Nearktis
De Nearktis is een vun de acht groten Regionen, wo de Biogeographie de Eer in unnerdeelt. Dor höört meist ganz Noordamerika mit to, Gröönland un dat Hoochland vun Mexiko. Anners is dat mit den Süden vun Mexiko un Florida, Zentralamerika, de Eilannen in de Karibik un mit Süüdamerika: Düsse Gemarken weert to de Neotropis rekent.
Noord- un Süüdamerika sünd vundagen dör den Isthmus vun Panama verbunnen. Man vor 180 Mio. Johre weern se scheedt un vundeswegen verscheelt sik de Aarden vun Planten un Deerter, de sik dor utspunnen hefft, bannig. As de Superkontinent Pangea ut'neenbraken weer, bleev Noordamerika toeerst verbunnen mit Eurasien un is dor en Deel vun den neen Grootkontinent Laurasia mit ween. Süüdamerika weer dormols Deel vun den annern Grootkontinent Gondwana. Eerst, as de Atlantik sik updaan hett, sünd Noordamerika un Europa scheedt wurrn. Eerst later hett dat Landbruggen geven twuschen Noordamerika un Asien (Beringstraten) un mit Süüdamerika (Panama). Over düsse Landbruggen sünd allerhand Aarden uttuuscht wurrn twuschen de Kontinente. So keem dat to den Groten Amerikaanschen Fauna-Uttuusch (Great American Interchange). So is dat kamen, datt in de Nearktis un in de Paläarktis so veel gemeensome Aarden Deerter un Planten bestaht. De beiden Regionen weert vundeswegen ok to en gemeensome Rgion verbunnen, dat is de Holarktis.
Literatur
ännern- Dieter Heinrich, Manfred Hergt, Rudolf Fahnert, dtv-Atlas Erde, Physische Geographie, 1. Uplage, München 2006, S. 266-267, ISBN= 3-423-03329-0
