Irene Lentz
Irene Lentz (verh. as Irene Jones, later as Irene Gibbons; * 8. Dezember 1900 in Baker, Montana, USA; † 15. November 1962 in Los Angeles, Kalifornien, USA) weer en US-amerikaansche Kledaaschmakersche, de in’n Afspann tomeist as Irene opföhrt weer.
Leven un Wark ännern
Lentz is in de Tiet vun’n Stummfilm na’n Film kamen. As Schauspelersche hett se 1921 mit Slapstick-Kummedien an de Siet vun Mack Sennett, Ben Turpin un Billy Bevan anfungen. 1929 hett se F. Richard Jones heiraat, de bi ehrn eersten Film Speelbaas weer. De is in’n Dezember 1930 aver al fröh an en Tuberkuloos doodbleven.
In junge Johren harr Irene Lentz al dat Neihen lehrt. Mit ehr egen Kledaasch hett se en lütten Laden apen maakt, mit den se veel Spood haar. Se is denn in en hoch ansehne Boutique anstellt worrn, woneem ok Stars ut Hollywood inköpen deen. So keem dat, dat se ok in de Filmindustrie gau bekannt weer. Unafhangige Studios hebbt denn bi ehr nafraagt, dat se Kledaasch för en poor Produkschonen maken schüll. Vun de Tiet an, hett se sik blots noch Irene nöömt. 1933 hett se de eerste Arbeit för en Filmprodukschoon maakt. Veel Spood harr se 1937 mit ehr Kledaasch vun Ginger Rogers in dat Musical The Gay Divorcee (dt.: Tanz mit mir). Dorna hett se nu fakener ok för grote Studios arbeit. Ünner annern hett se Kledaasch maakt för Marlene Dietrich, Jean Arthur, Carole Lombard, Merle Oberon un Deborah Kerr.
Dör ehr Arbeit hett se den Schriever Eliot Gibbons drapen, den se 1936 heiraten de. He weer de Broder vun den mit Priesen uttekten Filmutstatter Cedric Gibbons. Dör de Verbinnen vun den Utstatter harr Irene de Mööglichkeit, na MGM to wesseln. Dor haar se denn dat Seggen in dat Afdeel för Kledaasch. Sünners loovt weer dor ehr Avantgarde-Kreatschoon för Lana Turner. Dorför is se 1949 för den Oscar nomineert wesen.
Ofschoonst se veel Spood harr, weer de Arbeit mit ehrn mächtigen un dicknäsigen Swager as ok de Eh mit Eliot nich licht. 1950 is se vun MGM weggahn, vunwegen dat se en egen Moodhuus apen maken wull. Se is teihn Johren vun de Filmindustrie wegbleven, weer denn aver vun ehr Fründin Doris Day betütert, dat se noch mol na’n Film torüch kamen schüll. Foorts harr se ok wedder Spood mit ehr Arbeiten. Ehr tweete Nomineren för den Oscar harr se för Doris Day ehr Kledaasch in Midnight Lace (dt.: Mitternachtsspitzen). 1962 het tse sik denn aver vullstännig vun’n Film torüchtagen.
An’n 15. November 1962 hett Irene in’t Knickerbocker Hotel in Los Angeles Sülvstmoord maakt. De 62-Johrige harr toeerst versöcht sik de Pulsadern apentosnieden, wat aver nich funkschoneert hett. Dorophen is se an’n Namiddag ut dat Finster vun de Baadstuuv in’n veerteihnsten Stock sprungen un dorbi op dat Vördack vun de Lobby opslahn. Ehr Liek weer eerst an’n Avend opdeckt.
Filmografie (Utwahl) ännern
| Johr | Titel |
|---|---|
| 1936 | Wedding Present |
| 1937 | Shall We Dance dt.: Tanz mit mir |
| 1938 | Vivacious Lady |
| 1938 | There Goes My Heart dt.: Millionärin auf Abwegen |
| 1939 | Midnight dt.: Enthüllung um Mitternacht |
| 1939 | Intermezzo: A Love Story dt.: Intermezzo |
| 1940 | Lucky Partners dt.: Glückspilze |
| 1940 | He Stayed for Breakfast |
| 1940 | Seven Sinners dt.: Das Haus der sieben Sünden |
| 1942 | They All Kissed the Bride dt.: Ein Kuss zuviel |
| 1942 | Tales of Manhattan dt.: Sechs Schicksale |
| 1942 | The Talk of the Town dt.: Zeuge der Anklage |
| 1943 | Above Suspicion dt.: Gefährliche Flitterwochen |
| 1943 | Thousands Cheer dt.: Nacht der tausend Sterne |
| 1943 | A Guy Named Joe dt.: Kampf in den Wolken |
| 1944 | Broadway Rhythm |
| 1944 | Two Girls and a Sailor dt.: Mein Schatz ist ein Matrose |
| 1944 | Gaslight dt.: Das Haus der Lady Alquist |
| 1944 | Music for Millions dt.: Musik für Millionen |
| 1944 | The Canterville Ghost dt.: Das Gespenst von Canterville |
| 1944 | The Seventh Cross dt.: Das siebte Kreuz |
| 1945 | Adventure dt.: Mann ohne Herz |
| 1945 | The Picture of Dorian Gray dt.: Das Bildnis des Dorian Gray |
| 1945 | The Clock dt.: Urlaub für die Liebe |
| 1946 | Easy to Wed dt.: Eine Falle für die Braut |
| 1946 | The Postman Always Rings Twice dt.: Im Netz der Leidenschaften |
| 1946 | The Yearling dt.: Die Wildnis ruft |
| 1947 | Living in a Big Way dt.: Liebe auf den zweiten Blick |
| 1947 | Fiesta dt.: Mexikanische Nächte |
| 1947 | Cass Timberlane dt.: Fesseln der Liebe |
| 1947 | The Sea of Grass dt.: Endlos ist die Prärie |
| 1947 | The Unfinished Dance dt.: Tanz ohne Ende |
| 1948 | State of the Union dt.: Der beste Mann |
| 1948 | Julia Misbehaves dt.: Die unvollkommene Dame |
| 1948 | The Pirate dt.: Der Pirat |
| 1949 | The Bribe dt.: Geheimaktion Carlotta |
| 1949 | Neptune’s Daughter dt.: Neptuns Tochter |
| 1949 | Scene of the Crime dt.: Sumpf des Verbrechens |
| 1949 | In the Good Old Summertime dt.: Damals im Sommer |
| 1950 | Please Believe Me dt.: Drei Männer für Alison |
| 1960 | Midnight Lace dt.: Mitternachtsspitzen |
| 1961 | Lover Come Back dt.: Ein Pyjama für zwei |
| 1963 | A Gathering of Eagles dt.: Der Kommodore |
Utteken ännern
Irene weer för ehr Arbeiten dreemol för Filmpriesen vörslahn, dorünner tweemol för den Oscar in de Kategorie Best Kledaasch. Uttekent weer se 2005 mit de Opnahm in de Hall of Fame vun de Costume Designers Guild.
Weblenken ännern
- Irene Lentz in de Internet Movie Database (engelsch)