Misheck Mawema
Misheck Chigayo Mawema (* in Rhodesien) weer en Gewerkschafter ut Rhodesien (vondaag Simbabwe), de in Belize aktiv weer.
Mawema is in Rhodesien boren un hett later Politikwetenschoppen an de University of Kansas studeert. Na dat Studium kunn he 1966 von wegen siene polietsche Aktivität nich wedder na Rhodesien trügg un weer denn in’t Exil.[1] He keem 1970 na Belize. He weer dor toeerst Schoolmeester an de Corozal High School in Corozal un later Schoolmeester an de Stann Creek High School in Dangriga.[2][3]
Mawema is 1975 to’n Vörsitter von de Southern Christian Union (SCU) wählt worrn, de vör allen in de Zitrusindustrie in dat Stann Creek Valley (Distrikt Stann Creek) aktiv weer.[2]
Nadem Mawema den Vörsitt övernahmen hett, kunn de Gewerkschaft de Tall Maten gau op dat Dreedubbelte vergröttern.[2] Mawema hett sik in düsse Tied för de Unafhängigkeit von Belize utspraken un sik dorbi ok gegen den Kapitalismus insett.[2] Dorüm is de SCU ok von’n kapitalistisch orienteerten Internatschonalen Bund von Christliche Gewerkschaften to’n sozialistisch orienteerten Weltgewerkschaftsbund wesselt.[2] De SCU is in’n August 1979 mit de Belize General Development Workers’ Union to de United General Workers Union (UGWU) tohoogahn.[2]
Na de Fusion weer he Education Director von de UGWU un Föhrer von de Gewerkschaft in de Zitrusrebeden in Stann Creek. In de Tied rüm, as Belize 1981 unafhängig worrn is, is Mawema trügg na Simbabwe, dat 1980 sülvs unafhängig worrn is.
Mawema weer mit en Fro ut Belize verheiraadt un harr Kinner.[1]
Footnoten
ännern- ↑ a b Assad Shoman: Backtalking Belize: selected writings. Angelus Press Limited, 1995, Sied 165
- ↑ a b c d e f Laurie Kroshus Medina: Negotiating Economic Development: Identity Formation and Collective Action in Belize. University of Arizona Press, 2004, Sied 79
- ↑ Persona non grata: What the Hell is That, Wabagari Post an’n 22. Januar 2010