Nicholas Anthony Ignatius „Nick“ Pollard (Senior; * 22. März 1924 in Bacalar; † 21. Januar 2003) weer en Gewerkschafter, Politiker (PUP, CDP) un Journalist ut Brietsch-Honduras/Belize.

Leven ännern

Pollard is 1924 as Söhn von Stella Alberta Gill un Juan Castro Pollard in Bacalar (Mexiko) boren. Siene Öllern deen ut Brietsch-Honduras stammen. He weer in Belize-Stadt op de Holy Redeemer Primary School un de St. Ignatius Primary School un denn op dat St. John’s College.[1]

Pollard weer 1948 Mitgrünner un eersten Präsident von de Mercantile Clerks Union un 1950 bet 1956 Generaalsekretär von de General Workers’ Union (GWU).[1] 1950 hett he to de Mitgrünners von de People’s United Party höört.[1] In dat Johr is he ok Präsident von de GWU worrn.

In’n Juli 1956 hett he sik von de GWU loosseggt un de Christian Democratic Union grünnt, von de he 1956 bet 1958 Generaalsekretär weer.[1] In’n September 1956 hett he tohoop mit George Cadle Price de Belize Times grünnt.[1]

1958 is he ut de PUP rut un hett de Christian Democratic Party (CDP) grünnt,[1] von de he 1958 bet 1960 ok Parteibaas weer.

De Southern Christian Union is 1961 tohoop mit David McKoy grünnt worrn. Von 1961 bet 1969 weer Pollard Sekretär von dat engelschsprakige Afdeel von de Latienamerikaansche Kunföderatschoon von Christliche Gewerkschaften.[1] 1962 hett he de Christian Workers Union grünnt un 1963 de National Federation of Christian Trade Unions.[1]

Bi de Parlamentswahl in Brietsch-Honduras 1961 weer he Kannedaat för de CDP in’n Wahlkreis Albert un hett 37,9 % von de Stimmen haalt. Dormit keem he op’n tweten Platz achter Frederick Westby von de PUP un vör Floss Casasola von de NIP un kunn nich in de Legislativversammlung intehn.

1969 hett he de Democratic Independent Union grünnt.[1]

In de Johren 1970 hett sik Pollard ut de Politik trüggtagen.[1] He weer aver noch as Kolumnist un Schriever aktiv un hett Gedichten rutbröcht.[1] Von Beroop weer he in düsse Tied Schoolmeester an dat Anglican Cathedral College un dat St. John’s College.[1]

Pollard weer verheiraadt mit Elizabeth Hoffman-Pollard. De beiden harrn twölv Kinner. Sien Söhn Nicholas Pollard Junior is ünner annern as Historiker aktiv.

Footnoten ännern

  1. a b c d e f g h i j k l Belizean Biographies, bnlsis.org