevel dör en Park na Huus geiht, höört se de tarrte Stimm vun en Kerl, de to ehr seggt, dat he ehr noch dissen Maand ümbringen will. Ehr Mann versöcht, ehr goot totosnacken, dat se sik keen Sorgen maakt, man gau dorop mellt sik de Kerl nochmol an’t Telefon un drauht Kit nochmol wedder mit Moord. Anthony schallt dorophen Scotland Yard in, man de Inspekter Byrnes glöövt nich recht, wat Kit vertellt – vunwegen dat sik Fronslüüd veel utdenken doot, üm mehr Acht vun jemehr Ehmannslüüd to kriegen.
Op en Bosteed vör ehr Wahnung warrt se denn meist vun en Stahldräger drapen. De Boleider Biran Younger kann ehr in’n letzten Ogeneblick dorför bewohren. Kort later blifft se in’n Fohrstohl steken un kriggt Panik. Ok dit mol warrt se vun Younger rett. All Lüüd üm ehr rüm versöökt Kit to begööschen – ehr Mann Tony, de Naversche Peggy un ehr Tante Bea, de in de Stadt to Besöök is. Man, bit nu hett alleen Kit de Stimm vun den legen Kerl höört, un ehr warrt na un na kloor, dat ehr nümms glöven deit. Dorto kummt, dat Malcolm, de Söhn vun ehr Huushollersche ehr tosetten deit, vunwegen dat de sien Mudder jümmers üm Geld anfraagt un nu ok noch anfangt, bi Kit to snurren. Tony hett em nu in Verdacht, dat he jümmer bi Kit anropen deit. Un denn mutt he ok noch de Reis na Venedig wedder afseggen, vunwegen dat he to veel to doon hett – in sien Firma fehlt Aktien in’n Weert vun een Million Dollar, wohrschienlich üm en Gewarfspartner Schaden to maken.
Kit warrt opletzt vun’n Dokter ünnersöcht, üm seker to gahn, dat allns goot is. De Dokter finnt ok nix, raat Tony aver dorto, en Psychiater optosöken. Lieker schüllt se man de Reis na Venedig maken, vunwegen dat dat aflenken deit. So seggt Tony ehr to, dat se de Reis maken doot un em de Firma egal is. Man an’n Avend gifft dat noch en letzt Drapen in de Firma. Kort vördem Tony wegfohren will, klingelt wedder dat Telefon. Un ditmol kann Tony sülvst mithöörn, dat de Anroper künnigt maakt, Kit noch disse Nacht ümtobringen. He röpt de Polizei an un deit denn so, as wenn he na sien Drapen föhren de, kummt aver dör den achteren Ingang wedder torüch. To de glieken Tiet sitt Younger in de Bargegenöver un beobacht en snaakschen Kerl, so dat he to Vörsicht in de Neeg blifft. De Mann versöcht wohrhaftig – mit en Revolver – in de Wahnung vun de Prestons to kamen, warrt dor aver vun Tony daalslahn.
Kit glöövt nu, dat se seker is, man as se bi de Polizei anropen will, brickt Tony den Anroop af un vertellt, dat he de Kerl mit de snaakschen Stimm weer. He harr dat blots op ehr Geld afsehn un wull ehr in’n Wahnsinn drieven, üm ehr denn lichter an de Siet maken to künnen – dat schüll na Sülvstmoord utsehn. Hülp hett he dorbi vun Peggy kregen, mit de he wat an’t Lopen harr. Ehr Ehmann, de Seemann Roy weer nu tofallig dortwüschen kamen, man dat de den Plaan meist noch beter maken. Peggy finnt rut, dat de Frömme ehr Mann is, de ehr op de Spoor kamen weer. Den Moment nütt Kit, üm uttoneihn: Se geiht över’n Balkon op de Bogerüst blangento. Tony will achteran, üm sien Plaan to Enn to bringen. Man dat geiht nich op, vunwegen dat ünnen Younger mit en Polizist steiht. Togliek kummt Inspekter Byrnes vun de annern Siet in de Wahnung, ofschoonst Tony em gor nich anropen harr – man se harrn dat Telefon överwacht un hebbt so spitz kregen, wat Tony vör harr. Kit warrt op dat Gerüst vun Younger in Sekerheit bröcht. Un so geiht vör ehr opletzt doch allns goot ut
Kritik
ännern- Adolf Heinzlmeier un Berndt Schulz hebbt den Film in’t Lexikon „Filme im Fernsehen“[1] as en rasanten un dramaturgsch exzellenten Spannungskrimi betekent. Dat Speel vun Doris Day weer för jem unvermodens. Mit 2½ Steerns weer de Film över’n Dörsnitt beweert.
- De Evangeelsche Filmbeobachter beschrifft Midnight Lace as en düchtig spannenden un pleegten Kriminalfilm, de ahn Likeen utkummt, man ok ahn deepen Achtergrund.[2]
Utteken
ännernDe Film weer in’t Johr 1961 fiefmol för Filmpriesen vörslahn, ünner annern för den Oscar in de Kategorie Best Kledaasch för de Kledaaschmakersche Irene. Wunnen hett de Film opletzt blotz een vun de Priesen, neemlich den Bambi (3. Platz), mit den Doris Day as Beste Schauspelersche – Internatschonal uttekent worrn is.
Borns
ännern- ↑ Adolf Heinzlmeier un Berndt Schulz in’t Nakieksel „Filme im Fernsehen (Wietere Neeutgaav). Rasch und Röhring, Hamborg 1990, ISBN 3-89136-392-3, S. 575
- ↑ München, Kritik Nr. 15/1956
Weblenken
ännern- Midnight Lace in de Internet Movie Database (engelsch)