Mouth & MacNeal

Mouth & MacNeal weer en nedderlännsch Popgrupp oder Singerduo, dat Anfang vun de 1970er Johren in heel Europa Spood harr. De Musik weer in de Oort vun de Musikgrupp Middle of the Road, de to de glieken Tiet veel Spood harr.

Mouth & MacNeal 1971

Dat Duo bestünn ut Willem Duyn, de as Slagtüüchspeler anfungen weer un al verschedene Saken mit Musik maakt haar, un Maggie MacNeal. Tosamenfunnen hebbt sik de beiden in’t Johr 1971.

Dat Duo is internatschonal bekannt woorn mit dat Leed „How Do You Do?“, dat in’t Fröhjohr 1972 bit op Platz 5 in de düütschen Hitparade kamen un in de US Billboard Charts op Platz 8 lannt is. Dat Leed is vun Peter Petrel ünner den Naam „Die Windows“ in düütsche Spraak covert worrn un weer in Düütschland en Top-Hit. Mouth MacNeal stünnen in Düütschland 1972 wekenlang op Platz 1 mit jemehrn nafolgenden Hit Hello-A, un in’t lieke Johr noch keem ok „You-Kou-La-Le-Lou-Pie“ rut, wat ok in de Top 20 rinkamen is. Dat nächste Leed, „Battering Ram“, weer in’t Fröhjohr in Düütschland aver nich mehr platzeert.

Mit den Titel „Ik zie een ster“ („I See A Star“) hebbt de beiden 1974 de Nedderlannen bi den Eurovision Song Contest vertreden un kemen dorbi op den drüdden Platz achter ABBA, de mit „Waterloo“ wunnen hebbt, un Gigliola Cinquetti mit dat Leed „Si“. Kort dorop güngen de beiden wedder ut’neen. Maggie MacNeal hett denn as Solisten wieter maakt, wiel Willem Duyn mit en ne’e Partnersche dat Duo Mouth & Little Eve grünnt hett.